مەملەكەت باسشىسى بەلارۋس رەسپۋبليكاسىنىڭ پرەزيدەنتىمەن كەزدەسۋ بارىسىندا وعان شانحاي ىنتىماقتاستىق ۇيىمىنىڭ سامميتىنە جانە «استانا ەكسپو-2017» دۇنيە جۇزىلىك كورمەسىنىڭ اشىلۋىنا قاتىسۋ ءۇشىن قازاقستانعا كەلگەنىنە العىس ايتتى.
– ەكى جارىم جىل ىشىندە ءتيىستى ينفراقۇرىلىمى بار تۇتاس ءبىر اۋدان سالىندى. كورمەگە قاتىسۋشىلار ءۇشىن تۇرعىن ۇيلەر, قوناق ءۇي كەشەنى, كونگرەسس-حول جانە وسى اۋقىمدى ءىس-شارانى وتكىزۋگە قاجەتتى باسقا دا عيماراتتار بوي كوتەردى. كورمەنى وتكىزگەن سوڭ بۇل جەردە استانا حالىقارالىق قارجى ورتالىعى جۇمىس ىستەيتىن بولادى, – دەدى نۇرسۇلتان نازارباەۆ.
قازاقستان پرەزيدەنتى حالىقارالىق كورمەنىڭ نەگىزگى يدەياسىنا توقتالىپ, كورمەنىڭ باستى نىسانى – «نۇر الەم» پاۆيلونىنداعى ەكسپوزيتسيالار تۋرالى ايتتى.
بەلارۋس رەسپۋبليكاسىنىڭ پرەزيدەنتى نۇرسۇلتان نازارباەۆقا حالىقارالىق كورمەنىڭ اشىلۋىنا قاتىسۋعا شاقىرعانى ءۇشىن ريزاشىلىق ءبىلدىردى.
– ءبىز پاۆيلونداردى ارالاپ كورىپ قانا قويماي, سىزدەردىڭ ەكسپوزيتسيالىق كەشەندەر قۇرىلىسىنداعى تاجىريبەلەرىڭىزدى مۇقيات زەرتتەمەكپىز. ويتكەنى ءبىز دە حالىق شارۋاشىلىعى جەتىستىكتەرى كورمەسىن ۇيىمداستىرۋدى جوسپارلاپ وتىرمىز, – دەدى ا.لۋكاشەنكو.
سونىمەن قاتار, بەلارۋس پرەزيدەنتى نۇرسۇلتان نازارباەۆتىڭ تاريحتى زەرتتەۋدە ادىلەتتىلىكتى قالپىنا كەلتىرۋگە جەتە كوڭىل بولەتىنىن اتاپ ءوتتى.
– ءسىز بۇرىنعى لاگەردىڭ ورنىندا «الجير» مۋزەيىن اشۋعا كوپ كۇش جۇمسادىڭىز. بۇل لاگەردە بۇرىنعى وداقتىڭ تۇكپىر-تۇكپىرىنەن ايدالىپ كەلگەن ادامدار قامالدى. ونىڭ ىشىندە بەلارۋسيادان كەلگەن ايەلدەر دە بولدى. بۇگىن ءبىز بىرقاتار حاتتار مەن تاعدىرى لاگەرمەن بايلانىستى ادامداردىڭ ءىس قاعازدارىن الا كەلدىك. بۇل – ماڭىزدى قۇجاتتار, – دەدى ا.لۋكاشەنكو.
كەزدەسۋ سوڭىندا مەملەكەتتەر باسشىلارى ەكىجاقتى قاتىناستاردى دامىتۋدىڭ وزەكتى ماسەلەلەرىن دە تالقىلادى.
