كوكشەتاۋدا ستۋدەنتتەر ءۇيى اشىلدى

ەل تاۋەلسىزدىگىنىڭ 25 جىلدىق مەرەيتويى قارساڭىندا ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ 310 ورىندىق ستۋدەنتتەر ءۇيى پايدالانۋعا بەرىلدى. اقمولا وبلىسىنىڭ اكىمى سەرگەي كۋلاگين وقۋ ورنىنىڭ ۇجىمىن ايتۋلى وقيعامەن ارنايى كەلىپ قۇتتىقتادى, دەپ حابارلادى BNews.kz. ەرەكشە ۇلگىدەگى جاڭا ستۋدەنتتەر ءۇيى ەلباسى ن.ءا.نازارباەۆتىڭ تىكەلەي تاپسىرماسىمەن جانە قر پرەزيدەنتى اكىمشىلىگىنىڭ باقىلاۋىمەن سالىنعان نىسان. ءبىر اتاپ وتەرلىگى, بۇل عيمارات بيىل رەسپۋبليكا كولەمىندە پايدالانۋعا بەرىلىپ وتىرعان بىردەن-ءبىر ستۋدەنتتەر ءۇيى. «ەل تاۋەلسىزدىگىنىڭ 25 جىلدىق مەرەيتويى قارساڭىندا ءبىزدىڭ وڭىردە دە بىرنەشە ماڭىزدى نىسان ىسكە قوسىلاتىنىن ايرىقشا ايتىپ وتكىم كەلەدى. سونىڭ ءبىرى – ستۋدەنتتەر ءۇيى عيماراتى دەر ەدىم. قازىرگى زامان تالابىنا ساي جابدىقتالعان, ءىشى مەن سىرتى ەستەتيكالىق تالعاممەن سالىنعان نىسان قالا ساۋلەتىن ارتتىرا تۇسەتىنىنە سەنىم مول. وسى ۋاقىت ىشىندە ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى مىڭداعان جوعارى بىلىكتى ماماندى دايارلاپ, ەلىمىزدىڭ ءبىلىم بەرۋ سالاسىنا وراسان زور ۇلەس قوسىپ وتىر. ىرگەلى ۋنيۆەرسيتەت رەتىندە قالىپتاسۋ جولىندا كۇردەلى جانە ۇلكەن بەلەستەردەن ءوتتى. ۋنيۆەرسيتەت تۇلەكتەرىنىڭ قازاقستان رەسپۋبليكاسى ايماقتارىندا عانا ەمەس, سونىمەن قاتار, تاياۋ جانە الىس شەتەلدەردە دە قىزمەت اتقارىپ جۇرگەنىن جانە جوعارى بىلىكتىلىك, جاۋاپكەرشىلىك, بىلىمدارلىق قاسيەتتەرىمەن ەرەكشەلەنەتىندەرىن ۇلكەن ماقتانىشپەن ايتا الامىز», – دەيدى ءوڭىر باسشىسى. بەس قاباتتى عيماراتتا ستۋدەنتتەردىڭ جايلى تۇرۋىنا قاجەتتى جاعدايلار جاسالعان: قاجەتتى جيھازى بار ەكى جانە ءۇش ورىندى, جارىق تا جايلى بولمەلەر, اس دايىندايتىن, كىر جۋىپ, ونى كەپتىرەتىن, ۇتىكتەيتىن زاماناۋي ماشينكالار, سانيتارلىق توراپتار, مەديتسينالىق پۋنكت, پلازمالىق تەلەديدارلار, ءار قاباتتا وقۋ زالدارى, 50 ورىندى كونفەرەنتس-زالى, 120 ورىندى اسحاناسى بار جانە جىلدامدىعى جوعارى WI-FI جەلىسى ىسكە قوسىلعان. بۇدان بولەك, مۇندا كىرىپ-شىققانداردى باقىلاپ, باسقارۋ جۇيەسى ەلەكتروندى-تەحنيكالىق قىزمەتى ورناتىلعان. بۇل جۇيەنىڭ ارتىقشىلىعى – ستۋدەنتتەردىڭ اتا-انالارىنىڭ ءوز ۇيلەرىندە وتىرىپ-اق, بالالارىنىڭ ساباققا قاتىسۋى مەن وقۋ ۇلگەرىمىن, سونداي-اق جاتاقحاناعا كىرىپ-شىعۋىن تىكەلەي باقىلاۋىن قامتاماسىز ەتەدى.