ەلباسىمىز «حالقىمىزدىڭ الەۋمەتتىك جاعدايىن دامىتىپ, ازاماتتاردىڭ باقۋاتتىلىعىن ارتتىرۋمەن بىرگە, مەملەكەتتىڭ ىرگەتاسى – بەرىك وتباسى, ۇلگىلى شاڭىراقتان باستالاتىنىن» قاداپ ايتقان بولاتىن. مەملەكەت باسشىسىنىڭ باستاماسىمەن بيىل ەلىمىزدە «مەرەيلى وتباسى» ۇلتتىق بايقاۋى ءتورتىنشى رەت وتكىزىلىپ وتىر.
«مەرەيلى وتباسى» ۇلتتىق بايقاۋىنىڭ ماقساتى ءبىر شاڭىراق استىندا بەرەكەلى ءومىر ءسۇرۋدىڭ ماڭىزدىلىعىن ارتتىرۋ, وتباسىلىق ءومىر سالتى, اتا-انالىق پارىز, جاۋاپكەرشىلىك سەكىلدى ۇعىمداردى ەل ساناسىنا ءسىڭىرۋ, اسىرەسە, جاستارعا جەتكىزۋ, جاراسىمدى وتباسى قۇندىلىعىن كەڭىنەن ناسيحاتتاۋ بولىپ تابىلادى.
«مەرەيلى وتباسى» ۇلتتىق بايقاۋى ءۇش كەزەڭدە ءوتتى. «مەرەيلى وتباسى» ۇلتتىق كونكۋرسىنىڭ وبلىستىق كەزەڭىنە اۋدان, قالالاردان وتىزدان استام ۇمىتكەر وتباسىلار قاتىستى. «مەرەيلى وتباسى-2017» ۇلتتىق بايقاۋىنىڭ وبلىستىق كەزەڭىنىڭ جەڭىمپازى اتانعان ەكى وتباسى شىمكەنت قالاسىنان كانالباي سەيىلبەك ۇلىنىڭ جانە ورداباسى اۋدانى وماش شاپاەۆتىڭ وتباسىنا استانا قالاسىندا وتەتىن رەسپۋبليكالىق بايقاۋعا جولداما جانە وبلىس اكىمىنىڭ ديپلومى مەن قارجىلاي سىيلىق تاپسىرىلدى. قالعان جيىرما سەگىز وتباسىنا باعالى سىيلىقتار مەن وبلىس اكىمىنىڭ العىس حاتى بەرىلدى.
باس جۇلدە العان سەيىلبەك ۇلى كانالباي وتباسى تۋرالى ايتار بولساق, ەڭبەك ارداگەرى, زەينەتكەر. قازاق تەاترىنىڭ دامۋىنا سۇبەلى ۇلەس قوسىپ, انشىلىك, ايتىس, جىرشىلىق, سۋىرپسالما اقىندىق ونەرىمەن ەلگە تانىلعان مادەنيەتتانۋشى.
ك.سەيىلبەك ۇلى 1964 جىلى ماسكەۋدە وتكەن بۇكىلوداقتىق فەستيۆالدە ع.مۇسىرەپوۆتىڭ «قىز جىبەك» سپەكتاكلىندە شەگەنىڭ, 1967 جىلى سامارقان قالاسىندا وتكەن بۇكىلوداقتىق حالىق تەاترى بايقاۋىندا ب.ءمايليننىڭ «جالبىر» سپەكتاكلىندە قايراقبايدىڭ وبرازدارىن ۇلكەن شەبەرلىكپەن ورىنداپ, لاۋرەات اتانعان. ك.سەيىلبەك ۇلى اقان سەرىنىڭ, ءبىرجان سالدىڭ, ع.قۇرمانعاليەۆ اندەرىن, بازار جىراۋ, مايلىقوجا ءبيدىڭ تەرمەلەرىن حالىق اراسىندا ناسيحاتتاپ كەلەدى. ماقتاارال اۋدانىنىڭ قۇرمەتتى ازاماتى 5 ۇل جانە 4 قىزدان 40 نەمەرە 18 شوبەرە تاربيەلەپ كەلەدى.
وتاندى ءسۇيۋ, ونىڭ وركەندەۋىنە جان-جۇرەگىڭمەن قىزمەت ەتۋ ءار وتباسىنىڭ وزىنەن, ىشكى مادەنيەتىنەن باستالادى. جايشىلىقتا «مەن وتانىمدى سۇيەمىن, كەرەك بولسا جانىمدى بەرۋگە بارمىن» دەگەندى كوپ جۇرت قىزىل سوزگە بالايدى. ونىڭ سەبەبى, ەشكىم جان سۇرامايتىندىقتان وسىلاي ايتىپ ۇيرەنگەندەر دە بار. ايتۋ كەرەك بولدى, ايتتى. كوزگە ءتۇسۋ كەرەك بولدى, ءتۇستى. قاي جاعىنان دا ۇپاي تۇگەل.
