جاڭا باعىتتاعى اۋە رەيسى اشىلادى

2017 جىلدىڭ سوڭىندا نە 2018 جىلى استانا مەن تەل-اۆيۆ اراسىندا تىكەلەي اۋە رەيسى اشىلاتىن بولادى. بۇل تۋرالى بۇگىن قازاقستان-يزرايل ساۋدا-ەكونوميكالىق ىنتىماقتاستىعى جونىندەگى 7-ءشى وتىرىس بارىسىندا ينۆەستيتسيالار جانە دامۋ مينيسترلىگىنىڭ ازاماتتىق اۆياتسيا كوميتەتى توراعاسىنىڭ ورىنباسارى تالعات لاستاەۆ ءمالىم ەتتى, دەپ حابارلايدى قازاقپارات. ونىڭ اتاپ وتۋىنشە, 1995 جىلى ەكى ەلدىڭ اراسىنداعى كەلىسىمگە سايكەس الماتى مەن تەل-اۆيۆ اراسىندا تىكەلەي اۋە رەيسى اشىلعان. ەندىگى ۋاقىتتا قازاقستان تارابى ءدال وسىنداي رەيستى استانا مەن تەل-اۆيۆ اراسىندا اشۋعا نيەتتى. «ءبىزدىڭ تاراپتان پرەمەر-ءمينيستردىڭ (يزرايل ۇكىمەت باسشىسى ب.نەتانياحۋ اعىمداعى جىلدىڭ جەلتوقسان ايىنىڭ ورتاسىندا قازاقستانعا ساپارمەن كەلەدى دەپ كۇتىلۋدە - اۆتور) ساپارى اياسىندا جاڭا قۇجاتقا قول قويىپ, وعان استانانى قوسۋ جانە رۇقسات ەتىلگەن رەيس سانىن كورسەتۋ جايىندا ۇسىنىس بار. ياعني, ۇشۋلاردى باستاۋعا قۇقىقتىق بازا جاساۋ قاجەت. ءبىز وسىنداي ۇسىنىس جاسايمىز جانە ساپار اياسىندا قول قويۋعا دايىنبىز», - دەدى ول. لاستاەۆتىڭ سوزىنە قاراعاندا, ەير استانا كومپانياسى 2017 جىلدىڭ سوڭىندا نەمەسە 2018 جىلدىڭ باسىندا استانا مەن تەل-اۆيۆ اراسىندا اۋە قاتىناسىن ورناتۋدى جوسپارلاۋدا. «بۇعان قوسا, ءبىز ەكسپو كەزىنە بىرجاقتى تارتىپپەن يزرايلدىك اۋە كومپانياار ءۇشىن بارلىق ۇشۋلارعا شەكتەۋلەردى الىپ تاستايمىز. ياعني, يزرايلدىك كومپانيالار تارابىنان قازاقستانعا ۇشىپ كەلۋگە نيەت بولسا, وندا ءبىز ونى قولدايمىز. جوباعا قاتىستى ءبىز ءوز كومەنتاريىمىزدى بەردىك, يزرايل تارابى قارادى, الماسۋ بولدى», - دەپ اتاپ ءوتتى لاستاەۆ.