يليا يلين ەر جىگىتكە ءتان شەشىم قابىلدادى – مۇسايبەكوۆ

كەشە اۋىر اتلەكتيكادان ءتورت دۇركىن الەم چەمپيونى يليا يلين ۇلتتىق كوماندالار جانە سپورتتىق رەزەرۆتەر ديرەكتسياسىنداعى كەڭەسشى قىزمەتىنەن ءوز ەركىمەن كەتكەندىگىن مالىمدەگەن بولاتىن. وسى جونىندە مادەنيەت جانە سپورت ۆيتسە-ءمينيسترى ساكەن مۇسايبەكوۆ پىكىرىن ءبىلدىردى. «بولعان جاعدايدى ەستىگەندە توبەمىزدەن جاي تۇسكەندەي بولدى. مەن ونى ماقتان تۇتىپ كەلەمىن. وليمپيادالاردا تەك جەڭىس تىلەپ ءجۇردىم. ول رەكوردتاردى بىرىنەن سوڭ ءبىرىن جاڭارتتى. مادەنيەت جانە سپورت ءمينيسترى ارىستانبەك مۇحاممەدي ۇلىنا دا, ماعان دا, مينيسترلىك قىزمەتكەرلەرىنە دە بۇل جاعداي اۋىر ءتيدى», – دەدى ول. بۇدان كەيىن ۆيتسە-مينيستر سپورتشىنىڭ ۇلتتىق كوماندالار جانە سپورتتىق رەزەرۆتەر ديرەكتسياسىنداعى كەڭەسشى قىزمەتىنەن كەتكەندىگىنە قاتىستى پىكىرىن ءبىلدىردى. «WADA كودەكسى بار. ول بويىنشا دوپينگ قولدانعان سپورتشى جارىستان شەتتەتىلەدى. ال يليا يلين جارىستان شەتتەتىلىپ وتىر. بىراق ول بۇل شەكتەۋدى حالىقارالىق اۋىر اتلەتيكا فەدەراتسياسىنان دا الدى. بۇدان كەيىن ونىڭ سپورت سالاسىندا جۇمىس ىستەۋگە ەشقانداي قۇقىعى جوق. حوك-تان حات كەلگەنگە دەيىن يليا كەڭەسشى قىزمەتىن اتقارىپ كەلدى. ال حات كەلگەننەن كەيىن بۇل قىزمەتىنەن دە كەتۋ تۋرالى شەشىم قابىلدادى. وعان ەشكىم قىسىم جاساعان جوق, ءوزىنىڭ تاڭداۋى. يليا يلين ەر جىگىتكە ءتان ارەكەت جاسادى. ول وقىعىسى كەلەدى. بولاشاقتا بيزنەسپەن شۇعىلدانۋى مۇمكىن. وعان بارلىعىمىز قولداۋ بىلدىرەيىك», - دەدى ۆيتسە-مينيستر. ايتا كەتەيىك, قر ۇلتتىق وليمپيادا كوميتەتى حالىقارالىق وليمپيادا كوميتەتىنەن 2008 جانە 2012 جىلدارداعى وليمپيادا ويىندارىنا قاتىسقان قازاقستاندىق سپورتشى يليا يلينگە قاتىستى جازا قولدانىلعاندىعى تۋرالى رەسمي حابارلاما الدى. سپورتشىنىڭ قانىنان تىيىم سالىنعان پرەپاراتتار تابىلعان بولاتىن.