تەاترداعى 90 ءارتىس تۇگەل قامتىلماسا دا, سول ساۋالناما ناتيجەسىندە ەڭ تانىمال ەلۋ اكتەردى تۇزگەن سول ءتىزىمنىڭ ۇشار باسىندا كەيدە ءاسانالى ءاشىموۆ تۇرسا, كەيدە ازامات ساتىبالدى تۇرادى. كورەرمەندەر كوزىمەن بايىپتالعان تانىمالدىلىق تۋرالى اڭگىمەدە كسرو حالىق ءارتىسىنىڭ وزىمەن تەڭ تۇسەتىن جاڭا كەزەڭنىڭ جارقىن وكىلى ازاماتتىڭ ءدال قازىر ابىروي-مارتەبەسىنىڭ اسقاقتاپ تۇرعان شاعى. ونەر الامانىندا ات تەرلەتكەننىڭ بارىنە بايگە بۇيىرا بەرمەيدى, ءبىلىمى مەن ەڭبەگىن سارپ ەتكەنگە عانا ساتتىلىك قولىن سوزادى. تەرىن اعىزىپ, اكتەر اتانعان ازاماتقا دا ساتتىلىك تالايدان بەرى سەرىك بولىپ, ونەر كوشىنىڭ باسىنان كورىنۋگە مۇمكىندىك سىيلاۋمەن كەلەدى.
بويىنداعى تالانتىن تالابىمەن ۇشتاپ, تىنباي ىزدەنىس ۇستىندە جۇرەتىن قازاقستاننىڭ ەڭبەك سىڭىرگەن قايراتكەرى ازامات ساتىبالدى ءۇشىن بيىلعى جىل تابىسپەن باستالدى. تانىمال تەاتر جانە كينو اكتەرى جۋىردا عانا ء«بىر سەن ءۇشىن...» اتتى فيلم ءتۇسىرىپ, رەجيسسەر رەتىندە باعىن سىناپ بايقاسا, ەندى «28 تەاتر» دەپ اتالاتىن ءوزىنىڭ جەكە تەاترىن اشىپ, شىنايى ونەردىڭ تاباندى ىزدەنىسپەن ورىستەيتىنىن ءوز مىسالىمەن دالەلدەۋگە كوشتى. ازاماتتىڭ جەكە تەاتر اشۋى الماتىلىقتار ءۇشىن عانا ەمەس, مادەني ومىردەگى ايتۋلى وقيعا رەتىندە قابىلدانىپ وتىر. قازاقستانداعى 58 تەاتردىڭ قاتارىنا 59-بولىپ قوسىلىپ وتىرعان ازاماتتىڭ جەكە وشاعى «كۇيەۋىڭىزدى ساتىڭىزشى» اتتى كومەديالىق قويىلىممەن الماتىداعى قۋىرشاق تەاترىندا تۇساۋكەسەرىن جاساپ, شىمىلدىعىن اشتى.
قازاق تەاترلارىنىڭ ساحنالارىندا ۇزدىكسىز قويىلىپ كەلە جاتقان م.زادورنوۆتىڭ ايگىلى كومەدياسى «28 تەاتر» ساحناسىندا مۇلدە جاڭاشا ينتەرپرەتاتسيالانۋىمەن نازار اۋدارتتى. وسىنداي قادامدارى ارقىلى ازامات ۇساقتالىپ بارا جاتقان ادام قۇندىلىعىن بيىككە كوتەرىپ, العا شىعارعىسى كەلەتىن ازاماتتىق كوزقاراسىن اڭداتقانداي.
«كۇيەۋىڭىزدى ساتىڭىزشى» – مەنىڭ ەڭ جاقسى كورەتىن سپەكتاكلدەرىمنىڭ ءبىرى. تالاي اۋدارمالاردى قاراستىرا كەلە, ءبىر كەزدە اكەمتەاتردىڭ ساحناسىندا ورازحان كەنەباەۆتىڭ رەجيسسەرلىگىمەن قويىلعان وسى شىعارماعا توقتالىپ, مۇمكىندىگىنشە قازاقى بوياۋ ۇستەمەلەۋگە تىرىستىق», – دەدى ازامات تۇساۋكەسەر راسىمىندە.
قويىلىمنان سوڭ ءسوز العان ا.ساتىبالدىنىڭ «ونەردەگى اكەسى», ۇستازى, پروفەسسور ەسمۇحان وباەۆ اكتەرلەردىڭ قارىمى مەن شەبەرلىگىنە باعاسىن, ال شاكىرتىنە باتاسىن بەرىپ, تەاتر جۇمىسىنا ءسات-ساپار تىلەدى.
ايگۇل احانبايقىزى,
«ەگەمەن قازاقستان»
الماتى
