وتكەن جىلى نادەجديننىڭ ءۇش تۇرعىنى اۋىل سىرتىنداعى ورمانعا ساڭىراۋقۇلاق تەرۋگە بارادى. قايىڭدى ورمانعا كىرىسىمەن ءبىر جاعىمسىز ءيىستى سەزەدى. ولار ءبىر اعاشتىڭ تۇبىندە ءولىپ جاتقان ەلىكتى كورەدى, ولەكسە ايني باستاپتى. ونى اۋدارىستىرىپ كورەدى, تەرىسىندە وقتىڭ ءىزى بىلىنبەيدى. تيمۋر اۋىلداستارىنىڭ الدىنا ءتۇسىپ, ون-ون بەس مەتر جۇرە بەرگەندە ابدەن ءالجۋازدانىپ, دەمىن زورعا الىپ جاتقان ەلىكتىڭ لاعىن تاۋىپ الادى.
– ولگەن ەلىكتىڭ لاعى ەكەن, ءالى كىندىگى دە ءتۇسىپ ۇلگەرمەپتى, ءالجۋاز, اياعىن باسا دا المايدى. مەن دەرەۋ ۇيدەن اكەم مەن اعامدى شاقىردىم. ولار سول ساتىندە جەتىپ كەلدى. ال ءبىز لاقتى اكەلگەنشە, انام ەمىزىك پەن شولمەككە ءسۇت جىلىتىپ قۇيىپ, دايىنداپ وتىر ەكەن, – دەيدى تيمۋر. العاشقى كۇنى ەلىكتىڭ لاعىنا ءسۇت بەرۋ دە وڭاي بولماپتى. ول ەمىزىكتى اۋزىنا الماعان سوڭ, ءسۇتتى لاقتىڭ اۋزىنا قاسىقتاپ تامىزعان.
– وسىندايدا ينتەرنەت «جەدەل جاردەم» سەكىلدى, اقتارساڭ ءبارىن بىلە قوياسىڭ, ايتپەگەندە لاقتى ءولتىرىپ الۋىمىز دا مۇمكىن ەدى, – دەيدى ۆيتالي سيدوروۆ. – ينتەرنەتتەن ەلىك لاعىن مىسىق, يت سەكىلدى ءبىر بۇيىرىنەن جاتقىزىپ ەمىزەتىنىن بىلدىك. ءبىز دە سولاي ءسۇت بەردىك.
ءسۇتتى ون گرامنان باستاعان لاق, ءبىر اپتادا ونىڭ ءبىر شولمەگىن ءىشىپ الاتىن بولدى. ءار ءتورت ساعات سايىن ءبىر شولمەك ءسۇت ءىشىپ تۇردى. ودان كەيىن وتىعا باستادى, ءشوپ, جەمگە دە ۇيرەندى.
سيدوروۆتار وتباسىندا ۇل مەن قىز ءوسىپ كەلەدى. تيمۋر قازىر سەگىزىنشى, پولينا ءتورتىنشى سىنىپتا وقيدى. ولار ەلىكتىڭ لاعىنا داشا دەپ ات قويدى. داشا بالالاردىڭ شاقىرعانىنا جۇگىرىپ كەلەدى, تيمۋر مەن پولينانى مەكتەپكە دەيىن شىعارىپ سالىپ, كەشكە «كۇتىپ» الادى. وتكەن جىلى نادەجدين مەكتەبىندە تيمۋردىڭ بيولوگيا ءپانىنىڭ مۇعالىمى سۆەتلانا الىباەۆانىڭ جەتەكشىلىگىمەن جاساعان «اۋىلداعى جابايى ەلىك» اتتى عىلىمي جوباسى اۋداندىق ءبىلىم بايقاۋىندا ەكىنشى ورىن الدى.
ءنازيرا جارىمبەتوۆا,
«ەگەمەن قازاقستان»
قوستاناي وبلىسى,
قارابالىق اۋدانى,
نادەجدين اۋىلى
