ارقا توسىندە اكتسيا قىزا ءتۇستى

قاراعاندى وبلىسىندا « ۇلى دالا ەلى – تاۋەلسىزدىكتىڭ 25 نەگىزى» اتتى 25 جۇلدىزدى كۇن اكتسياسى قىزا ءتۇستى. وسى شارالاردىڭ اياسىندا «قاراعاندى وبلىسىنىڭ تاۋەلسىزدىك جىلدارىنداعى جەتىستىكتەرى» اتتى كورمە اشىلىپ, ول 15 جەلتوقسانعا دەيىن جۇمىس ىستەيدى. «25 جۇلدىزدى كۇن» ىشىندە, سونىمەن قاتار, ونەركاسىپتىك, الەۋمەتتىك-مادەني ماقساتتاعى نىساندار اشۋ, جاڭا تۇرعىن ۇيلەردى پايدالانۋعا بەرۋ, قايىرىمدىلىق شارالارى, پاتريوتتىق فلەشموبتار مەن اكتسيالار, بايقاۋلار وتكىزۋ جوسپارلانعان. اكتسيا شەڭبەرىندە وبلىس اۋماعىندا بارلىعى 300-دەن استام شارا ۇيىمداستىرىلماق. سولاردىڭ ىشىندە «جاستار ءداستۇرلى قۇندىلىقتاردى قولدايدى» اتتى رەسپۋب­ليكالىق فورۋم, ەتنومادەني بىرلەس­تىكتەردىڭ تاۋەلسىزدىك جىلدارىن­داعى جەتىستىكتەرىنە ارنالعان «ۇلكەن ەل – ءۇل­كەن وتباسى» كورمەسى,  ۇلىتاۋ كەنتىندە سپورت كەشەنىنىڭ اشىلۋ سالتانا­تى, ءوڭىردىڭ ۇزدىك سپورتشىلارىنىڭ قاتىسۋىمەن «العىس كىتاپ» اكتسياسىنىڭ اياقتالۋى, وتاندىق تاۋار وندىرۋشىلەر جەتىستىكتەرىنىڭ «قازاقستاندا جاسالعان» اتتى كورمەسى, «التاي پوليمەتالل» جشس «كوكتاسجال» كەن ورنىنىڭ بازاسىندا تاۋ-كەن كەشەنىن سالۋ مەن ىسكە قوسۋ» ءىرى جوباسىنىڭ تۇساۋكەسەرى, جەزقازعان قالاسى «جالتىربۇلاق» كەن ورنىنىڭ التىندى كەنىن وڭدەۋگە ارنالعان كەشەننىڭ اشىلۋى, «قازاقستان جاستارى – تاۋەلسىزدىك تولقىنىندا» اتتى رەس­پۋبليكالىق جاستار اكتسياسى, گەمودياليز ورتالىعىنىڭ اشىلۋى, جاس ماماندارعا – شاحتينسك قالاسىن­داعى مەديتسينا ماماندارى مەن ءسات­باەۆ قالاسىنداعى وتباسىلارعا پاتەر كىلت­تەرىن تابىستاۋ ءتارىزدى اۋقىمدى شارالار بولاتىنىن اتاپ وتكەنىمىز ورىندى. ىنتىماعى جاراسقان ەلدىڭ ىرىستى كۇندەرى, جۇلدىزدى ساتتەرى كوپ بولعاي! قايرات ءابىلدينوۆ, «ەگەمەن قازاقستان» قاراعاندى