گۇلشارا ناۋشاقىزى: «قازاقستان ازاماتتىعىن الۋعا جانە ودان شىعۋعا ءوتىنىش بەرۋشىلەردىڭ قۇجاتتارى قۇقىق قورعاۋ ورگاندارىندا الدىن الا ساراپتامادان وتكىزىلدى. قازىرگى تاڭدا ەلىمىزدە جان-جاقتى جاڭعىرۋ رەفورمالارى جۇرگىزىلىپ جاتقانى وزدەرىڭىزگە بەلگىلى. بۇل ماسەلە ەلباسى نۇرسۇلتان نازارباەۆتىڭ ساياسي-ەكونوميكالىق جانە رۋحاني جاڭعىرۋلار جونىندەگى ستراتەگيالىق قۇجاتتارىندا ناقتى كورسەتىلدى», دەي كەلە, قازاقستان ازاماتتىعىن الاتىن ءاربىر ادامنىڭ مەملەكەتتىك داستۇرلەردى, قازاقستاننىڭ قۇندىلىقتارىن تەرەڭ ءبىلۋى, ولاردى قۇرمەت تۇتۋى وتە وزەكتى ماسەلە ەكەنىن جەتكىزدى.
بۇدان كەيىن مەملەكەتتىك حاتشى تاۋەلسىزدىك العان ساتتەن باستاپ قازاقستاننىڭ ازاماتى بولۋعا نيەت ءبىلدىرۋشى ادامدار سانىنىڭ ۇدايى ءوسۋى بايقالاتىنىنا, وسى جىلدار ىشىندە ەلىمىزدىڭ حالىقارالىق بەدەلى ايتارلىقتاي وسكەندىگىنە توقتالا كەلە, بۇل پرەزيدەنت ن.نازارباەۆتىڭ باسشىلىعىنىڭ ارقاسىنداعى ەتنوسارالىق قاتىناستىڭ جوعارى مادەنيەتىن جانە قازاقستاننىڭ الەۋمەتتىك-ەكونوميكالىق, قوعامدىق-ساياسي دامۋىنداعى نىق قادامدارىن ايقىندايتىنىنا نازار اۋداردى.
ءوز سوزىندە گۇلشارا ناۋشاقىزى مەملەكەتتىك رامىزدەر كۇنى قارساڭىندا ەلىمىزدىڭ جاڭا ازماتتارىن قارسى الۋعا ەرەكشە قۋانىشتى ەكەنىن, ولارعا وتانىمىزدىڭ يگىلىگى جولىندا باقىتتى ءومىر جانە تابىستى جۇمىس تىلەيتىنىن ايتتى. سونداي-اق, ەلىمىزدىڭ لايىقتى ازاماتتارى بولا وتىرىپ, ولاردىڭ ەگەمەن قازاقستاننىڭ ودان ءارى دامۋى مەن وركەندەۋىنە ءوز ۇلەستەرىن قوساتىندارىنا سەنىم ءبىلدىردى.
وتىرىستا قازاقستان ازاماتتىعىنا قابىلداۋ جانە ودان شىعۋ ماسەلەلەرى جان-جاقتى قاراستىرىلدى. ەلباسى ءتيىستى جارلىققا قول قويعاننان كەيىن بىزگە جاقىن جانە الىس شەتەلدەردەن كەلگەن ءتۇرلى ەتنوستاردىڭ 640 وكىلى قازاقستاندىق اتاناتىن بولادى.
كوميسسيا وتىرىسىنىڭ قورىتىندىسى بويىنشا ءتيىستى شەشىمدەر مەن ۇسىنىمدار قابىلداندى.
