مەديتسينا سالاسىنداعى ءبىلىم بەرۋ جۇيەسى وزگەرۋى مۇمكىن

مەديتسينا سالاسىنداعى ءبىلىم بەرۋ جۇيەسىن جاڭعىرتۋ اياسىندا قازاقستانداعى جوعارعى وقۋ ورىندارى حالىقارالىق تاجىريبەنى زەرتتەپ جاتىر. «جەتەكشى شەتەلدىك ۋنيۆەرسيتەتتەر مەن مەديتسينالىق جوو اراسىنداعى ستراتەگيالىق سەرىكتەستىكتىڭ ءبىرىنشى كەزەڭىن قورىتىندىلاۋ تۋرالى» حالىقارالىق كونفەرەنتسيا اياسىندا وتاندىق مامانداردى قىزىقتىرعان تاجىريبەنىڭ ءبىرى – جوعارعى وقۋ ورىندارىنا مەكتەپ تۇلەكتەرىن ەمەس, مەديتسينالىق كوللەدجى تامامداعان ستۋدەنتتەردى قابىلداۋ جۇيەسى. «كەز كەلگەن سالانىڭ دامۋى نەمەسە قۇلدىراۋى كادرعا بايلانىستى. حالىقارالىق تاجىريبەنى ەسكەرە وتىرىپ, مەديتسينالىق ءبىلىم بەرۋدىڭ جاڭا مودەلىن جۇزەگە اسىرعىمىز كەلەدى. بۇل مودەل ستۋدەنتتەردى ىرىكتەۋگە قاتىستى. سوندىقتان, تاڭداۋ جاساۋ كەرەك, مەكتەپتە بيولوگيا مەن حيميا پاندەرىن تەرەڭدەتىپ وقىعان وقۋشىلاردى ما, الدە مەديتسينالىق كوللەدجەردە وقىعان «دايىن» مامانداردى قابىلدايمىز با؟!» - دەدى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا. جالپى, مينيستر اتاپ وتكەندەي, مەديتسينا سالاسىنداعى ءبىلىمدى جەتىلدىرۋ ءۇشىن وتاندىق التى ۋنيۆەرسيتەت حالىقارالىق التى ۋنيۆەرسيتەتپەن ستراتەگيالىق بايلانىس ورناتقان ەكەن. ونىڭ تورتەۋى – اقش ۋنيۆەرسيتەتى بولسا, ەكەۋى – ەۋروپانىڭ ءبىلىم بەرۋ ورىندارى ەكەن. كونفەرەنتسيا بارىسىندا س.ج. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى جانە ديۋك ۋنيۆەرسيتەتى (اقش), باتىس قازاقستان مەملەكەتتىك مەديتسينالىق ۋنيۆەرسيتەتى جانە ك. مارتسينكوۆ اتىنداعى پوزنان مەديتسينالىق ۋنيۆەرسيتەتى (پولشا), وڭتۇستىك قازاقستان مەملەكەتتىك فارماتسەۆتيكالىق اكادەمياسى جانە گدان مەديتسينالىق ۋنيۆەرسيتەتى (پولشا), قاراعاندى مەملەكەتتىك مەديتسينالىق ۋنيۆەرسيتەتى جانە لۋند ۋنيۆەرسيتەتى (شۆەتسيا), سەمەي قالاسىنىڭ مەملەكەتتىك مەديتسينا ۋنيۆەرسيتەتى جانە سەنت-لۋيس ۋنيۆەرسيتەتى (اقش), استانا مەديتسينا ۋنيۆەرسيتەتى جانە لا ساپيەنتسا ۋنيۆەرسيتەتتەرىنىڭ (يتاليا) ستراتەگيالىق ارىپتەستىكتىڭ 2016 جىلعا جۇمىسىن قورىتىندىلادى. 2017-2018 جىلدارعا ارنالعان جوو-نىڭ ستراتەگيالىق سەرىكتەستىكتەرىنىڭ ماقساتتارىمەن مىندەتتەرى, سونىمەن قاتار قازاقستانداعى مەديتسينالىق ءبىلىمدى رەفورمالاۋدىڭ نەگىزگى كەزەڭدەرى  تالقىلاندى.