پاۆلوداردا جىلۋى كوپ كومىر شىعارىلا باستادى

پاۆلوداردا ۇزاق ۋاقىت جاناتىن ءارى توزاڭى از بريكەتتەلگەن كومىر ءوندىرىسى ىسكە قوسىلدى, دەپ حابارلادى BNews.kz. زاۋىت وڭتۇستىك كورەيادا شىعارىلعان زاماناۋي جابدىقتارمەن قامتاماسىز ەتىلگەن. ول قاراپايىم كومىرگە قاراعاندا جىلۋدى 4-5 ەسە كوپ بەرەتىن جانە ونى 8 ساعاتقا دەيىن ساقتايتىن كومىردىڭ ەكى ءتۇرى شىعارىلادى. جەكەمەنشىك ۇيلەردىڭ  پەشتەرىنە ارنالعان «سوتان» ماركالى كومىر 24 كگ قاپتارعا بريكەتتەلگەن. ال 3 كگ بريكەتتەرگە قاپتالعان «ەلتان» كومىرى تەك وڭتۇستىك كورەيادا شىعارىلاتىن قازاندىقتارعا ارنالعان. وبلىس اكىمى بولات باقاۋوۆتىڭ ۇيعارىمىمەن 100 قازاندىق اۋىلدىق ايماقتاردا تۇراتىن از قامتىلعان وتباسىلارعا بەرىلەتىن بولادى. زاۋىتتىڭ ءونىمى جەكە ۇيلەردىڭ پەشتەرىنە عانا ەمەس, سونداي-اق وندىرىستىك قازاندىقتاردىڭ پەشتەرىنە دە جارايدى. قۇنى 230 ميلليون تەڭگەنى قۇرايتىن جەكە ينۆەستيتسيالارعا سالىنعان زاۋىت ءار اۋىسىم سايىن 90 توننا بريكەتتەلگەن كومىر شىعارۋعا قاۋقارلى. ال كاسىپورىندا قىزمەت ەتەتىن 18 جۇمىسشىنىڭ  جالاقىسى ورتاشا ەسەپپەن 80 مىڭ تەڭگە.