دارىندى, تالانتتى جاستىڭ بۇلاق كوزىن اشاتىن ەلىمىزدەگى ەڭ ءىرى جوباعا قىزىلوردا وبلىسىنان جۇزدەن اسا تالاپكەر قاتىسىپ, باعىن سىنادى.
سوڭعى قوڭىراۋدىڭ ەستىلەر كۇنى اقمەشىتتەگى اسقار توقماعامبەتوۆ اتىنداعى مادەنيەت ءۇيىنىڭ ءىشى بالانىڭ شات كۇلكىسىنە تولىپ كەتتى. سارايدىڭ ءار جەرىندە تاماعىن كەنەپ ءان سالىپ, اۋەندى قۇبىلتا شىرقاعان داۋىستان قۇلاق تۇنادى. بارلىق بالا قوبالجۋلى. ويتكەنى قازىر ساحناعا كوتەرىلەدى. سونىڭ قورتىندىسى بويىنشا رەسپۋبليكاداعى ماڭدايالدى بايقاۋدىڭ فينالىنا ءوتىپ, باعىن سىنايدى. ونەرپازدى ۇلكەن ساحناعا شىعارىپ, ەسترادا جۇلدىزدارىمەن بىرگە ءان شىرقاۋعا جول اشاتىن وسىنداي بايقاۋدىڭ الدىندا بالا جۇرەگىنىڭ اتقاقتاماۋى مۇمكىن ەمەس ەدى.
سىردىڭ بويىن جايلاي جاتقان سۇلەيلەر ەلىندە نەبىر تالانتتى بالالار بار. ولاردى تەك كورۋ كەرەك. ال «بالا داۋىسى» وسىنداي ورەندەردىڭ باعىن اشاتىن بايقاۋ. قازاقستاننىڭ 16 قالاسىندا ءوتىپ, ەڭ سوڭىندا كىل مىقتىنىڭ اراسىنان شىن مىقتىنى انىقتايتىن سايىستىڭ وزگەلەردەن ءباسى جوعارى. ءاليا نازارباەۆا جەتەكشىلىك ەتەتىن «جاندانۋ الەمى» قورىنىڭ باستاماسىمەن ومىرگە كەلىپ, بۇگىندە ەل اراسىندا ۇلكەن قولداۋعا يە بولىپ وتىرعان بايقاۋعا ارال مەن جاڭاقورعاننىڭ اراسىن ەنشىلەپ جاتقان ەلدىڭ ونەرگە ىنتىق بارشا جاستارى قاتىستى دەسەك تە بولاتىنداي. ايتپاقشى, «بالا داۋىسى» الدىنا ەشقانداي كوممەرتسيالىق ماقسات قويماعان جوبا. ياعني, بالالاردىڭ ۇستىنەن اقشا تاۋىپ, جىرعاپ قالۋدى مۇرات تۇتپايدى. قايتا بالالار شىعارماشىلىعىن دامىتىپ, ولارعا بارىنشا قولداۋ ءبىلدىرىپ, مۋزىكالىق ءبىلىم الۋىنا كەڭ ءورىس اشۋدى كوزدەيدى.
سونىمەن, قىزىلوردادا وتكەن بايقاۋدا نازەركە ءشامبىلوۆا جەڭىسكە جەتتى. 12 جاستاعى نازەركە جارىسقا بايقوڭىر قالاسىنىڭ اتىنان قاتىسقان. 7 جاسىنان باستاپ ۆوكالمەن اينالىسقان. سوڭعى ەكى جىلدا بيمەن دە كاسىبي تۇردە شۇعىلدانا باستاعان. «نازەركەنىڭ ارتىستىك قابىلەتى وتە جوعارى ەكەن. داۋىسى دا ادەمى. وزىندىك مانەرى بار. ءاندى جاقسى سەزىنەدى. ساحنادا ءوزىن ەركىن ۇستايدى. ەندى نازەركە ەكەۋمىزدىڭ ماقساتىمىز دا, ارمانىمىز دا ورتاق. بارلىق كۇش-جىگەرىمىز بەن ءبىلىم-بىلىگىمىزدى قازان ايىندا «الماتى ارەنادا» وتەتىن گراند-فينالدى ۇتۋعا ارنايمىز», دەيدى قىزىلوردالىق ونەرپازدىڭ تالىمگەرى, «الاۋ» توبىنىڭ ءانشىسى اسەت ارىستانبەك.
«جۇزدەن – جۇيرىك, مىڭنان – تۇلپار» شىعۋى زاڭدى دۇنيە. سوندىقتان قىزىلوردالىق ونەرپازدار دا نازەركەنىڭ جەڭىسىنە قۋانىپ, الداعى ۇلكەن جارىستا ساتتىلىك تىلەدى.
ەرجان بايتىلەس,
«ەگەمەن قازاقستان»
قىزىلوردا
