قازاقتىڭ باسى – اباي, جۇرەگى – مۇقاعالي. بۇل – اكسيوما!
* * *
الەمدە جۇرەكتى زەرتتەپ زەردەلەگەن جالعىز-اق عالىم بار. ول – مۇقاعالي ماقاتاەۆ!
* * *
ءبىزدىڭ حالقىمىز بەيبىت ومىرگە شولدەپ تۋعان. ءالى دە شولدەپ كەلەمىز. ماڭگىلىك شولدەي بەرەمىز.
* * *
مۇحاممەد س.ءا.س پايعامباردان قالعان وسيەت بار: «ب ۇلىك شىققان جەرگە جولاماڭدار». سەبەبى, وندا ساسىق ءيىس بار. دوكىر ءيىس قاندى بۇزادى, اقىل-ەستى تۇمشالاپ, جۇرەكتى قابادى.
* * *
ۇلىلىق كىشىرەيۋدەن باستالادى.
* * *
رەنجىمەڭىزدەر! ەرسىلەۋ ءسوز, ارينە. زامان كۇيلەيدى. سودان دا مىڭ-مىڭ قۇبىلادى. قازىرگىنىڭ زامانى – قىسقا دا نۇسقا. سان ەمەس, ساپا.
* * *
كەش − ەسكىلىك. تاڭ – جاڭالىق. ءتۇس – قۇبىلۋ.
* * *
اقىلعا سىيماعان جۇرەككە سيادى.
* * *
ءوزىڭدى وزگەلەر جۇتىپ قويماس ءۇشىن ءوزىڭدى ءوزىڭ جەۋدى ۇيرەن.
* * *
ۇلىلار ىلعي دا كولەڭكەنى سايالاي بەرەدى. ال داڭعويلار بولسا جارىققا ۇمتىلۋمەن بولادى. سەبەبى, ۇلىلاردىڭ ءىشى – جاپ-جارىق, داڭعويلاردىڭ ءىشى – قاراڭعى.
* * *
ءسوزدىڭ قۇدىرەتى: «قۇدايدان قورىقپاعاننان قورىق».
* * *
جانى بۇزىق ءبىر باسقا. قانى بۇزىق ءبىر باسقا. جانى بۇزىق باستاۋىنا قايتىپ ورالادى, ال قانى بۇزىق كەلمەسكە كەتەدى. قانى بۇزىقتاردان ساقتانۋ كەرەك.
ساعات ىرىس-داۋلەت
