رەسەيدىڭ سانكت-پەتەربۋرگ قالاسىندا ءوتىپ جاتقان جاسوسپىرىمدەر اراسىندا بوكستان الەم چەمپيوناتىنىڭ جارتىلاي فينالىنا قازاقستاننىڭ 4 بوكسشىسى شىقتى. بۇل تۋرالى قازاقستان بوكس فەدەراتسياسىنىڭ ءباسپاسوز قىزمەتى حابارلادى.
سونىمەن شيرەك فينالدىق كەزدەسۋلەر بارىسىندا 52 كەلى سالماق ساناتىندا شارشى الاڭعا شىققان ايدوس اراپوۆ كۋبالىق قارسىلاسى ەليو كرەسپوعا ەسە جىبەرسە, اسا اۋىر سالماقتاعى بوكسشىمىز ابولدى داۋرەن ۇلى گرۋزين گەورگي چيگلادزەگە ۇتىلدى. ال بەكزات نۇرداۋلەتوۆ (81 كەلى) يرلاندىق كريس ورەيليدى تازا ۇتسا, بەك نۇرماعامبەت (75) امەريكالىق نيكيتا ابابيدەن باسىپ ءتۇستى. ءساماتالى تولتاەۆ (56) تۇرىك بوكسشىسى الي يحسان الاگاستىڭ جولىن كەسسە, سادريددين احمەدوۆ (69) كەزدەسۋدىڭ ءۇشىنشى راۋندىندا قىرعىز بوكسشىسى ايبەك اقىلبەك ۇلىن نوكاۋتقا ءتۇسىردى.
26 قاراشا كۇنى وتەتىن جارتىلاي فينالدىق كەزدەسۋدە سامات تولتاەۆ اۆستراليالىق سەم گۋدمانمەن ايقاسادى. ال بەك نۇرماعامبەتتىڭ قارسىلاسى نەمىس ۆەزير اگيرمان. سادريددين احمەتوۆ بريتاندىق موحاممەد اكبارمەن كىم مىقتىنى انىقتايدى. بەكزات نۇرداۋلەتوۆ بولسا ۋكرايندىق رومان ساۆيتسكيمەن شارشى الاڭدا كەزدەسەدى.
ايتا كەتەرلىگى, بۇل جەكپە-جەكتەردى Kazsport تەلەارناسى تىكەلەي كورسەتەتىن بولادى.
