«وتكەن حح عاسىردا حالقىمىز اسا اۋىر قاسىرەتكە تولى كەزەڭدى باسىنان كەشىرگەنىن بارشاڭىز جاقسى بىلەسىزدەر. قازاقستانداعى كۇشتەپ ۇجىمداستىرۋ ارقىلى كەلگەن اشارشىلىقتىڭ اۋىر زاردابىن كوردى. اشارشىلىقتان ەس جينالماي جاتىپ, ستاليندىك قاندى تەررور مەن جاپپاي رەپرەسسيانىڭ قاسىرەتى ءتوندى. مىڭداعان قانداستارىمىز جازىقسىز جازالاندى. ايداۋعا ءتۇسىپ, سىبىرگە جەر اۋدارىلدى. زۇلماتتى جىلدارى 103 مىڭ ادام قۋعىن-سۇرگىنگە ۇشىراپ, ولاردىڭ 25 مىڭنان استامى اتىلعان. ولاردىڭ اراسىندا قازاق حالقىنىڭ كورنەكتى پەرزەنتتەرى شاكارىم قۇدايبەردى ۇلى, احمەت بايتۇرسىنوۆ, مىرجاقىپ دۋلاتوۆ, مۇحامەدجان تىنىشپاەۆ, ماعجان جۇماباەۆ, سانجار اسفەندياروۆ, وراز جاندوسوۆ, تۇرار رىسقۇلوۆ, ساكەن سەيفۋللين, ءىلياس جانسۇگىروۆ, بەيىمبەت مايلين جانە باسقا دا كوپتەگەن ساڭلاقتارىمىز بار. تاۋەلسىزدىك تاڭىمەن بىرگە جازىقسىز جازالانعان ارىستارىمىزدى اقتاۋ ءداۋىرى باستالدى. ەلباسىنىڭ باستاماسىمەن مۇراعات ماتەريالدارى اشىلىپ, قۋعىن-سۇرگىن قۇرباندارىنىڭ ءتىزىمى انىقتالۋدا», دەدى اكىم.
قىزىل قىرعىن زاردابى اۋليەاتا ءوڭىرىن دە جالىنداي شارپىعانى تاريحتان بەلگىلى. «حالىق جاۋى» دەگەن جالعان جالامەن وبلىستىڭ 5 مىڭنان استام تۇرعىنى جازالاۋعا ۇشىراپ, 845 ادام جازىقسىز اتىلىپ كەتكەن. ولاردىڭ قاتارىندا قابىلبەك سارىمولداەۆ, سىدىق ابلانوۆ, ءاشىر بۇركىتباەۆ سياقتى ەل ارداقتىلارى دا بولعان.
سونداي-اق, شارا بارىسىندا ساياسي قۋعىن-سۇرگىن جانە اشارشىلىق قۇرباندارىنىڭ ۇرپاعى, م.ح.دۋلاتي اتىنداعى تاراز مەملەكەتتىك ۋنيۆەرسيتەتى شەت تىلدەر كافەدراسىنىڭ اعا وقىتۋشىسى ليديا كيم ءسوز الىپ, قاسىرەتتى كەزەڭ تۋرالى پىكىر ءبىلدىردى. جازىقسىز جاپا شەككەندەردى ەسكە الدى. ال تارازدىق جاس اقىن نۇربولات جولداسبەك قۇرباندارعا ارنالعان ولەڭىن وقىدى.
بۇدان كەيىن تاراز قالاسىنداعى داڭقتى مەرگەن ىبىرايىم سۇلەيمەنوۆ كوشەسىنىڭ بويىندا ساياسي قۋعىن-سۇرگىن جانە اشارشىلىق قۇرباندارىنا ارنالعان ەسكەرتكىشكە گۇل شوقتارى قويىلدى. وعان وبلىس اكىمى باستاعان جەرگىلىكتى باسشىلار مەن قالا جاستارى قاتىستى.
سونداي-اق, وسى كۇنى تۇرار رىسقۇلوۆ ەسكەرتكىشىنە دە گۇل شوقتارىن قويۋ ءراسىمى ءوتتى. جينالعان كوپشىلىك ساياسي قۋعىن-سۇرگىن جانە اشارشىلىق قۇرباندارىن ۇنسىزدىكپەن ەسكە الىپ, رۋحتارىنا تاعزىم ەتتى.
حاميت ەسامان,
«ەگەمەن قازاقستان»
