قىتاي باسشىسىنىڭ اتالمىش كىتابى 2014 جىلى جارىققا شىققان. سودان بەرى الەمنىڭ 20 شاقتى تىلىنە اۋدارىلىپ, 6 ميلليوننان اسا دانامەن جارىق كورگەن تاڭداۋلى ەڭبەكتەردىڭ قاتارىنا ەندى. قازاق تىلىندەگى نۇسقاسى ەلورداداعى «فوليانت» باسپاسىنان جارىق كوردى. كىتاپتىڭ تانىستىرىلىمى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا ءوتتى. رەسمي شاراعا قازاقستان مەن قىتاي تاراپىنان لاۋازىمدى قوناقتار قاتىستى.
كىتاپتىڭ تۇساۋكەسەر ءراسىمى قحر توراعاسى سي ءتسزينپيننىڭ استاناعا رەسمي ساپارىنا وراي ۇيىمداستىرىلدى. شارادا قحر-دىڭ قازاقستانداعى توتەنشە جانە وكىلەتتى ەلشىسى چجان حانحوي ەكى تاراپتىڭ دا 25 جىل ىشىندە جاقسى جەتىستىكتەرگە قول جەتكىزگەنىن باياندادى.
ال, قازاقستان پرەزيدەنتى كەڭسەسى جەتەكشىسىنىڭ ورىنباسارى باقىتجان تەمىربولات «ەل باسقارۋ جونىندە» اتتى كىتاپتىڭ مازمۇنىمەن تانىستىردى. ونىڭ ايتۋىنشا, قىتاي حالىق رەسپۋبليكاسىنىڭ توراعاسى سي ءتسزينپيننىڭ «ەل باسقارۋ جونىندە» دەپ اتالاتىن كىتابى 18 تاراۋدان تۇرادى. وندا قىتاي ۇلگىسىندەگى سوتسياليزمگە تاباندى بولۋ جانە ونى دامىتۋ, جۇڭحۋا ۇلتىنىڭ ۇلى گۇلدەنۋى سىندى قىتاي ارمانىن جۇزەگە اسىرۋ, رەفورمالاردى جان-جاقتى جەتىلدىرۋ, قىتايدى زاڭمەن باسقارۋ ارقىلى وركەندەتۋ, ەكولوگيالىق وركەنيەتتى كوركەيتۋ, ت.ب يدەيالار باسشىلىققا الىنعان.
− كىتاپتىڭ قازاق تىلىنە اۋدارىلۋى مەملەكەت باسشىسىنىڭ ۇزدىك زاماناۋي ادەبيەتتەردى قازاق تىلىنە ءتارجىمالاۋ تۋرالى تاپسىرماسىنا سايكەسىپ تۇر. سونداي-اق, ەلىمىزدە جۇرگىزىلىپ جاتقان ءۇشىنشى جاڭعىرتۋ اياسىندا كىتاپ ۇلكەن سۇرانىسقا يە بولادى دەپ ەسەپتەيمىن, – دەدى شارادا ءسوز العان تۇڭعىش پرەزيدەنت – ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ ديرەكتورى ەرجان سالتىباەۆ. ول سونداي-اق, وسى ەڭبەكتە سي ءتسزينپيننىڭ ساياسي فيلوسوفياسى, قىتاي حالىق رەسپۋبليكاسىنىڭ ىشكى جانە سىرتقى ساياساتى دامۋىنىڭ نەگىزگى ستراتەگيالىق باعىتتارى انىقتالىپ جازىلعانىن اتاپ ءوتتى.
قحر مەملەكەتتىك كەڭەسى ءباسپاسوز كەڭسەسىنىڭ جاھاندىق كوممۋنيكاتسيا بيۋروسى ديرەكتورىنىڭ ورىنباسارى تۋو جەن كىتاپتى ءوزى قىزمەت ەتەتىن مەكەمەنىڭ قۇراستىرعانىن, ال, قحر ازشىلىق ۇلتتار باسپا ءۇيى قازاق تىلىنە اۋدارعانىن ايتا كەلە, كىتاپقا قىتاي باسشىسىنىڭ 70-تەن استام نەگىزگى ماقالالارى, باياندامالارى, لەكتسيالارى, ءتۇرلى شارالاردا سويلەگەن سوزدەرى مەن 40-تان استام فوتوسۋرەت توپتاستىرىلعانىن جەتكىزدى.
ايگۇل سەيىلوۆا,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»
