ءتورت ەلدىڭ اۋماعىندا وتەدى

قازاقستان قارۋلى كۇشتەرى اەروۇتقىر اسكەرلەرىنىڭ وكىل­­­دەرى بىرلەسكەن ستراتەگيالىق «ور­تالىق – 2011» جاتتىعۋىنا قاتىسۋ ءۇشىن رەسەي فەدەرا­تسيا­سىنىڭ استراحان وبلىسىنداعى اشۋلۋك پوليگونىنا اتتاندى. اسكەري كولىك ۇشاقتارى دەسانت­تى-شابۋىلداۋشى روتا ورنا­لاس­قان تالدىقورعاننان ۇشىپ شىعىپ, استانا, اتىراۋ ارقى­لى اشۋلۋكقا كەلىپ قوندى. قا­زاقستان دەسانتشىلار توبىن اەروۇتقىر اسكەرلەرىنىڭ اۋە-دەسانتىن دايىنداۋ جونىندەگى ورىنباسارى پولكوۆنيك ۆيكتور جيتنيك باستاپ باردى, دەپ حا­بارلادى قر قورعانىس مينيس­تر­لىگىنىڭ ءباسپاسوز قىزمەتى. «ورتالىق – 2011» جاتتى­عۋى­نىڭ رەسەي فەدەراتسياسىندا وتەتىن كەزەڭىنە قازاقستاننان بارلىعى 100-گە جۋىق ادام قاتىسپاق. ولار اسكەري باسقارۋ ورگاندارىنىڭ وفيتسەرلەرى مەن اەروۇتقىر اسكەرلەرىنىڭ وكىل­دە­رى. ال قازاقستان دەسانتشى­لا­رىنىڭ الدىنا قويىلعان مىندەت – مەجەلەنگەن جەردى «باسىپ الىپ, ۇستاپ تۇرۋ». بۇل وپەرا­تسيانى قازاقستاندىق جاۋىنگەر­لەر جاتتىعۋعا قاتىسۋشى باسقا دا ەلدەردىڭ بولىمشەلەرىمەن ءبىر­گە جۇزەگە اسىراتىن بولادى. قازاقستان جاعىنان اۋەدە ءوز شەبەرلىكتەرىن مي-17 تىك ۇشاق­تارى مەن مايداندىق اۆياتسيا­نىڭ سۋ-27 ۇشاقتارىنىڭ ەكي­پاجدارى كورسەتپەك. جاتتىعۋ ءتورت ەلدىڭ اۋما­عىندا وتەدى: اشۋلۋك پەن ويماشا پوليگوندارىنان باسقا وقۋ-جاتتىعۋ قيمىلدارى قىرعىز­ستان­نىڭ پودگورنوە جانە ءتا­جىك­ستاننىڭ لياۋر پوليگونىندا جالعاسىن تابادى. قازاقستان قا­رۋلى كۇشتەرى جاتتىعۋ­لار­دىڭ بارلىق كەزەڭىنە اتسالى­سىپ ءوز ۇلەستەرىن قوسادى. جات­تىعۋعا سونداي-اق, بەلورۋسسيا مەن ۋكراينانىڭ دا اسكەري ءبو­لىمشەلەرى تارتىلعان. بەلسەندى قيمىلدار, اسىرەسە, كاسپي تە­ڭىزى سۋ ايلاعىنداعى قازاقستان­دىق سەكتور مەن ويماشا پولي­گونىندا دا جالعاسادى. بۇل اي­ماق قۇرلىقتاعى, تەڭىزدەگى جانە اۋەدەگى اسكەري ءىس-قيمىلداردىڭ ناعىز وشاعىنا اينالماق. «ەگەمەن-اقپارات».