دۇنيەجۇزىلىك ەكونوميكالىق فورۋمنىڭ دەرەگى بويىنشا, 2016 جىلى پارلامەنتتەگى ايەل دەپۋتاتتارىنىڭ سانى بويىنشا, قازاقستان دۇنيەجۇزىندەگى 144 مەملەكەتتىڭ اراسىندا 48-ورىنعا شىققان ەكەن. قازاقستانداعى شاعىن جانە ورتا بيزنەس نىساندارىنىڭ 44 پايىزىن ايەلدەر باسقارادى, جالپى وسى سالانىڭ تەڭ جارىمى نازىك جانداردىڭ قولىندا.
جوعارىداعى سەمينار-ترەنينگتىڭ ماقساتى – الەۋمەتتىك ساياساتتى جانە جەرگىلىكتى ءوزىن-ءوزى باسقارۋ ورگاندارىنىڭ جۇمىسىن جەتىلدىرۋدە گەندەرلىك اسپەكتىلەردى قولدانۋدىڭ كەشەندى تاسىلدەرىن ۇيرەتۋ. شاراعا ءارتۇرلى دەڭگەيدەگى ءماسليحات دەپۋتاتتارى, اۋىلدىق وكرۋگ اكىمدەرى مەن اۋدان اكىمدەرىنىڭ ورىنباسارلارى قاتىستى. سەمينار-ترەنينگكە بىلىكتى تاۋەلسىز ساراپشىلار مەن كەڭەسشىلەر جەتەكشىلىك ەتتى.
سەمينار-ترەنينگكە ۇلتتىق كوميسسيا ءتورايىمىنىڭ قوس ورىنباسارى ەلەنا تاراسەنكو مەن ءلاززات سۇلەيمەن مودەراتورلىق ەتتى. سونىمەن قاتار, شاراعا استاناداعى ەقىۇ باعدارلامالار كەڭسەسى ادامي ولشەم ءبولىمىنىڭ مەڭگەرۋشىسى يزابەلا حارتمان قاتىستى.
سەمينارعا قاتىسۋشىلار ەلىمىزدە دەموكراتيالىق قوعام ورناپ, گەندەرلىك تەڭدىك ماسەلەلەرى ساقتالىپ وتىرعانىن, قازاقستان رەسپۋبليكاسى بۇۇ-نىڭ گەندەرلىك ساياسات سالاسىنداعى نەگىزگى قۇجاتتارىنا قوسىلعانىن اتاپ ءوتتى. ەلىمىزدە قازاقستان رەسپۋبليكاسى پرەزيدەنتى ن.نازارباەۆتىڭ جارلىعىمەن قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى بەكىتىلگەن. قىز بالانى, ايەل-انانى ەرەكشە سىيلايتىن ءداستۇرلى ءۇردىسى بار قازاق قوعامىندا گەندەرلىك ساياسات زاماناۋي رەڭكپەن جۇزەگە اسۋدا. بۇل وڭ ءۇردىس باتىس قازاقستان وبلىسىندا دا ايقىن كورىنىس تاپقان: ءوڭىر بويىنشا ايەلدەردىڭ بارلىق دەڭگەيدەگى ماسليحاتتارداعى ۇلەسى 26%-دى قۇرايدى, ال اقجايىق پەن ءبورلى اۋدانىندا تيىسىنشە 46% جانە 38% بولعان. ءلاززات سۇلەيمەن ايەل باقىتى, وتباسىلىق داستۇرلەردىڭ ساقتالۋى قوعامدا مورالدىق قۇندىلىقتىڭ ساقتالۋىنا ىقپال ەتەتىنىن ەرەكشە ايتتى.
سەمينار اياسىندا ۇلتتىق كوميسسيا ءتورايىمىنىڭ ورىنباسارلارى وبلىس اكىمى ا.كولگىنوۆپەن نان ونىمدەرىن شىعاراتىن «بالزيا» جشس جانە «وتدەلستروي» جشس قۇرىلىس كومپانياسى ۇجىمىمەن كەزدەستى. ايتا كەتەرلىگى, بۇل كاسىپورىنداردى نازىك جاندار باسقارىپ, ءوڭىر مەن ەل ەكونوميكاسىنىڭ دامۋىنا ۇلكەن ۇلەس قوسىپ كەلەدى.
قازبەك قۇتتىمۇرات ۇلى,
«ەگەمەن قازاقستان»
ورال
سۋرەتتى تۇسىرگەن
تەمىربولات توقمامبەتوۆ
