ءداستۇرلى شارانىڭ باستى ماقساتى – ەۋروپالىق كلاسسيكتەر تۋىندىلارىنىڭ ۇزدىك ۇلگىلەرىن ناسيحاتتاۋ. جيىلعان قاۋىم الدىمەن ەۋرووداق قارجىلاندىراتىن جاسىل ەكونوميكا, ادام قۇقىقتارى, تۋريزم مەن ءبىلىم بەرۋ سىندى جوبالاردىڭ جەتىستىكتەرى مەن ناتيجەلەرىن كورسەتەتىن جارمەڭكەمەن تانىستى.
...ەرەكشە ساۋلەتىمەن كوز تارتار تەاتر بۇگىندە ونەرسۇيەر قاۋىمنىڭ ات باسىن ءجيى بۇراتىن ورنىنا اينالعان. اسىرەسە, شەتەلدىك قوناقتار مۇندا ءجيى كەلەدى. بۇگىن دە تەاترعا اعىلىپ جاتقان قاۋىم اراسىندا قازاق تا, باسقا ۇلت تا, شەتەلدىكتەر دە كوپ. ء تىلى بولەك, ءتۇرى باسقا بولعانمەن, ونەر دەگەن سيقىرلى كۇش جيناعان جاندار XVII-XIX عاسىرلاردا قالىپتاسقان باتىس ەۋروپانىڭ كلاسسيكالىق مۋزىكاسىمەن سۋسىنداماق.
ساحنا تورىندە ەۋروپالىق وداق پەن قازاقستان رەسپۋبليكاسىنىڭ ءانۇراندارى قالىقتاپ, قازاقستانداعى ەۋرووداق وكىلدىگىنىڭ باسشىسى ترايان حريستەا مەن سىرتقى ىستەر ءمينيسترىنىڭ ورىنباسارى رومان ۆاسيلەنكو كوپشىلىكتى ەۋروپا كۇنىمەن قۇتتىقتادى.
...ساحنادا – استانا قالاسى مەملەكەتتىك اكادەميالىق فيلارمونياسىنىڭ سيمفونيالىق وركەسترى. ديريجەردىڭ بۇيرىعىن باعىپ وتىر. زال سىلتىدەي تىنعان... كونتسەرتتىڭ شىمىلدىعى گرەك كومپوزيتورى نيكوس سكالكوتاستىڭ مۋزىكالىق تۋىندىسىمەن ءتۇرىلدى. زال ىشىندە شىبىننىڭ ىزىڭى ەستىلەتىندەي تىنىشتىق, مىڭ ءتۇرلى سازدى ءۇن اۋەزى جاندى باۋراعان عاجاپ مۋزىكا قۇدىرەتىنە ەلتىگەن كوپشىلىك الەم مادەنيەتىنىڭ كلاسسيكالىق تۋىندىلارىن بىرىنەن سوڭ ءبىرىن تىڭداپ, ەكى ساعات ۋاقىتتىڭ قالاي وتە شىققانىن اڭداماعانداي. تۇلا بويدى شىمىرلاتىپ, الپىس ەكى تامىرىڭدى يدىرەتىن كلاسسيكالىق كومپوزيتورلاردىڭ شىعارمالارى بىرىنەن سوڭ ءبىرى قالىقتادى. پيت حەين, پانچو ۆلاديگەروۆ, فەرەنتس ءليستتىڭ راپسوديالارىمەن ەلىتكەن وركەستر ەميلس دارزينش, سەباستيان باح, سەزار فرانك, يوگانن شتراۋستىڭ كوركەم تۋىندىلارى قازاق استاناسىندا قالىقتادى.
كونتسەرت سوڭىن ايتقالي جايىموۆتىڭ «ەرەۋىل اتقا ەر سالماي» تۋىندىسىمەن اياقتاعان ونەرپازدارعا كورەرمەن تىك تۇرىپ قوشەمەت كورسەتتى...
جانسايا شىڭعىسحانقىزى
