ونىڭ جۇمىسىنا قازاقستان رەسپۋبليكاسى پارلامەنتى ءماجىلىسىنىڭ توراعاسى ن.نىعماتۋلين, رەسەي فەدەراتسياسى فەدەرالدىق جينالىسى مەملەكەتتىك دۋماسى توراعاسىنىڭ ورىنباسارى ۆ.ۆاسيلەۆ, قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ر.ۆاسيلەنكو, تاجىكستان رەسپۋبليكاسى ءمادجيليسينىڭ كوميتەت توراعاسى د.مادجيدزودا, قىرعىز رەسپۋبليكاسى جوگوركۋ كەنەشىنىڭ دەپۋتاتى م.مادەمينوۆ, اۋعانستان يسلام رەسپۋبليكاسى ۇلتتىق اسسامبلەياسى ۆولەسي دجيرگاسىنىڭ دەپۋتاتى ا.زازاي, قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى, سونداي-اق, حالىقارالىق ساراپشىلار مەن ديپلوماتيالىق كورپۋستىڭ وكىلدەرى قاتىستى.
نۇرلان نىعماتۋلين دوڭگەلەك ۇستەلدە ءسوز سويلەدى. ءوز سوزىندە ءماجىلىس توراعاسى ماڭىزدى جيىندى بىرلەسە ۇيىمداستىرۋعا قولعابىس ەتكەن ۇجىمدىق قاۋىپسىزدىك تۋرالى شارت ۇيىمىنا ريزاشىلىق بىلدىرە كەلىپ, بيىل ۇجىمدىق قاۋىپسىزدىك تۋرالى شارتقا قول قويىلعانىنا 25 جىل, ال پارلامەنتتىك اسسامبلەيانىڭ قۇرىلعانىنا 10 جىل تولىپ وتىرعانىن اتاپ ءوتتى. قازاقستان پرەزيدەنتى – ەلباسى نۇرسۇلتان ءابىش ۇلى نازارباەۆتىڭ تاۋەلسىزدىك العان كۇننەن قاۋىپسىزدىك پەن ىنتىماقتاستىق ماسەلەسىنە ەرەكشە نازار اۋدارىپ كەلە جاتقانىن, بۇگىنگى كۇنى قازاقستاننىڭ ورتالىق ازياداعى ەڭ تۇراقتى, ەڭ قاۋىپسىز ەل ەكەنىن العا تارتقان ن. نىعماتۋلين:
– ەلباسىنىڭ ءىرى باستامالارى تەك ايماقتاردا عانا ەمەس, الەمدىك دەڭگەيدە زور قولداۋعا يە بولدى. سونىڭ ناتيجەسىندە, ءبىزدىڭ ەلدەرىمىز بارلىق سالادا جوعارى ستراتەگيالىق ارىپتەستىك ورناتتى. ونىڭ ىشىندە, ايماقتىق ىنتىماقتاستىق جانە قاۋىپسىزدىك بويىنشا دا ارقاشاندا جەمىستى جۇمىس اتقارىپ كەلەدى. بىراق قازىرگى ۋاقىتتا بۇكىل الەمدە ورىن الىپ جاتقان قاۋىپ-قاتەرلەر وتە كوپ. بۇل ءبىزدىڭ ەلدەرىمىزدەن ارىپتەستىكتى بۇرىنعىدان دا كۇشەيتىپ, بىرلەسە ارەكەت ەتۋدى تالاپ ەتەدى, – دەدى.
توراعانىڭ ايتۋىنشا, وسى جولدا ۇقشۇ پارلامەنتتىك اسسامبلەياسىنا مۇشە ەلدەر پارلامەنتتەرىنىڭ ءرولى وتە زور جانە جۇكتەلىپ وتىرعان جاۋاپكەرشىلىك تە وتە جوعارى.
ەسكە سالا كەتسەك, ۇستىمىزدەگى جىلدىڭ ءبىرىنشى قاڭتارىنان قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە رەسمي تۇردە جۇمىسقا كىرىستى. ءماجىلىس توراعاسى اتاپ وتكەندەي, قازاقستان وسى كەزەڭدە ورتالىق ازيا بويىنشا قاۋىپسىزدىك پەن تۇراقتىلىقتى قامتاماسىز ەتۋ, ايماقتىق قاۋىپ-قاتەرلەر مەن سىناقتارعا ءتيىمدى قارسى ءىس-قيمىل تانىتىپ, ىنتىماقتاستىقتى نىعايتۋ باعىتىندا بەلسەندى جۇمىستاردى قولعا الماق.
وسى رەتتە, ن.نىعماتۋلين پارلامەنتتەردىڭ ءوزارا ارىپتەستىگى ۇلتتىق مۇددەلەردى ەسەپكە الا وتىرىپ, حالىقارالىق ۇدەرىستەردى زاڭنامالىق تۇرعىدان قامتاماسىز ەتۋگە جول اشاتىنىن اتاپ ءوتتى. ءماجىلىس توراعاسىنىڭ ايتۋىنشا, ورتالىق ازيا وڭىرىندە قاۋىپسىزدىكتى قورعاۋدا ۇجىمدىق قاۋىپسىزدىك تۋرالى شارتتىڭ ءرولى وتە زور.
– بۇل جولدا قازاقستان پارلامەنتى دەپۋتاتتارىنىڭ ۇقشۇ پارلامەنتتىك اسسامبلەياسى شەڭبەرىندە ءوز ارىپتەستەرىمەن تىعىز قارىم-قاتىناس ورناتۋى وتە ماڭىزدى. پارلامەنتتىك ديپلوماتيا كوپتەگەن حالىقارالىق ماسەلەلەر بويىنشا ەلدەر ۇستانىمدارىن العا جىلجىتۋعا جانە تاراپتاردىڭ مۇددەلەرىن قوزعايتىن قۇجاتتاردىڭ مازمۇندىق سيپاتىنا ىقپال ەتە الادى, – دەدى نۇرلان نىعماتۋلين.
ايتا كەتەيىك, تاۋەلسىزدىك جىلدارى ىشىندە قازاقستان پارلامەنتى ەلباسىنىڭ يدەياسىمەن قۇرىلعان, بيىل 25 جىل تولىپ وتىرعان, قاۋىپسىزدىك ماسەلەسىنە ەتەنە ارالاساتىن ازياداعى ءوزارا ءىس-قيمىل جانە سەنىم شارالارى جونىندەگى كەڭەس اياسىندا كوپتەگەن حالىقارالىق شارتتاردى جانە ۇقشۇ شەڭبەرىندە 38 حالىقارالىق شارتتى, سونداي-اق, شانحاي ىنتىماقتاستىق ۇيىمى اياسىندا 17 حالىقارالىق شارتتى راتيفيكاتسيالاعان.
نۇرلىبەك دوسىباي,
«ەگەمەن قازاقستان»
