«التىن دومبىرا» جەڭىمپازى انىقتالدى

  مىڭ جىلدىق تاريحى بار الىپ الماتىنى ەكى كۇن بويى جىرمەن تەربەگەن «التىن دومبىرا» ايتىسى مارەگە جەتتى. باس جۇلدە – التىن دومبىرا, ايتىستىڭ شىن جۇيرىگى, سىر سۇلەيى مۇحتار نيازوۆقا بۇيىردى! الماتى قالاسىنىڭ اكىمدىگى مەن «نۇر وتان» پارتياسىنىڭ قولداۋىمەن  ەل تاۋەلسىزدىگىنىڭ 25 جىلدىعىنا ارنالعان بۇل ايتىس ايتىسكەر اقىنداردىڭ بيىلعى باستى دوداسى. ەڭ الدىمەن, شيرەك عاسىر ۋاقىتتا جەتكەن جەتىسىتىگىمىزگە ءسۇيىنىپ ايتقان, ءالى دە ولقى ءتۇسىپ جاتقان جەرلەرىمىزگە كۇيىنىپ ايتقان اقىنداردىڭ ايشىقتى سوزدەرىنە قول سوعىپ, قوشامەت قىلعان جۇرتتىڭ ىقىلاسى تۋرالى ايتۋىمىز كەرەك. الماتىداعى ەڭ ۇلكەن سارايلاردىڭ ءبىرى رەسپۋبليكا سارايىندا قاتارىنان ەكى كۇن بويى ينە شانشار ورىن بولعان جوق. 20 اقىن قاتىسقان ايتىس ءۇش اينالىم بولدى. ەكىنشى اينالىمدا مەيىربەك سۇلتانحان, ءومىرجان كوپبوسىن, سەرىكزات دۇيسەنعازى, مۇحتار نيازوۆ, ەركەبۇلان قاينازار, قاليجان بىلداشەۆ, اسپانبەك شۇعاتاەۆ, بولاتبەك ورازباەۆ, جانسايا مۋسينا, يران-عايىپ كۇزەمباەۆ, رۇستەم قايىرتاي, ەرجان ءامىروۆ ايتىسىپ, ودان سەرىكزات دۇيسەنعازى, جانسايا مۋسينا, بولاتبەك ورازباەۆ, مۇحتار نيازوۆ سىندى جۇيرىكتەر ىرىكتەلىپ شىقتى. ءۇشىنشى اينالىمدا وسى ءتورت اقىن ايتىسىپ, ناتيجەدە باس جۇلدە, "التىن دومبىرا" – مۇحتار نيازوۆقا, (3 000000 تەڭگە) 1 – ورىن بولاتبەك ورازباەۆقا, (2 000 000 تگ) 2 – ورىن جانسايا مۋسيناعا, (1 000 000 تگ)  3 - ورىن مەيىربەك سۇلتانحانعا, (500 000 تەڭگەدەن) ءومىرجان كوپبوسىنوۆقا, يرانعايىپ كۇزەمباەۆقا, سەرىكزات دۇيزەنعازىعا بۇيىردى. اقىنداردىڭ ونەرىن  قازاقستاننىڭ حالىق اقىنى قونىسباي ءابىلوۆ, فيلولوگيا عىلىمدارىنىڭ دوكتورى قويلىباي اسانوۆ, «دارىن» سىيلىعىنىڭ لاۋرەاتى مۇحامەدجان تازابەك, قر ەڭبەك سىڭىرگەن قايراتكەرى امانجول التاەۆ, «دارىن» سىيلىعىنىڭ لاۋرەاتى داۋلەتكەرەي كاپ ۇلى سىندى تانىمال اقىنداردان جاساقتالعان قازىلار القاسى باعالادى. ايتۋلى دودانى ايتىستىڭ اقىلمانى ءجۇرسىن ەرمان جۇرگىزدى. ۇلتتىق ونەر بولعان سوڭ دا ۇلتتىڭ ءبىر مىنەزىن, ءبىر بولمىسىن كورسەتپەي قالار ما, الاماننىڭ جۇلدەسىن تاپسىرۋعا شىققان الماتى قالاسىنىڭ اكىمى باۋىرجان بايبەك اقىندارعا ريزالىعىن ايتا كەلىپ, باس بايگەنىڭ جۇلدەسىنە تاعى 2 000 000 تەڭگە, ءبىرىنشى ورىننىڭ جۇلدەسىنە 1 000 000 تەڭگە ۇستەمە قوساتىنىن حابارلاعاندا كورەرمەن قوشامەتى ءتىپتى دە ۇدەي ءتۇستى. ايتا كەتەيىك, "التىن دومبىرا" ايتىسى وسىمەن V رەت وتكىزىلىپ وتىر. مۇحتار نيازوۆ (2012 جىلى) العاشقى يەگەرى بولعان ەدى. 2013 جىلى جانداربەك بۇلعاقوۆ يەلەنسە, 2014 جىلى بالعىنبەك يماشەۆتىڭ ەنشىسىنە بۇيىرعان بولاتىن. ال 2015 جىلى «التىن دومبىرا»  اسپانبەك شۇعاتاەۆقا بۇيىرعان بولاتىن.  بيىل مىنە, «التىن دومبىرا» اينالىپ مۇحتاردىڭ قولىنا قايتا كەلدى.  الماتىداعى بۇل ايتىس جوعارى دەڭگەيدە ءوتتى دەيدى باعالاۋشىلار. اقىنداردىڭ, (مۇحتار نيازوۆ): ... التىن دومبىرا جارقىلداپ ارباسا دا, جاڭىلمايمىز ادامدىق قالپىمىزدان. ەسىكتەن «التىن ادام» تابىلعاندا, جەر, الەم تىتىرەپ ەد داڭقىمىزدان. بابالار بىرلىك قۇرىپ تۇرعان شاقتا, تەڭ دۇنيە تەڭسەلدى نارقىمىزدان. سولارداي سۇرىنبەسەك سالتىمىزدان, سولارداي جاڭىلماساق انتىمىزدان. كەبىن بولىپ كيىلىپ التىن ءوزى, قابىرگە قۋىپ كەلەر ارتىمىزدان. – دەپ كەلەتىن جاۋھارداي جىر شۋماقتارى مەرەيلى مەرەكەمىزدى ۇلتتىق ونەرىمىزبەن ۇلىقتاعان ايتۋلى كۇندەردىڭ اسپانىندا وسىلايشا قالىقتاپ قالا بەردى.