شاراعا قاتىسۋشىلار ءتورتىنشى وندىرىستىك رەۆوليۋتسيانىڭ كەلەشەگىن, جۇيەلى وزگەرىستەردى, ەكونوميكانى تەحنولوگيالىق جاڭعىرتۋ, سونىمەن بىرگە, كاسىپكەرلىك پەن ادامي كاپيتالدى دامىتۋ ماسەلەلەرىن قوزعادى.
– مەملەكەت باسشىسى نۇرسۇلتان نازارباەۆ ءوزىنىڭ قازاقستان حالقىنا ارناعان جولداۋىندا ەلىمىزدىڭ جاھاندىق باسەكەلەستىگىن قامتاماسىز ەتەتىن ەكونوميكالىق ءوسىمنىڭ جاڭا مودەلىن قۇراستىرۋدى تاپسىرعان بولاتىن. تاۋەلسىزدىك العالى بەرى قازاقستان ەكى بىردەي جاڭعىرتۋ كەزەڭىنەن ءوتتى. بۇل كەزەڭدەردە ەلىمىزدىڭ ساياسي جانە ەكونوميكالىق وركەندەۋىنىڭ نەگىزى قالانعان بولاتىن. ءبىز الەمدەگى باسەكەلەستىككە قابىلەتتى 50 ەلدىڭ قاتارىنا كىردىك. ءۇشىنشى جاڭعىرتۋ – بۇل قازاقستاننىڭ جاھاندىق باسەكەلەستىكتىڭ جاڭا دەڭگەيىنە شىعۋ جولى, – دەدى الەمدىك ەكونوميكا جانە ساياسات ينستيتۋتىنىڭ ديرەكتورى ەرجان سالتىباەۆ.
ونىڭ سوزىنە قاراعاندا, ەكونوميكانى جان-جاقتى تسيفرلاندىرۋ مەن ءتورتىنشى وندىرىستىك رەۆوليۋتسيا ەكونوميكالىق جانە الەۋمەتتىك دامۋداعى جىلدامداتىلعان تەحنولوگيالىق جاڭعىرتۋدىڭ نەگىزگى شارتى بولىپ تابىلادى.
جيىن بارىسىندا عالىمدار مەن ساراپشىلار قازاقستاننىڭ جاھاندىق باسەكەلەستىكتىڭ جوعارى دەڭگەيىنە ءوتۋى مەن ءۇشىنشى جاڭعىرۋدى جۇزەگە اسىرۋعا بايلانىستى پىكىرلەرىن ورتاعا سالا وتىرىپ, ەلىمىزدە اتالعان باعىتتا قولعا الىنعان شارالاردىڭ وڭ ناتيجە كورسەتەتىنىنە سەنىم ءبىلدىردى.
جولدىباي بازار,
«ەگەمەن قازاقستان»
