تۋرنير جەڭىمپازىنا – 10 ميلليون تەڭگە

ورتالىق كوممۋنيكاتسيالار قىزمەتىندە قازاق كۇرەسىنەن وتەتىن «ەۋرازيا بارىسى» حالىقارالىق تۋرنيرىنە ارنالعان ءباسپاسوز ءماسليحاتى بولدى. بۇل تۋرنير بيىل ءتورتىنشى رەت, 1 جەل­توقسان كۇنى الماتى قالاسىندا وتەدى. ءباسپاسوز ءماسليحاتىنا «قازاق­ستان بارىسى» قازاق كۇرە­سىن دامىتۋ قورى قامقور­شىلار كەڭەسى­نىڭ توراعاسى ارمان شوراەۆ, وسى قوردىڭ اتقارۋ­شى ديرەكتورى, قازاق كۇرەسى فەدە­راتسياسىنىڭ ۆيتسە-پرەزي­دەنتى سارسەن قۇرانبەك پەن ءتۇ­يە با­لۋان بەيبىت ىستىباەۆ قاتىستى. وندا ا.شوراەۆ تۋر­نيردىڭ دايىندىعى تۋرالى باياندادى. سونىمەن بىرگە, ول قازاق­ستان كومانداسىنىڭ قۇرامى تۋر­­نيرگە بىرنەشە كۇن قالعاندا انىقتالاتىنىن, «ەۋرازيا بارىسى» تۋرنيرىنە دەيىن قالعان ون كۇن ىشىندە قوس قۇرامداعى بالۋاندار الماتىدا وقۋ-جاتتىعۋ جيىنىن وتكىزەتىنىن ايتتى. ال س.قۇرانبەكتىڭ ايتۋىنشا, وسى جىلى جارىسقا قاتىسۋشىلار قاتارىندا اتى الەمگە ايگىلى بالۋاندار از ەمەس. گرۋزيا قۇراماسىنىڭ ساپىندا سامبودان ءتورت دۇركىن الەم چەمپيونى ۆاحتانگ چيدراشۆيلي, ەكى دۇركىن ەۋروپا چەمپيونى داۆيد لاريوشۆيلي مەن الەم جانە ەۋروپا چەمپيوناتتارىنىڭ جۇلدەگەرلەرى بار. – بيىلعى سىنعا موڭعوليا كومانداسىندا سامبودان الەم چەمپيونى ا.باياراا, دزيۋ­دودان الەمدىك گران-پري تۋرنيرلەرىنىڭ بىرنەشە دۇركىن جۇلدەگەرى ح.گانبولد كەلەدى. وسى ەلدىڭ قۇرامىندا 2014 جىلى «ەۋرازيا بارىسى» اتانعان سپورتشىلار دا بار. تۋرنير وتە قىزىقتى جانە تارتىستى وتەدى دەپ وتىرمىز. ويتكەنى, باسقا ەلدەردىڭ پالۋاندارى دا جەرگە قاراپ قالمايتىن سپورتشىلار. ولاردىڭ اراسىندا ۇلتتىق جەكپە-جەك تۇرلەرى, سونىڭ ىشىندە كۇرەس, بەلدىك كۇرەس جانە تاعى باسقا دا كۇرەس تۇرلەرىنەن الەم چەمپيونى اتاعىن يەلەنگەن بالۋاندار كوپ, – دەدى ول. جيىندا ا.شوراەۆ «ەۋرا­زيا بارىسىنىڭ» جۇلدە قورى 20 ميلليون تەڭگە بولاتىنىن, ءتۋرنيردىڭ جەڭىمپازىنا 10 ميلليون تەڭگە, ەكىنشى ورىن العان بالۋانعا 6 ميلليون تەڭگە, ءۇشىنشى ورىنعا يە بولعان سپورتشىعا 4 ميلليون تەڭگە تاپسىرىلاتىنىن ايتتى. داستان كەنجالين, «ەگەمەن قازاقستان»