ەرتىس وڭىرىندە «مەنىڭ ەلىم – ماڭگىلىك ەل» فورۋمى ءوتتى

ەرتىس وڭىرىندە ەل تاۋەلسىزدىگىنىڭ 25 جىلدىعىنا ورايلاستىرىلعان «مەنىڭ ەلىم – ماڭگىلىك ەل» رەسپۋبليكالىق فورۋمى ءوتتى, دەپ حابارلادى Baq.kz. قازاقستان حالقى اسسامبلەياسى مۇرىندىق بولعان اكتسيادا پاتريوت ۇل-قىزدار باس قوستى. ولار ەلباسى نۇرسۇلتان نازارباەۆتىڭ «ماڭگىلىك ەل» جالپىۇلتتىق پاتريوتتىق يدەياسىن ناسيحاتتاۋدى ماقسات ەتكەن. پاۆلودار وبلىسى اكىمىنىڭ ورىنباسارى باۋىرجان قاسەنوۆ قۇتتىقتاۋ سوزىندە تاۋەلسىزدىك جىلدارى قازاقستان الەم ەلدەرى اراسىندا بەيبىتشىلىك پەن تۇراقتىلىقتىڭ نىشانىنا اينالىپ ۇلگەرگەنىن اتاپ ءوتتى. «قازىرگى تاڭدا پاۆلودار وبلىسى الەۋمەتتىك-ەكونوميكالىق تۇرعىدان تابىستى دامۋدا. جاستارعا قولداۋ كورسەتىلىپ جاتىر. تۇرعىن ۇيلەر, جاتاقحانالار مەن الەۋمەتتىك نىساندار بوي كوتەرۋدە. ەرتىس وڭىرىندە جاستار ساياساتى باعىتىندا تولاعاي تابىستار بار. ماسەلەن, پاۆلودار وبلىسىندا جاستارعا قىزمەت كورسەتۋ ورتالىعى ەلىمىز بويىنشا ءبىرىنشى بولىپ اشىلدى. بۇگىندە وسى ورتالىقتا ىلكىمدى جوبالار جۇزەگە اسىرىلۋدا», – دەدى باۋىرجان قاسەنوۆ. ەسكە سالا كەتسەك, رەسپۋبليكالىق اكتسيا 4 قاراشادا تالدىقورعاندا باستاۋ العان. مەرەكەلىك شارا اياسىندا جاستار «ماڭگىلىك ەل جاستارىنىڭ جەتىستىكتەرى – قازاقستان رەسپۋبليكاسى تاۋەلسىزدىگىنىڭ 25 جىلدىعىنا» اتتى كىتاپقا تىلەكتەرىن جازدى. كەيىن بۇل كىتاپ مەملەكەت باسشىسىنا تابىستالماق. «بۇگىن پاۆلودار قالاسىنا «مەنىڭ ەلىم – ماڭگىلىك ەل» اتتى رەسپۋبليكالىق اكتسياسى ۇيىمداستىرىلدى. «ماڭگىلىك ەل» كىتابى – اكتسيامىزدىڭ نەگىزگى نىشانى. سول كىتاپقا ءاربىر ايماقتىڭ جاستارى ءوزىنىڭ شيرەك عاسىردا جەتكەن جەتىستىكتەرىن جازادى. ەرتىس وڭىرىنەن سوڭ بۇل كىتاپتى شىعىس قازاقستان وبلىسىنىڭ جاستارىنا تابىستايمىز», – دەدى قازاقستان حالقى اسسامبلەياسىنىڭ جاستار بەلسەندىسى ماكسيم سپوتكاي.