عىلىم جانە جوعارى ءبىلىم مينيسترلىگى وسى سالادا ەڭبەك ەتىپ جۇرگەن ايەلدەر مەن قىزداردى كاسىبي مەرەكەمەن قۇتتىقتادى.
«بۇل كۇن – ايەلدەردىڭ عىلىمي ويدىڭ دامۋىنا, يننوۆاتسيالار مەن ادامزات وركەنيەتىنىڭ ىلگەرىلەۋىنە قوسقان زور ۇلەسىن مويىنداۋدىڭ ايقىن بەلگىسى. بىرىككەن ۇلتتار ۇيىمىنىڭ باس اسسامبلەياسى بەكىتكەن ايەلدەر مەن قىزداردىڭ عىلىمداعى حالىقارالىق كۇنى عىلىم سالاسىنداعى تەڭ مۇمكىندىكتەردىڭ ماڭىزىن ايقىنداپ, جاس قىزداردى زەرتتەۋشىلىك جولدى تاڭداۋعا ىنتالاندىرۋعا باعىتتالعان», دەلىنگەن قۇتتىقتاۋدا.
بۇگىندە ايەلدەر قازاقستاننىڭ عىلىمي الەۋەتىن قالىپتاستىرۋدا شەشۋشى ءرول اتقارىپ وتىر. ەل بويىنشا ماگيستر, PhD دوكتورى, بەيىنى بويىنشا دوكتور, عىلىم كانديداتى نەمەسە عىلىم دوكتورى دارەجەسىنە يە 120 896 مامان بار. سونىڭ 62 433-ءى, ياعني 51,6%-ى – ايەلدەر. بۇل عىلىم-ءبىلىم بەرۋ كەڭىستىگىندە ايەلدەردىڭ بەلسەندى ءارى اۋقىمدى قاتىسۋىن ايعاقتايدى.
جوعارى ءبىلىم بەرۋ جۇيەسىندە دە ايەلدەردىڭ سالماعى باسىم. پروفەسسور-وقىتۋشىلار قۇرامىنداعى ايەلدەردىڭ ۇلەسى 65,7%-عا جەتكەن. ونىڭ ىشىندە:
- ماگيسترلەر – 72,5%;
- فيلوسوفيا دوكتورى (PhD) – 62,8%;
- بەيىنى بويىنشا دوكتورلار – 46,9%;
- عىلىم دوكتورلارى – 49,4%;
- عىلىم كانديداتتارى – 65,1%.
بۇل كورسەتكىشتەر ايەل عالىمداردىڭ كاسىبي دەڭگەيى مەن عىلىمي كەمەلدىگىن ايقىن كورسەتەدى.
ەلىمىزدە عىلىمي زەرتتەۋلەرمەن اينالىساتىن 12 893 ايەل بار. بۇل – عىلىمي قىزمەتكەرلەردىڭ 56%-ى. ايەل زەرتتەۋشىلەردىڭ جالپى زەرتتەۋشىلەر سانىنداعى ۇلەسى 55,7%-دى قۇرايدى. ولار ىرگەلى زەرتتەۋلەردەن باستاپ قولدانبالى جانە پانارالىق جوبالارعا دەيىنگى كەڭ اۋقىمدى باعىتتاردا ناتيجەلى ەڭبەك ەتىپ ءجۇر.
سالالار بويىنشا العاندا, ايەلدەردىڭ ەڭ جوعارى ۇلەسى جاراتىلىستانۋ عىلىمدارىندا – 3 625 ادام نەمەسە 28%. ينجەنەرلىك ازىرلەمەلەر مەن تەحنولوگيالار سالاسىندا 2 625 ايەل (20%), گۋمانيتارلىق عىلىمداردا 2 471 ايەل (19%) قىزمەت ەتەدى. جالپى, گۋمانيتارلىق عىلىمداردا ايەلدەردىڭ ۇلەسى 66%-عا, الەۋمەتتىك عىلىمداردا 65%-عا جەتكەن.
عىلىمي بىلىكتىلىك دەڭگەيى تۇرعىسىنان دا ايەل عالىمداردىڭ كورسەتكىشى جوعارى. عىلىم كانديداتى دارەجەسىندە – 60%, بەيىنى بويىنشا دوكتور جانە ماگيستر دارەجەسىندە – 58%, فيلوسوفيا دوكتورى (PhD) دارەجەسىندە – 54%. اسىرەسە مەديتسينا مەن گۋمانيتارلىق عىلىمدار سالاسىندا ايەل عىلىم كانديداتتارىنىڭ ۇلەسى 72%-دى قۇراپ وتىر.
