ۇندەۋدە قامچىبەك تاشيەۆ قىزمەتتەن بوساتىلۋى وزىنە «كۇتپەگەن جاعداي» بولعانىن اتاپ وتەدى. ايتۋىنشا, ول بۇعان دەيىن جاسالعان وپەراتسيادان كەيىن تەكسەرۋدەن ءوتۋ ءۇشىن پرەزيدەنتتىڭ رۇقساتىمەن شەتەلگە شىققان. سول ۋاقىتتا قابىلدانعان شەشىم توسىن بولعانىمەن, مەملەكەت باسشىسىنىڭ شەشىمى قانداي جاعدايدا دا ورىندالۋعا ءتيىس ەكەنىن باسا ايتقان.
«مەن مەملەكەتىمىزگە, حالقىمىزعا جانە پرەزيدەنتكە ادال قىزمەت ەتتىم جانە مۇنى ماقتان تۇتامىن. وكىنەتىن ءبىر عانا جايت بار, جەكە قۇراممەن قوشتاسۋعا مۇمكىندىك بەرىلمەدى. مەملەكەتتىك ۇلتتىق قاۋىپسىزدىك كوميتەتىنىڭ ءاربىر قىزمەتكەرىنە العىس ايتىپ, تابىس تىلەيمىن», دەلىنگەن ۇندەۋدە.
سونداي-اق قامچىبەك تاشيەۆ ازاماتتاردى زاڭدى ساقتاۋعا, ارانداتۋشىلىققا جول بەرمەۋگە شاقىرىپ, ەلدەگى تۇراقتىلىق پەن قوعامدىق تىنىشتىقتىڭ ماڭىزىن اتاپ وتكەن.
ەسكە سالساق, بۇعان دەيىن قامچىبەك تاشيەۆ قىرعىز رەسپۋبليكاسىنىڭ مينيسترلەر كابينەتى توراعاسىنىڭ ورىنباسارى جانە مەملەكەتتىك ۇلتتىق قاۋىپسىزدىك كوميتەتىنىڭ توراعاسى قىزمەتتەرىنەن بوساتىلعان ەدى.
