كوستا-ريكاعا «وتتو» داۋىلى جاقىنداپ كەلەدى

سارسەنبى كۇنى كەشكە كوستا-ريكا پرەزيدەنتى لۋيس گيلەرمو سوليس «وتتو» داۋىلىنىڭ جاعاعا جاقىنداۋىنا بايلانىستى ەل اۋماعىندا توتەنشە جاعداي جاريالادى, دەپ حابارلادى تاسس. توتەنشە قىزمەت باسشىلىعىمەن كەزدەسكەن سوڭ سوليس ءباسپاسوز كونفەرەنتسياسىنا قاتىسىپ, جاقىن ارادا تج رەجيمى تۋرالى قاۋلىعا قول قويۋعا ۋادە بەردى جانە ءوزىنىڭ تۆيتتەر پاراقشاسىندا جەكە سەكتور باسشىلارىنا ءوز قىزمەتكەرلەرىن قورعاۋعا قاجەتتى شارالار جۇرگىزۋگە جانە بەيسەنبى, جۇما, دەمالىس كۇندەرى جۇمىستى ۋاقىتشا توقتاتا تۇرۋعا كەڭەس بەردى. بۇدان بولەك, پرەزيدەنت قاۋىپتىڭ «قىزىل» دەڭگەيىن ەلدەگى تاعى بىرنەشە اۋدانعا ۇلعاياتىنىن حابارلادى. وسىعان دەيىن بيلىك قۇتقارۋ قىزمەتتەرىن تولىق دايىنداپ, جاعاعا جاقىن ورنالاسقان اۋدانداردان 4 مىڭ ادامدى كوشىرگەن بولاتىن. اقش-تىڭ داۋىلدى باقىلاۋ جونىندەگى ۇلتتىق ورتالىعىنىڭ مالىمەتى بويىنشا كاريب تەڭىزىندەگى «وتتو» تروپيكالىق داۋىلى تاعى دا ءبىرىنشى ساناتقا دەيىن كۇشەيگەن. جويقىن جەل قازىرگى ۋاقىتتا كوستو-ريكانىڭ سولتۇستىك-شىعىس جاعالاۋىنان 230 كم قاشىقتىقتا, جىلدامدىعى ساعاتىنا 33,3 شاقىرىمدى قۇرايدى. سونىمەن قاتار, تابيعات اپاتى نيكاراگۋا مەملەكەتىنە دە زيانىن تيگىزەيىن دەپ تۇر. بيلىك قاۋىپتى ايماقتان 10,5 مىڭ ادامدى كوشىرۋ جونىندە شەشىم قابىلدادى. ال پانامادا داۋىلدىڭ سالدارىنان 150 وتباسى زارداپ شەگىپ, 11 ادام ءىز-ءتۇزسىز جوعالىپ كەتتى, سونداي-اق 4 تۇرعىن وپات بولدى.