مىنە, سول قازتالوۆ جۇرتشىلىعى كسرو حالىق ءارتىسى حاديشا بوكەەۆانىڭ 100 جىلدىعىن اتاپ وتۋدە.
مەرەيتويلىق سالتاناتتىڭ شىمىلدىعى اۋداندىق مادەنيەت ءۇيىنىڭ الدىنا ورناتىلعان ح.بوكەەۆانىڭ ءمۇسىنىن اشۋمەن باستالدى. وسى شارا بارىسىندا قازتالوۆ اۋدانىنىڭ اكىمى نۇرلان بەكقايىر مەرەيتوي مەيماندارىنا قازاقى قوناقجايلىقپەن «قوش كەلدىڭىز!» ايتىپ, كورنەكتى تۇلعانىڭ 100 جىلدىعىن اتاپ وتۋگە زور جاۋاپكەرشىلىكپەن قاراپ, ۇيىمشىلدىق تانىتقان جەرلەستەرىنە ريزاشىلىعىن ءبىلدىردى. ال قازاقستاننىڭ حالىق ءارتىسى قۇمان تاستانبەكوۆ: «ماڭگىلىك قازاق ەلىنىڭ الەمگە تانىلۋىندا حالقىمىزدىڭ ونەرى مەن مادەنيەتى زور ءمان-ماڭىزعا يە ەكەندىگىن ەسكەرسەك, حاديشا اپامىزدىڭ ءومىرى مەن ونەر جولىنان مول عيبرات الۋعا ءتيىسپىز», دەدى.
سالتاناتتى راسىمنەن كەيىن جينالعان كوپشىلىك حاديشا بوكەەۆاعا ارنالعان كورمەمەن تانىسىپ, «وزگەلەردى دارىنىمەن تامساندىرعان» اتتى دەرەكتى ءفيلمدى تاماشالادى.
ەل ارداگەرلەرى جايساڭ اقباي, مۇلحايدار امىرەەۆ جانە ونەر تارلانى مەرۋەرت وتەكەشوۆا, جازۋشى سارا لاتيەۆا ەستەلىكتەر تيەگىن اعىتتى. سونىمەن قاتار, اۋداننىڭ مادەنيەت قىزمەتكەرلەرى حاديشا بوكەەۆا ورىنداعان رولدەردى ساحناعا قايتا شىعارسا, مەرەيتويعا ارنايى كەلگەن استانالىق وپەرا ءانشىسى ايزادا قاپونوۆا, سول سەكىلدى اقمارال احمەتوۆا, ايبار قايىرحانوۆ, نۇرجان تاسبولاتوۆ, البەرت عازيزجانوۆ, ەرنار ءومىرالى سىندى ءوڭىرىمىزدىڭ ونەر شەبەرلەرى اننەن شاشۋ شاشتى.
ۇلتىمىزدىڭ ارداقتى قىزى حاديشا بوكەەۆانىڭ عاسىرلىق مەرەيتويى بايگە, اۋدارىسپاق, قىز قۋ, كوكپار سىقىلدى حالىقتىق سپورت تۇرلەرىنە ۇلاستى. ۇلتتىق ويىندارعا رەسەيدەن, اتىراۋ مەن ماڭعىستاۋ وبلىستارىنان كەلگەن سپورتشىلارعا قوسا, اقجايىق, جاڭاقالا, بوكەي ورداسى, جانىبەك, سىرىم جانە شىڭعىرلاۋ اۋداندارىنىڭ وكىلدەرى دە قاتىستى.
سارا لاتيەۆا, «الاش» سىيلىعىنىڭ يەگەرى, جازۋشى:
– حاديشا اپامەن اڭگىمەلەسە قالعاندا, ونەرىنەن گورى, ءومىرى تۋرالى كوبىرەك ايتاتىن. ونىڭ سەبەبى, ونەرى حالىق الدىندا, ال جەكە ءومىرى تۋرالى بىلايعى جۇرتشىلىق بىلە بەرمەيدى عوي. مەن ول كىسى تۋرالى جازعان كىتابىمدا جەكە ومىرىنە كوبىرەك توقتالدىم. بۇل كۇندەرى وبلىس, اۋدان باسشىلىعى ۇيىتقى بولىپ, ساحنا ونەرىنىڭ سونبەس جۇلدىزىنا اينالعان تۇلعانىڭ ونەر جولىن جۇرت جادىندا جاڭعىرتۋدا. سونداي-اق, باتىس قازاقستان وبلىستىق قازاق دراما تەاترىنا حاديشا بوكەەۆا ەسىمىنىڭ بەرىلۋى دە جايىق جۇرتىنىڭ ونىڭ ونەرىن اسقاق باعالاعانى دەپ تۇسىنەمىن.
ءمولدىر انۋاربەك,
قايرات جاقىپ
باتىس قازاقستان وبلىسى,
قازتالوۆ اۋدانى
