قازاقستاننىڭ تاۋەلسىزدىك مەرەكەسى دۋبايدا اتاپ ءوتىلدى

قازاقستان تاۋەلسىزدىگىنىڭ 25 جىلدىعىن تويلاۋ بىرىككەن اراب امىرلىكتەرىنىڭ دۋباي قالاسىنان باستالدى, دەپ حابارلايدى قازاقپارات. 3 جەلتوقساندا دۋباي جانە سولتۇستىك امىرلىكتەردەگى قازاقستاننىڭ باس كونسۋلدىعى جەرلەس بەلسەندىلەردىڭ كومەگىمەن ەلىمىزدەگى باستى مەرەكەنىڭ قۇرمەتىنە مادەني كوپشىلىك شارا ۇيىمداستىردى. وعان ءباا مەملەكەتتىك ورگاندارىنىڭ وكىلدەرى, شەتەلدىك ديپلوماتيالىق وكىلدىك باسشىلارى, جۋرناليستەر, ستۋدەنتتەر جانە امىرلىكتەردە ءومىر سۇرەتىن قازاقستاندىقتار قاتىستى. شاراعا 400-دەن استام حالىق جينالدى. شارانىڭ رەسمي بولىگىن ءباا قازاقستان ەلشىسى قايرات لاما ءشارىپ پەن دۋبايداعى باس كونسۋل ارمان يساعاليەۆ اشتى. ولار تاۋەلسىزدىك كۇنىنىڭ ماڭىزدىلىعىن اتاپ ءوتىپ, قازاقستاننىڭ نەگىزگى دامۋ كەزەڭدەرى مەن شيرەك عاسىردا قول جەتكىزگەن تابىستارىنا توقتالدى جانە قازاقستان مەن امىرلىكتەر ىنتىماقتاستىعىنىڭ جوعارى دەڭگەيىن اتاپ ءوتتى. ودان كەيىن كەلۋشىلەر تانىمال قازاقستاندىق ۇجىمداردىڭ كونتسەرتىن تاماشالادى, اتاپ ايتقاندا «ۇشقوڭىر» فولكلورلىق ءانسامبلى, «الاش ۇلى» ەتنو-روك توبى جانە «قاراگوز» وڭتۇستىك قازاقستان وبلىسى فيلارمونياسىنىڭ ءانسامبلى ونەر كورسەتتى. سونداي-اق, شارا اياسىندا قازاقستاندىق قولونەرشىلەر بۇيىمدارىنىڭ جارمەڭكەسى ۇيىمداستىرىلىپ, وتاندىق سۋرەتشىلەردىڭ تۋىندىلارى كورمەگە قويىلدى. باس كونسۋلدىق قىزمەتكەرلەرى مەن دەمەۋشىلەر جانە قازاق دياسپوراسى بارلىق قوناقتارعا ارناپ, ۇلتتىق تاعامدار مەن تاتتىلەر قويىلعان مول داستارحان جايدى. مەرەكە سوڭىندا ءتۇرلى جۇلدەدەر تىگىلگەن لوتورەيا ويناتىلدى. باستى سىيلىق اۋە كومپانيالارىنىڭ ءبىرى ۇسىنعان قازاقستانعا 2 تەگىن بيلەت بولدى. ءىس-شارانىڭ ەڭ قىزىقتى ءساتى جاستار مەن بالاالاردىڭ قاتىسۋىمەن وتكەن «Mannequ in Challenge» زامانعا ساي فلەشموبى بولدى. دۋبايداعى وتانداستارىمىز بەن قوناقتار وسى ۇيىمداستىرىلعان سالتاناتتى شارادان جاعىمدى اسەر الىپ قايتتى. ولار وندا قازاقتىڭ ۇلتتىق ءان جانە بي ونەرىن تاماشالاپ, ءداستۇرلى ونەر مەن داستارحان مازىرلەرى تۋرالى ءبىلدى. قازاقستاندىق ءىس-شارا ءباا باستى ۇلتتىق مەرەكەسى تاۋەلسىزدىكتىڭ 45 جىلدىعىمەن سايكەس كەلدى.