كۇركە لاگەرىنىڭ سىيىمدىلىعى - 300 ادام, ءار كۇركەدە 4 ادامنان. جاز ماۋسىمى كەزىندە EXPO-Camp 8-دەن 21 جاسقا دەيىنگى 2000-نان استام ادامدى قابىلداۋعا دايىن.
- لاگەر باعدارلاماسى ءبىر اپتاعا جوسپارلانعان,ء ار دۇيسەنبى سايىن قابىلدايدى. بىزدە ەكى جاس ساناتى بار, ترەنينگتەردىڭ قيىندىعىنا بايلانىستى 8-17 جاس ارالىعى جانە 14-21 جاس. مۇنداي لاگەردى قۇرۋ يدەياسى قازاقستان EXPO كورمەسىن وتكىزۋ مارتەبەسىنە يە بولعان تۇستا پايدا بولدى. سكاۋتتار بىزگە كورەيادان كەلەدى ءارى گەرمانيادان دا توپ كۇتىپ وتىرمىز, - دەيدى قازاقستان سكاۋت قوزعالىسىنىڭ پرەزيدەنتى يلدار كاتەنوۆ.
EXPO-Camp باعدارلاماسى 12 تاقىرىپتىق ماۋسىمعا باعىتتالعان: «تومەن كومىرتەكتى دامىتۋ», «كليماتتىق وزگەرىستەر», «بولاشاقتىڭ اگروتەحنولوگياسى», «ەكولوگيالىق تۇراقتىلىق», «جاسىل تەحنولوگيالار», «ەنەرگيا ۇنەمدەيتىن تەحنولوگيالار», «جاسىل ەكونوميكا نەگىزدەرى», ت.ب.
– لاگەردى ارناسايدا اشۋدىڭ ءوز سەبەبى بار: مۇندا لوگيستيكالىق ينفراقۇرىلىم جاقسى دامىعان ءارى قالاعا قاتىناۋ جەڭىل. باستىسى مۇندا 2015 جىلدان بەرى 35 «جاسىل» ادىستەمەنى ءساتتى جۇزەگە اسىرىپ وتىرعان «جاسىل» تەحنولوگيا ورتالىعى جۇمىس ىستەيدى. بالالارعا «جاسىل» ەكونوميكانىڭ نە ەكەنىن تاجىريبە ارقىلى كورسەتىپ, ۇيرەتۋدى جوسپارلاپ وتىرمىز, - دەيدى يلدار كاتەنوۆ.
لاگەر اۋماعىندا جىلىجاي جانە بالىق وسىرەتىن تالىمباق بار. ال ارناساي قازاقستانداعى العاشقى «جاسىل اۋىل» دەپ اتالادى, ويتكەنى جەرگىلىكتى تۇرعىندار «جاسىل» تەحنولوگيامەن ورگانيكالىق كوكونىس ونىمدەرىن وسىرەدى.
– ءبىزدىڭ اسحانا ءمازىرى تەك قانا ەكولوگيالىق تازا ونىمدەردەن تۇرادى. بارلىق كوكونىس – قىزاناق, قيار, پيازدى – وسىندا وسىرەمىز. تاڭەرتەڭگى اس تا جەرگىلىكتى ءۇي سۇتىنەن ازىرلەنەدى, - دەيدى ۇيىمداستىرۋشىلار.
لاگەر تاربيەلەنۋشىلەرى نۇسقاۋشىلاردىڭ جەتەكشىلىگىمەن وقىتىلادى: قازىر EXPO-Camp-دا 22 ۇيلەستىرۋشى جۇمىس ىستەپ جاتىر – ءار جاساققا ەكەۋدەن. ولار حالىقارالىق سەرتيفيكات العان نۇسقاۋشىلار, رەسپۋبليكالىق دەڭگەيدەگى ماماندار, سونداي-اق, پەداگوگيكالىق تاجىريبەنى مەڭگەرگەن استانا قالاسىنىڭ پەداگوگيكالىق, پوليتەحنيكالىق, گۋمانيتارلىق كوللەدج ستۋدەنتتەرى.
– سكاۋت ادىسىنە ساي بالا مەن تالىمگەردىڭ جاس ايىرماشىلىعى 2-3 جاس بولۋى ءتيىس. سەبەبى ولار ءبىر-بىرلەرىمەن تىعىز بايلانىسىپ, ءبىر كوماندا قۇرامىندا بولادى. مۇندا بارلىعى ءوزىن-ءوزى باسقارۋعا نەگىزدەلگەن: نۇسقاۋشىلار بالالاردىڭ ويلاعانىن جۇزەگە اسىرۋعا كومەك بەرەتىن ۇيلەستىرۋشى رەتىندە جۇمىس جاسايدى. ولار بولاشاقتا ءوز بەتتەرىمەن شەشىم قابىلداي الۋلارى ءۇشىن ءبىز ولارعا تاڭداۋ قۇقىعىن بەرەمىز, - دەيدى يلدار كاتەنوۆ.
EXPO-Camp لاگەرىن قۇرۋعا G-Global حالىقارالىق حاتشىلىعى, «جاسىل» ەكونوميكا جانە G-Global دامىتۋ كواليتسياسى, «اقبوتا» قق, «قازاقستاننىڭ سكاۋت قوزعالىسى» قب باستاما بولدى.
