سوڭعى قوڭىراۋ باستالعان كەزدەگى ءۇش تولقىن ۇرپاقتىڭ: اتا-انالار مەن ۇستازداردىڭ, وقۋشىلاردىڭ جۇزدەرىندەگى الاۋلاعان شاتتىقتى, كوزدەرىندەگى شۋاقتى نۇردى, كوڭىلدەرىندەگى الابۇرتقان سەزىمدى كورگەندە, كىمنىڭ دە بولسا جان دۇنيەسى تولقىماي تۇرا المايدى. اسىرەسە, تاۋەلسىز ەلىمىزدىڭ ءانۇرانىن ايتقاندا, ساربازداي ساپ تۇزەپ تۇرعان وقۋشىلار, ونىڭ ىشىندە باستاۋىش سىنىپ بۇلدىرشىندەرى وڭ قولدارىن جۇرەك تۇسىنا قويىپ, ءانۇراننىڭ ءسوزى مەن اۋەنىن اسەم ۇندەرىمەن اۋەلەتە ايتقاندا, زال ءىشىن كەرەمەت ءبىر تولقىن كەرنەپ كەتكەنى انىق.
وسىدان بولۋ كەرەك, اتام قازاقتىڭ قۋانىشتى ءساتتى «ۇلكەنىنىڭ مىڭىنا بەرگەنشە, بالانىڭ بىرىنە بەر» دەيتىنى. ءتىپتى, سول تۇستا «باعالاي ءبىلۋ, ەڭ اۋەلى ءوزىمىزدى قادىرلەي ءبىلۋ» (ا.بايتۇرسىن ۇلى) ۇلگىسىن ۇل مەن قىز ايقىن كورسەتىپ تۇردى.
بيىل ەلىمىز بويىنشا 3 ميلليونعا تاياۋ وقۋشى ساباقتارىن اياقتاسا, ولاردىڭ 136 269-ى تۇلەكتەر بولىپ سانالادى. بۇلاردىڭ ىشىندە قازاق مەكتەپتەرىن − 90 804, ورىس مەكتەپتەرىن − 39 334, وزگە ءتىلدى مەكتەپتەردى 6131 بالا بىتىرەدى ەكەن. وسىلاردىڭ ىشىندە ەڭ كوپ بىتىرۋشىلەردىڭ ۇلەسىنە كەلسەك, 34 227 وڭتۇستىك قازاقستان وبلىسىنىڭ, 14 684 تۇلەك الماتى وبلىسىنىڭ, 10 043 الماتى قالاسىنىڭ ۇلەسىنە ءتيىپ وتىر.
«التىن بەلگىگە» ۇمىتكەرلەردىڭ سانى 6280 تۇلەكتى قۇرايدى. ونىڭ 4878-ءى – قازاق ءتىلدى, 1288 – ورىس ءتىلدى, 114 − باسقا ۇلت وكىلدەرىنىڭ تىلىندە ءبىلىم العان ۇمىتكەرلەر ەكەن. سول سەكىلدى ۇستىمىزدەگى جىلى 233 مىڭ 622 وقۋشى 9-سىنىپتى اياقتاپتى.
ەلىمىز بويىنشا مەكتەپ بىتىرۋشىلەرگە اتتەستات تاپسىرۋ ءراسىمى ماۋسىم ايىنىڭ 10-12-ءسى اراسىندا وتەتىنىن ەسكە سالا كەتسەك دەيمىز.
ەلورداداعى رايىمبەك باتىر اتىنداعى №50 «قازعارىش» مەكتەپ ليتسەيىندەگى «سىڭعىرلا, سوڭعى قوڭىراۋ!» اتتى مەرەكەلىك سالتاناتقا ەكى مىڭعا تاياۋ وقۋشى قاتىستى. مەكتەپ تۇلەكتەرى ءبىلىم كىلتىن 10-سىنىپ وقۋشىلارىنا تاپسىردى. بۇدان كەيىن ءبىلىم جانە عىلىم مينيسترلىگىنىڭ وكىلى راۋشان مۇقىشەۆا ءسوز الىپ, قاۋمالاعان جۇرتتى قۇتتىقتادى.
