ءفيلمدى ش.ايمانوۆ اتىنداعى «قازاقفيلم» كينوستۋدياسى مەن قىتايلىق «Shineworks Pictures» جانە «China film coproduction corporation» كومپانيالارى بىرلەسىپ تۇسىرەدى. بىرلەسكەن جوبا تۋرالى ۋاعدالاستىق 2015 جىلى قىتايدا وتكەن «جىبەك جولى» ءىى حالىقارالىق كينوفەستيۆالى كەزىندە جاسالعان بولاتىن. ال بىلتىر بىرلەسكەن جوبا ناقتىلانىپ, «كومپوزيتور» اتتى كوركەم ءفيلمدى بىرلەسىپ ءتۇسىرۋ, قارجىلاندىرۋ جانە بىرلەسىپ پايدالانۋ تۋرالى كەلىسىمگە قول قويىلعان. ەندىگى جەردە ءفيلمدى ءتۇسىرۋ جۇمىستارى باستالىپ كەتپەك. الماتىدا تۇسىرىلەتىن ءفيلمنىڭ شىعارماشىلىق, قارجىلىق رەسۋرستارى دايىن. بۇل تۋرالى اڭگىمەلەگەن «قازاقفيلم» اق ۆيتسە-پرەزيدەنتى سەرىك جۇباندىقوۆ ءفيلمنىڭ 80 پايىزى الماتىدا, ال جيىرما پايىزى قىتايدا تۇسىرىلەتىنىن, دەگەنمەن مونتاجداۋ, كومپيۋتەرلىك گرافيكا جاعىمەن قىتاي تاراپى اينالىساتىنىن باياندادى.
«فيلم ءتۇسىرۋ وڭاي. قارجى ماسەلەسى, پروكات جاعى قيىن. ءبىز ءفيلمنىڭ سمەتاسىن تەڭ ءبولىپ الدىق. ەكى جاق تا ءفيلمدى ءتۇسىرۋ ءۇشىن ەلۋ-ەلۋ پايىزدان قارجى شىعارادى. كەلەر جىلى ساۋىردە فيلم ءتۇسىرىلىپ بىتەدى. ماقساتىمىز – قىتاي نارىعىنا شىعۋ. ءفيلمنىڭ قىتايداعى پروكاتىنا بەيجىڭ قالالىق پارتيا كوميتەتى كومەكتەسەتىن بولادى», دەدى ول.
قىتاي كينوگەرلەرىمەن بىرلەسىپ تۇسىرىلەيىن دەپ جاتقان «كومپوزيتور» اتتى كوركەم فيلمگە قوس كومپوزيتور باقىتجان بايقاداموۆ پەن سي سينحايدىڭ دوستىعى ارقاۋ ەتىپ الىنعان. ياعني, ومىردە بولعان وقيعانىڭ ىزىمەن تۇسىرىلمەك. سي سينحاي – قىتاي حالىق رەسپۋبليكاسىنىڭ حالىق كومپوزيتورى اتاعىنا يە بولعان, قىسقا عانا عۇمىرىندا 300-دەن اسا شىعارمالار تۋدىرعان دارا تالانت يەسى. ەكىنشى دۇنيەجۇزىلىك سوعىس كەزىندە ساياسي قۋعىن-سۇرگىن كورگەن ول ءومىرىنىڭ سوڭعى جىلدارىن قازاقستاندا وتكىزگەن. قازاقتىڭ كورنەكتى كومپوزيتورى باقىتجان بايقاداموۆپەن دوس بولعان. دۇرىسى, سي سينحايدى اشتىق, قايىرشىلىق كۇيدەن قۇتقارىپ, قايتادان شىعارماشىلىق ورتاعا ورالۋىنا سەپتىگى تيگەن باقىتجان بايقاداموۆ بولعانى قاي ءبىر جىلدارى باق بەتتەرىندە جاريالانعان. ول كەزدە ەكى تالانتتىڭ دوستىعى تۋرالى رەجيسسەر اسەمعازى قاپان ۇلى 20 مينۋتتىق دەرەكتى فيلم تۇسىرگەن ەدى. قىتاي مادەنيەتىنە ۇلكەن ءىز قالدىرعان ۇلكەن تۇلعانىڭ تاعدىرى ەندى كوركەم فيلمگە اينالىپ, ەكى ەلدىڭ كورەرمەندەرىنە جول تارتپاق.
«كومپوزيتور» ءفيلمىن ءتۇسىرۋ جۇمىستارى باستالعانى تۋرالى شاراعا مادەنيەت جانە سپورت ءمينيسترى ارىستانبەك مۇحامەدي ۇلى, قحر باسىلىم, كينو, راديو, تەلەحابار ماسەلەلەرى بويىنشا مەملەكەتتىك اكىمشىلىگىنىڭ ءمينيسترى نە چەنسيمەن بىرگە ەكى تاراپتىڭ دا كينوگەرلەرى, ارتىستەرى قاتىستى. ايتا كەتەيىك, اتالمىش ءفيلمنىڭ رەجيسسەرى – شەريزات ياقۇب, قويۋشى رەجيسسەرى – ءسابيت قۇرمانبەكوۆ. ولاردان بولەك باستى رولدەردى سومدايتىن حۋ دجۋن, بەرىك ايتجانوۆ جانە التىناي نوگەربەك تە شارادا قوناق رەتىندە بوي كورسەتتى.
ايگۇل سەيىلوۆا,
«ەگەمەن قازاقستان»
