العاشقى كەزەڭدە قاراعاندى وبلىسى جەرگىلىكتى وندىرۋشىلەردىڭ قۇرىلىس ماتەريالدارىن جەتكىزۋ, ەكسپو نىساندارىن سالۋ بويىنشا جوبالىق ۇيىمدار مەن قۇرىلىس كومپانيالارىنىڭ جۇمىسىن جۇزەگە اسىرۋمەن اينالىستى.
ناتيجەسىندە, ايماقتاعى 29 كاسىپورىن 9,5 ملرد تەڭگە كولەمىندە ءونىم جەتكىزىپ, 7 كاسىپورىن 257,5 ملن تەڭگە سوماسىندا قىزمەت جۇمىستارىن ورىندادى.
ەكسپو كورمەسىن تاماشالاۋعا كەلگەن شەتەلدىك قوناقتارعا اقپاراتتىق قىزمەت كورسەتۋ ءۇشىن قاراعاندى وبلىسىنىڭ جوو-نان ءۇش تىلگە جەتىك, مادەني-بۇقارالىق ءىس-شارالار جۇرگىزۋدە ماشىعى بار 250 ەرىكتى تاڭدالىپ الىندى.
الەم نازارىن تىگىپ وتىرعان «ەكسپو-2017» حالىقارالىق كورمەسىنە قاراعاندى وبلىسىنىڭ تۇرعىندارى وسى كۇنگە دەيىن 90 مىڭ بيلەت ساتىپ العان. بۇل تۋرالى ايماقتىق ورتالىق كوممۋنيكاتسيالار قىزمەتىنىڭ الاڭىندا وتكەن ءباسپاسوز ءماسليحاتىندا قاراعاندى وبلىسى كاسىپكەرلەر باسقارماسىنىڭ باسشىسى تاتيانا ابلاەۆا مالىمدەگەن بولاتىن.
ايماق جۇرتشىلىعى اراسىندا الەمدىك شاراعا قىزىعۋشىلىق كۇن ساناپ ارتىپ كەلەدى. ونى وسى كۇنگە دەيىنگى رەسمي مالىمەتتەر راستايدى. سونىمەن قاتار, ەل ىشىندە كورمەگە ەرىكتى تۇردە قاتىسامىن دەۋشىلەردىڭ قاراسى از ەمەس. جالپى, قاراعاندى وبلىسىنان الەمدىك شاراعا 200 مىڭ ادام قاتىسادى دەپ بولجام جاسالۋدا. بيۋدجەت قاراجاتى ەسەبىنەن 3750 وقۋشىنىڭ قاتىسۋىن قامتاماسىز ەتۋ جوسپارلانعان. ياعني, 12 ماۋسىم مەن 6 شىلدە ارالىعىندا 1050 دارىندى بالا جانە بالالار ءۇيىنىڭ تاربيەلەنۋشىلەرى كورمەنى وبلىستىق بيۋدجەت ەسەبىنەن بارىپ تاماشالايتىن بولادى. ال 10 شىلدە مەن 10 قىركۇيەك مۇعدارىندا كورمەگە جەرگىلىكتى بيۋدجەت ەسەبىنەن اۋداندار مەن قالالاردىڭ جالپى ءبىلىم بەرەتىن مەكتەپتەرىنەن 2700 الەۋمەتتىك از قامتىلعان دارىندى وقۋشىلار قاتىسپاق.
كورمەنى وتكىزۋ بارىسىندا ءوڭىردىڭ اۋىل شارۋاشىلىعى 8964 توننا ازىق-ت ۇلىك تاۋارىن ءوندىرۋ جانە جەتكىزۋدى جوسپارلاپ وتىر. سونداي-اق, وسى جىلدىڭ 4-9 قىركۇيەگى ارالىعىندا قاراعاندىنىڭ مادەنيەت كۇندەرى شەڭبەرىندە وبلىستىق مادەنيەت, مۇراعاتتار جانە قۇجاتتاما باسقارماسى تاراپىنان 21 مادەني-ساۋىقتىق ءىس-شارا ۇيىمداستىرۋ كوزدەلۋدە.
«ەكسپو-2017» حالىقارالىق كورمەسى – وتاندىق ءتۋريزمدى تۇلەتۋدىڭ جاڭا ءبىر مۇمكىندىگى بولماق. الداعى ۋاقىتتا ەلىمىزگە جەر شارىنىڭ تۇكپىر-تۇكپىرىنەن 2 ميلليوننان استام قوناقتار كەلسە, ونىڭ 300 مىڭدايى شەتەلدىكتەر بولادى دەپ كۇتىلۋدە. وسى رەتتە, قاراعاندىنىڭ تاڭعاجايىپ تابيعاتى مەن تاريحي ورىندارىن تاماشالاۋعا كەلگەندەر ءۇشىن «Nomadic Travel Kazakhstan», قارقارالى مەملەكەتتىك ۇلتتىق-تابيعي پاركى, «پاۆلين-تۋر» تۋروپەراتورلارى دايىنداعان «قازاق دالاسىنىڭ جەرۇيىعى», «قىزىلاراي: باعزىدان – بيىككە», «قارقارالى – سارىارقانىڭ ءساندى القاسى», «تەمىرتاۋ – مەتاللۋرگتەر قالاسى», «قازاقستاننىڭ جاڭا پاراقتارى: استانا-قاراعاندى» تۋريستىك باعىتتارى قىزمەت كورسەتپەك.
جالپى, قاراعاندىعا ات باسىن بۇرعان, سونداي-اق, اتالمىش كورمە قوناقتارىنىڭ جايلى ورنالاسۋىن قامتاماسىز ەتۋ ماقساتىندا نومىرلىك قوردى كەڭەيتۋ جانە جەتىلدىرۋ جۇمىستارى جۇرگىزىلدى.
2015 جىلدان بەرى كەنشىلەر استاناسىندا جالپى سوماسى 3,5 ملرد تەڭگەنى قۇرايتىن ورنالاسۋ نىساندارىن سالۋ جانە قايتا جوندەۋ بويىنشا 23 جوبا جۇزەگە اسىرىلعان.
ميراس اسان,
«ەگەمەن قازاقستان»
