مەموراندۋمعا سايكەس, «جاسىل ورام» كەشەنىن ەكسپو-2017 وبەكتىلەرىنىڭ ءبىرى رەتىندە ەنگىزۋ تۋرالى شەشىم قابىلداندى.
«جاسىل ورام» كەشەنىنىڭ «سامۇرىق-قازىنا» جىلجىمايتىن م ۇلىك قورى» اق, «اتف بانكى» اق جانە BI Group قۇرىلىس كومپانياسى اراسىندا مەملەكەتتىك-جەكەشەلىك ارىپتەستىك شەڭبەرىندە مەملەكەت باسشىسىنىڭ باستاماسىمەن سالىنعانىن اتاپ ءوتۋ ءجون.
«جاسىل ورام» كەشەنىنىڭ نەگىزگى يدەياسى – استانا قالاسىنىڭ اۋا رايى جاعدايلارىن ەسكەرە وتىرىپ, ەكولوگيالىق تۇراقتى قالا اۋدانىن سالۋ. تۇجىرىمدامانى الەمدەگى 10 ۇزدىك ساۋلەت-جوبالىق كومپانيالار توبىنا كىرەتىن AEDAS كومپانياسى ۇسىندى.
ەكسپو-2017 كورمەسىنىڭ ءبىرى رەتىندە قابىلدانعان «جاسىل ورام» كەشەنىن تانىستىرعان «سامۇرىق-قازىنا» جمق» اق باسقارما باسشىسى ارمان جەتپىسباي بۇل كەشەننىڭ تيىمدىلىگى تۋرالى ايتتى.
– بۇل ورامنىڭ ەڭ باستى ارتىقشىلىعى – ەنەرگيا ۇنەمدەۋى مەن ەكولوگيالىق تالاپتارعا ساي بولۋىندا. نارىقتاعى باسپانا باعاسىنان قىمبات بولعانىمەن, بۇل تۇرعىن ءۇي كەشەنىندە تۇراتىندار كوممۋنالدىق شىعىنداردان 22 پايىزعا دەيىن ۇنەمدەي الادى, دەيدى ارمان جەتپىسباي.
«جاسىل ورام» – LEED Campus Group سەرتيفيكاتتاۋىنان وتكەن تمد اۋماعىنداعى ءبىرىنشى كەشەن. ونىڭ بىرەگەيلىگى – سەرتيفيكاتتاۋدان جەكە تۇرعان عيمارات ەمەس, ءبىر كەشەنگە بىرىكتىرىلگەن عيماراتتار توبى ءوتتى.
ەكسپو كورمەسىن وتكىزۋ كەزەڭى ىشىندە ءبىرىنشى وتاندىق ەلەكتر اۆتوبۋستارمەن «جاسىل ورام» وبەكتىسىنە دەيىن تەگىن باعىت ۇيىمداستىرىلادى. ەلەكتر اۆتوبۋستار قازاقستاندىق ينجەنەرلەر مەن «Higer» الەمدىك اۆتوگيگانتىنىڭ بىرلەسكەن جوباسى.
ەلەكتر كولىكتىڭ اتالعان ءتۇرىن پايدالانۋ, سونداي-اق قۇرىلىستا «جاسىل» تەحنولوگيالاردى قولدانۋ قازاقستاندا ەكولوگيا جانە ەنەرگيا تيىمدىلىگى قاعيداتتارىن ناقتى ىسكە اسىرۋدىڭ ايقىن مىسالى بولىپ ەسەپتەلەدى.
ارنۇر اسقار,
«ەگەمەن قازاقستان»
