ورالدا وبلىستىق اقىندار ايتىسى ءوتتى

ع.قۇرمانعاليەۆ اتىنداعى وبلىستىق فيلارمونيانىڭ كونتسەرت زالىندا ەل تاۋەلسىزدىگىنىڭ 25 جىلدىعىنا وراي «جىرىڭ بولىپ توگىلەمىن, ەلىم» اتتى وبلىستىق جاس اقىندار ايتىسى مارەگە جەتتى, دەپ حابارلايدى قازاقپارات. ورال قالالىق ىشكى ساياسات ءبولىمى, «نۇر وتان» پارتياسى وبلىستىق فيليالى جانە «جاس وتان» جاستار قاناتىنىڭ قولداۋىمەن «بقو ستۋدەنتتىك قۇرىلىس جəنە جاستار ەڭبەك جاساقتارىنىڭ شتابى» جاستار قوعامدىق بىرلەستىگى ۇيىمداستىرعان ايتىسقا بارلىعى سەگىز اقىن, اتاپ ايتقاندا, الدى رەسپۋبليكالىق دودالاردا جۇلدە الىپ جۇرگەن اينابەك بيسەنعاليەۆ, ەلدار يحسانوۆ, ورىنبەك مەڭدىقۇلوۆ, ازامات بازارباەۆ, تالعات مىقي, الشىنبەك مۇقانعاليەۆ, مۇرادىم ميرلانوۆ, دانيار نىسانعاليەۆ قاتىسىپ, باق سىنادى. ولار تاۋەلسىزدىك, ەلدىك پەن بىرلىك تاقىرىبىن جىرلاۋمەن بىرگە قازىرگى تاڭداعى كەيبىر كەلەڭسىزدىكتەردى سىناپ, ءبىر-ءبىرىن ءازىل-قالجىڭمەن شىمشىلاي دا الدى. قۇرامىندا ايتقالي نارىكوۆ, داريعا مۇشتانوۆا, ەرتاي بيمۇحانوۆ سىندى اقىندار بار قازىلار القاسىنىڭ شەشىمىمەن اينابەك بيسەنعاليەۆ ءبىرىنشى, دانيار نىسانعاليەۆ ەكىنشى, ورىنبەك مەڭدىقۇلوۆ ءۇشىنشى ورىندى يەلەنىپ, ديپلومدارمەن, باعالى سىيلىقتارمەن ماراپاتتالدى. قالعان قاتىسۋشىلارعا العىسحاتتار مەن ەستەلىك سىيلىقتار تابىس ەتىلدى. «بارلىعى ءتورت جۇپ ارقايسىسى جارتى ساعاتتان ايتىسىپ, ساحنا الاڭىن مايدان جاسادى.  اراسىندا ناعاشى مەن جيەن اراسىنداعى ءزىلسىز شەكىسۋ مەن بەكىسۋ, قاعىتپا مەن كۇيدىرمەنىڭ ۇلگىسىن كورسەتكەندەرى دە, جاس بولسا دا, «اعاسىنا» بەرىسپەي, تاۋىپ ايتقاندارى دا, سونداي-اق ءبىر-بىرىمەن اڭگىمەلەرى جاراسپاي, ۇيلەسپەگەندەرى دە بولدى. ەڭ باستىسى, ازاتتىق, جەلتوقسان كوتەرىلىسى, جەر-سۋ اتاۋلارى, ازاماتتىق ۇستانىم توڭىرەگىندە باتىل ايتىپ, ءوز كوزقاراس-پايىمدارىن كورسەتە ءبىلدى», – دەدى اقىن, قازىلار القاسىنىڭ مۇشەسى داريعا مۇشتانوۆا.