«اتامەكەن» ۇكپ كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسىنىڭ وتىرىسى ءوتتى. جيىندا جالعان كاسىپورىندار كونتراگەنتتەرىنە قاتىستى قىلمىستىق ءىستى تەرگەۋ بارىسىندا كاسىپكەرلەردىڭ قۇقىقتارى مەن زاڭدى مۇددەسىن قورعاۋ تاجىريبەسى تۋرالى ماسەلەسى كوتەرىلدى.
كەڭەس وتىرىسىنا «اتامەكەن» ۇكپ باسقارما توراعاسىنىڭ ورىنباسارى رۋستام ءجۇرسىنوۆ, كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسىنىڭ توراعاسى قايىربەك سۇلەيمەنوۆ, اقمولا وبلىسى كاسىپكەرلەر پالاتاسى ديرەكتورىنىڭ ورىنباسارى ۆالەنتينا گەراششەنكو باستى بايانداما جاسادى.
جيىنعا قر پارلامەنتى ءماجىلىسىنىڭ دەپۋتاتى كەڭەس ءابساتىروۆ, جوعارعى سوتىنىڭ سۋدياسى ايگۇل ساپاروۆا, قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل بولات پالىمبەتوۆ, باس پروكۋراتۋرانىڭ وكىلى جانات ەليمانوۆ, سونىمەن قاتار مەملەكەتتىك ۋاكىلەتتى ورگاندار مەن بيزنەس-قوعامداستىق وكىلدەرى قاتىستى. وڭىرلەردەگى پالاتالارمەن ۆيدەو-بايلانىس ورناتىلدى.
كاسىپكەرلەر مەن وڭىرلىك پالاتا كاسىپكەرلەرىنىڭ جالعان كاسىپورىندارمەن جاسالعان مامىلەلەر بويىنشا ۇستەمە سالىق اۋدارۋمەن بايلانىستى مەملەكەتتىك كىرىستەر ورگانىنىڭ زاڭعا قايشى ءىس-قيمىلىنا قاتىستى بەرگەن ارىز-شاعىمدارىنا تالداۋ جاسالدى. ۇلتتىق كاسىپكەرلەر پالاتاسىنا 2017 جىلدىڭ 1 قاڭتارىنان 15 مامىر ارالىعىندا كاسىپكەرلەردەن جالعان كاسىپورىندارمەن جاسالعان مامىلە بويىنشا 3 ملرد تەڭگەدەن استام سوماعا ۇستەمە سالىق اۋدارۋعا قاتىستى 80 شاعىم تۇسكەن. بۇل تۋرالى «اتامەكەن» ۇكپ كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسىنىڭ توراعاسى قايىربەك سۇلەيمەنوۆ حابارلادى.
سونىمەن قاتار جالعان كاسىپورىندارمەن جاسالعان مامىلەلەر بويىنشا سالىق سالۋ ماسەلەسى تۋرالى «اتامەكەن» ۇكپ باسقارما توراعاسى رۋستام ءجۇرسىنوۆ پەن اقمولا وبلىسى كاسىپكەرلەر پالاتاسى ديرەكتورىنىڭ ورىنباسارى ۆالەنتينا گەراششەنكو باياندادى.
«قر قىلمىستىق كودەكسىنىڭ 215-بابىن (جالعان كاسىپكەرلىك) قولدانۋ تاجىريبەسى بيزنەسكە ايتارلىقتاي قىسىم كورسەتەتىندىگى ايتىلدى. جالعان كاسىپكەرلەر ايىپپۇل تولەۋمەن قۇتىلادى, ال ولاردىڭ كوپتەگەن كونتراگەنتتەرى سالىق, ايىپپۇل مەن وسىماقى تولەۋگە ءماجبۇر بولادى. جالعان كاسىپورىنداردىڭ قىزمەتىن پايدالاناتىن الاقول كاسىپكەرلەر قىلمىستىق تەرگەۋ ورگاندارىنىڭ نازارىنان تىس قالادى», – دەدى رۋستام ءجۇرسىنوۆ.
سونىمەن قاتار, «اتامەكەن» ۇكپ باسقارما توراعاسىنىڭ ورىنباسارى قر قىلمىستىق كودەكسىندەگى بىرنەشە باپتارعا قاتىستى پىكىر ءبىلدىرىپ, باس پروكۋراتۋرا مەن جوعارعى سوتپەن تىعىز جۇمىس جاساۋدىڭ ارقاسىندا, جالعان كاسىپكەرلىككە قاتىستى ماسەلەنىڭ توڭى جىبىگەنىن حابارلاپ, جالعان كاسىپكەرلىكتە الاقول كونتراگەنتتەر دە انىقتالىپ, جازالانۋى كەرەكتىگىنە اسا نازار اۋداردى.
جيىن بارىسىندا كەڭەس توراعاسى جالعان كاسىپكەرلىك ماسەلەسىن كوتەرىپ, ونى شەشۋدە ايتارلىقتاي ۇلەس قوسقان قازاقستان كاسىپكەرلەرىنىڭ قۇقىقتارىن قورعاۋ جونىندەگى رەسمي ۋاكىل بولات پالىمبەتوۆتىڭ ەڭبەگىن ەرەكشە اتاپ ءوتتى.