«مەرەيلى وتباسى» بايقاۋىندا وبلىس اكىمىنىڭ ورىنباسارى ۇلاسبەك سادىبەكوۆ ءبىر جايتتى ايتقان. ونشاقتى جىل بۇرىنعى كەپ. ۇلاسبەك سادىبەكوۆ ول كەزدە وبلىستىڭ ىشكى ساياسات باسقارماسىنىڭ باسشىسى. شاردارا اۋدانىندا يدەولوگيا تاقىرىبىندا كەلەلى جيىن ءجۇرىپ جاتىر. سوزگە الدىن الا جازىلىپ قويعاندار بىرىنەن سوڭ ءبىرى تاۋ سۋىنداي اعىتىلادى. «مەن وتانىمدى سۇيەمىن. بارلىق قيىندىعىنا دايىنمىن». جيىن ورتاسىندا ءبىر كەيۋانا ءسوز سۇراپتى. ءبارى اڭ-تاڭ. كەمپىردىڭ جالىندى پاتريوتتىق سوزدەر ايتپايتىنى انىق. سوندا نە ايتپاق؟!
ايتىپتى. 75-تەگى كەيۋانا. «سەندەردىڭ سوزدەرىڭدى باعانادان بەرى تىڭداپ وتىرىپ, ايتارلىقتاي ۇلكەن قىزمەتىمىز جوق ءبىز وتانىمىزعا نە بەرەمىز دەگەن ويدا بولىپ, جاۋابىن تاپتىم. بىرىنشىدەن, ايەل-انا ءوز وتباسىنىڭ ۇيىتقىسى بولىپ, ومىرگە ۇرپاق اكەلۋى كەرەك ەكەن. ەكىنشىدەن, وتباسى, وشاق-قاسىڭدى اۋلاڭدى تازا ۇستاپ وزگەلەرگە ونەگە بولۋ كەرەك. ۇشىنشىدەن, قۇداي قوسقان كورشىڭمەن تاتۋ-ءتاتتى بولىپ, ەلدىڭ تىنىشتىعىنا, بىرلىگىنە قىزمەت ەتۋ كەرەك. بۇل جۇمىستار ءبىزدىڭ قولىمىزدان كەلەدى».
ايتقان ءسوزىنىڭ توقەتەرى وسى. جانى بار ءسوز. كوبىك ءسوزدى كوپىرتكەننەن وسى ءۇش وتباسىلىق قىزمەتتىڭ ۇشىعىنا جەتە الساڭ وتانىڭنىڭ تۇتاتقان وتىنىڭ ءتۇتىنى ءتۇزۋ شىعارىنا سەنە بەر. وسى پىكىردىڭ جالعاسىن جۇزدەن جۇيرىك, مىڭنان تۇلپاردى ماراپاتتاعان جيىننان سوڭ استاناداعى بايقاۋعا جولداما العان شاڭىراقتىڭ يەسى كانالباي سەيىلبەك ۇلىنا جۇبايى تۇرعان سەيىلبەكوۆا اپايدان ەستىدىك.
– ەلباسىمىز قازاقستان بۇگىنگىسىنەن دە قۋاتتى, بۇگىنگىسىنەن دە مىقتى مەملەكەت بولسا دەپ ارمانداپ, مەملەكەتتىك باعدارلامالار جاساپ جاتىر. الەمدەگى وزىق 30 ەلدىڭ قاتارىنا كىرۋ ءۇشىن ەكونوميكالىق ءوسىمنىڭ وسكەنى ماڭىزدى بولعانىمەن وتانىمىز ادام رەسۋرسىمەن, وسكەلەڭ ۇرپاقپەن مىڭ جاساۋى كەرەك دەپ ويلايمىن. ەركەك ءۇيدىڭ ەگەسى بولعاندا, ايەل – شەگەسى. وكىنىشكە قاراي, ۇيلەنە سالىپ اجىراساتىندار كوبەيىپ بارادى. بۇل – ۇلكەن ىندەت. وتباسىن قۇردىڭ با, ەڭ الدىمەن سابيلەرىڭنىڭ باقىتىن ويلا, تەسىك وكپە ەتپە. ول ءۇشىن ۇلتتىق قۇندىلىقتارى, سالت-داستۇرلەرمىزدى, مادەنيەتىمىزدى ساقتاۋىمىز كەرەك. اتا-بابا مۇراسىنا ادالدىق تانىتقان جاعدايدا قازاق وتباسىلارى باقىتقا جەتەدى. ايەل اناعا ەڭ الدىمەن شاڭىراقتىڭ تىنىشتىعىن ويلاۋ كەرەك, – دەدى ول.
ەستى ءسوز. ءبىر قولىمەن بەسىك, ءبىر قولىمەن الەمدى تەربەتكەن انالار تاربيەسى – ۇلتتىڭ كەلەشەگى. «مەرەيلى وتباسى» ۇلتتىق بايقاۋىنىڭ ءتۇيىنى وسىنداي ۇلتتىق قۇندىلىقتارعا ارقا تىرەيدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
