«تۋعان جەر» باعدارلاماسىنىڭ اياسىندا مەكتەپتەردە «تۋعان ولكە تاريحى» ساباعىن وتكىزۋ, ەسكەرتكىشتەردى قالپىنا كەلتىرۋ جۇمىستارى, قالانىڭ ينفراقۇرىلىمىن جاقسارتۋ ماقساتىندا الەۋمەتتىك ماڭىزدى نىسانداردى جوندەۋ, «تازا كوشە», «تازا اۋدان» اكتسيالارىن ۇيىمداستىرىپ, جاس تاريحشىلار مەن ولكەتانۋشىلاردىڭ جيىنىن وتكىزۋ جوسپارلانعان. قالا تۇرعىندارى ءوز يدەيالارىمەن ءبولىسۋ ءۇشىن كراۋدسورسينگتىك ونلاين-پلاتفورما جاسالىنىپ, قالانىڭ تۋريستىك كارتاسى سىزىلدى. سونداي-اق, قالالىق تەلەارنالاردان «تۋعان جەر» رەاليتي-شوۋى جۇزەگە اسپاق.
جيىندا ءسوز سويلەگەن اكادەميك كارل بايپاقوۆ: ء«ار قالانىڭ كەلبەتى تەاترلار مەن مۋزەيلەردىڭ كوپتىگىمەن ولشەنەدى. الماتىنىڭ مىڭجىلدىق تاريحىندا بولاشاققا ايتار ءسوزى كوپ. جەتىسۋ ولكەسىندەگى قورعاندار – كۇردەلى ارحيتەكتۋرالىق نىساندار. ونىڭ كوبى بەلگىلى. الماتىدا اشىق مۋزەي جاسايتىن قورعاندار جەتكىلىكتى. ونىڭ ءبىرى روزىباكيەۆ كوشەسىندە ورنالاسقان», – دەدى.
قالا اكىمى بۇل ۇسىنىستى قولداپ, ەجەلگى قورعانداردىڭ قالدىقتارى قالعان, جەكەمەنشىككە ءوتىپ كەتكەن جەرلەردى مەملەكەتكە قايتارۋدى قاراستىرۋدى ۇسىندى. ويتكەنى, تۋعان جەردىڭ تاريحى ۇلتقا ورتاق.
قالا بويىنشا سالىنىپ جاتقان بالاباقشالار مەن مەكتەپتەردىڭ سانى كوپ. ناۋرىزباي اۋدانىنداعى اكىمشىلىك عيمارات پەن مەكتەپ, الەۋمەتتىك نىساندار جىلدىڭ سوڭىنا دەيىن قۇرىلىس جۇمىستارىن اياقتايتىنى ايتىلدى. جەكە كاسىپكەرلەردىڭ دەمەۋشىلىگىمەن سالىنىپ جاتقان عيماراتتار الماتى شاھارىنىڭ كوركى. قالا اكىمى كوپشىلىكتىڭ اتىنان مەتسەناتتارعا العىس ايتتى. سونداي-اق, جازۋشى, مەملەكەتتىك سىيلىقتىڭ لاۋرەاتى بەكسۇلتان نۇرجەكە ۇلى اتى اتالماي جاتقان باتىرلاردىڭ اتتارىنا كوشە, مەكتەپ بەرۋدى ۇسىندى.
ەلباسىنىڭ باعدارلامالىق ماقالاسى اياسىندا جۇزەگە اسپاق جوبانى باقىلايتىن قالالىق كوميسسيا قۇرىلدى. قالا باسشىسى ءىستىڭ تەك ءسوز جۇزىندە قالماي, ىسكە اسۋىن باقىلاۋدا ۇستايتىنىن ايتتى.
باعاشار تۇرسىنباي ۇلى,
«ەگەمەن قازاقستان»