«وڭىرلەردى ارالاپ, بيزنەس-قوعامداستىقپەن كەزدەسكەندە, كاسىپكەرلەردەن تۇسەتىن شاعىمنىڭ باسىم كوپشىلىگى جالعان كاسىپكەرلىككە قاتىستى ەكەنىن انىقتادىق. ال بۇگىندە ءبىرشاما ءوڭىردى ارالادىق, بۇل ماسەلەنىڭ ازايعانىن بايقادىق. ەگەر قىلمىستىق كودەكستىڭ اتالعان بابى كىناسى جوق, ادال كاسىپكەرلەرگە زيان تيگىزەتىن بولسا, وندا سول باپتى قايتا قاراۋ كەرەك», – دەدى بولات پالىمبەتوۆ.
«اتامەكەن» ۇلتتىق كاسىپكەرلەر پالاتاسى قر قىلمىستىق كودەكسىنىڭ 215-بابىن قايتا جازۋ, ونىڭ اتاۋى مەن مازمۇنىن وزگەرتۋ بويىنشا ۇسىنىستار ازىرلەگەن.
جالعان كاسىپكەرلىك ورنىنا زاڭدىق تۇلعانىڭ زاڭسىز ارەكەتى, ياعني زاڭدىق تۇلعا رەتىندە تىركەلۋ ءۇشىن قۇجاتتاردى زاڭسىز پايدالانۋ سىندى فورمالدى قۇرامداردى ەنگىزۋ ۇسىنىلادى. بۇل قۇرامدار كومپانيا قۇرىلعان, تىركەلگەن دەرەكتەر بويىنشا وڭاي اشكەرەلەنەدى.
سونىمەن قاتار سالىق كودەكسىنىڭ ەرەجەلەرىن تۇزەتۋ كەرەك (115-باپ «شەگەرۋگە جاتاتىن شىعىندار» جانە 257-باپ «ەسەپكە الۋعا جاتپايتىن قۇنعا سالىنعان سالىق») جانە سالىق قىزمەتى ورگاندارىنا جالعان فيرمالارمەن ىسكەرلىك وپەراتسيالار جۇرگىزۋ دەرەگى انىقتالعان كەزدەگە سالىق سالىناتىن تىبىستى وزدىگىنشە تۇزەتۋ قۇقىعىن بەرۋ قاجەت.
كەڭەس وتىرىسىندا جوعارعى سوت سۋدياسى ايگۇل ساپاروۆا جالعان كاسىپكەرلىككە قاتىستى قىلمىستىق ىستە تەرگەۋ جۇمىستارى وتە ۇزاق ۋاقىتتى الاتىنىن اتاپ ءوتىپ, وڭىرلەردەگى قىلمىستىق ءىستىڭ جۇرگىزىلۋىنەن مىسالدار كەلتىرىپ, سوت پروتسەسى تۋرالى اقپارات بەردى.
ال باس پروكۋراتۋرانىڭ وكىلى جانات ەليمانوۆ قر قىلمىستىق كودەكسىنىڭ 2015-بابىن قايتا رەفورمالاۋعا قاتىستى ۇىسىنىس قر پارلامەنتى ماجىلىسىنە ۇسىنىلاتىنىن حابارلاپ, «اتامەكەن» ۇكپ ۇسىنىسىن قولدايتىنىن جەتكىزدى.
سالىقتى تۇزەتۋ قىلمىستىق سوت جۇمىسى شەڭبەرىنەن سالىقتىق اكىمشىلىك ەتۋگە اۋىستىرىلۋى قاجەت. وسىلايشا, سالىق ورگاندارى قىلمىستىق تەرگەۋگە ادال كاسىپكەرلەردى قاتىستىرماي-اق, سالىق سوماسىنا ۇستەمە, ايىپپۇل مەن وسىماقى اۋدارۋدىڭ ىقپالدى مەحانيزمدەرىن الادى.
سونىداي-اق, ادال كاسىپكەرلەر زاڭنامادا قاراستىرىلعان وزدەرىنىڭ قۇقىقتارىن قورعايتىن قۇقىقتىق قۇرالداردى (ازاماتتىق سوت جۇمىسى تارتىبىندە شاعىمنىڭ سوتقا دەيىن جانە سوت مەحانيزمدەرى) پايدالانا وتىرىپ, وزدەرىنىڭ مامىلەلەرىنىڭ راس ەكەنىن دالەلدەۋگە مۇمكىندىك الادى.
جوعارىدا اتالعان ءتاسىلدى پايدالانعاندا جالعان كاسىپكەرلىكپەن كۇرەس جاڭا ساپالىق دەڭگەيگە كوتەرىلەدى. ال اتالعان قىلمىستىق ءىس كاتەگورياسىن تەرگەۋدىڭ قولدانىستاعى جۇيەسى رەفورمالاۋعا جاتپايدى.
كەڭەس جالعان كاسىپورىننىڭ كونتراگەنتتەرىنىڭ سالىق سالۋ تۋرالى زاڭناما وتاندىق شاعىن جانە ورتا بيزنەسسۋبەكتىلەرىنە قولداۋ كورسەتۋگە كەپىلدىك بەرۋ كەرەكتىگىن اتاپ ءوتتى. بۇل قر پرەزيدەنتى ن.ءا.نازارباەۆتىڭ زاڭدى مۇلتىكسىز ساقتاۋ تۋرالى تاپسىرماسىنا ساي كەلەدى.
كەڭەس وتىرىسىنىڭ قورىتىندىسىندا كەڭەس ۇكىمەتكە, قارجى مينيسترلىگى مەن وزگە دە مۇددەلى مەملەكەتتىك ورگاندارعا ۇسىنىم دايىندالدى.