تۇلەكتەر سىنىپ جەتەكشىلەرىنە گۇل شوقتارىن ۇسىنىپ, العىستارىن ايتسا, ۇستازدارى 11 جىل بويى ءبىلىم بەرىپ, بوزبالا مەن بويجەتكەندەر قاتارىنا بەت العان شاكىرتتەرىنە ءسات ساپار تىلەپ, قيماي قوشتاساتىندارىن تىلگە تيەك ەتتى. سول سەكىلدى اتا-انالار اتىنان ءسوز العان ازاماتتار دا ۇستازدار ەڭبەگىن جوعارى باعالاپ, قاشاندا التىن ۇياداعى ءبىلىم مەن تاربيە الداعى ۋاقىتتا ءوز جەمىسىن بەرەتىنىنە سەندىردى.
كۇمىس قوڭىراۋدى 1-سىنىپتىڭ 4 وقۋشىسى سوعىپ, ولاردىڭ قولىنان تۇلەكتەر الىپ, شاتتىقتىڭ قۇشاعىندا ۇرپاقتار ساباقتاستىعىنىڭ ادەمى كورىنىسىن جۇرتتىڭ كوز الدىنان وتكىزدى. وسى ءبىر ساتتەگى ءان اۋەزى قالىقتاپ, ول قوشتاسۋ ۆالسىنە ۇلاستى.
مەكتەپ ديرەكتورى روزا بولاتاەۆانىڭ ايتۋىنشا, ءبىلىم ۇياسىن 80-گە تارتا تۇلەك ءبىتىرىپ جاتىر ەكەن. بيىلعى جىلعى سوڭعى قوڭىراۋدىڭ ەرەكشەلىگى, ساناۋلى كۇندەردەن كەيىن اشىلاتىن ەكسپو-2017 كورمەسىنە تۇسپا-تۇس كەلۋىندە ەكەنىن تىلگە تيەك ەتىپ, وسىعان اتسالىسۋ ءاربىر قازاقستاندىقتىڭ پارىزى دەگەندى جەتكىزدى.
ول سونىمەن بىرگە, مەكتەپتەگى جەتىستىكتەردى دە جان-جاقتى ايتا كەلىپ, وقۋشىلاردى ىنتالاندىرۋ ماقساتىندا «ۇركەر» سىيلىعى بەلگىلەنگەنىن, سونى 8 وقۋشىعا تاپسىرىپ تۇرىپ, بۇل ءۇردىس الداعى ۋاقىتتا جالعاسا بەرەتىنىن نازارعا سالدى.
ءبىلىم ورداسى وتكەن جىلى «ۇزدىك مەكتەپ» اتانسا, جاقىندا مۇعالىمدەردىڭ ساباق بەرۋ ءادىسى بويىنشا استانا اكىمدىگى وتكىزگەن «ۇزدىك مۇعالىم-2017» بايقاۋىندا قازاق ءتىلى ءپانىنىڭ ۇستازى ۇلبولسىن ەسىلباەۆا ءبىرىنشى ورىندى جەڭىپ الىپ, 1 ملن 654 مىڭ تەڭگە سىياقىعا يە بولىپتى. مۇنىمەن قاتار, رەسپۋبليكالىق ۇستازدار بايگەسىنە جولداماعا قولى جەتكەنىن دە ايتا كەتسەك دەيمىز.
سونىمەن سوڭعى قوڭىراۋدىڭ جالعاسى وقۋشىلاردىڭ جازعى دەمالىسىنا, تۇلەكتەردىڭ سىناق تاپسىرۋىنا, جوعارى وقۋ ورنىنا ءتۇسۋ ارمانىنا ۇلاساتىن بولادى.
سۇلەيمەن مامەت,
سۋرەتتى تۇسىرگەن ەرلان وماروۆ, «ەگەمەن قازاقستان»
