زاماناۋي قارۋ مەن اسكەري تەحنيكا ءوندىرىسىنىڭ جايى تالقىلاندى

استانادا قورعانىس مينيسترلىگى مەن قورعانىس جانە اەروعارىش ونەركاسىبى مينيسترلىگىنىڭ بىرلەسكەن كەڭەسى ءوتتى, دەپ حابارلادى primeminister.kz. كۇن تارتىبىندە مينيسترلىكتەر اراسىنداعى ءارى قارايعى ءوزارا ءىس-قيمىل ماسەلەلەرى قارالىپ, وتاندىق قورعانىس-ونەركاسىبى كەشەنىن دامىتۋدىڭ ستراتەگيالىق باعىتتارى تالقىلاندى. قازاقستان قورعانىس ۆەدومستۆوسىنىڭ باسشىسى گەنەرال-پولكوۆنيك س. جاسۇزاقوۆ قورعانىس مينيسترلىگى وتاندىق قورعانىس كاسىپورىندارىنىڭ ونىمدەرى مەن قىزمەتتەرىنە نەگىزگى تاپسىرىس بەرۋشى بولىپ تابىلاتىنىن, جانە اسكەري ءونىمدى جەتكىزىپ بەرۋدىڭ ساپاسى مەن ۋاقىتتىلىعىنا ارميانىڭ جاۋىنگەرلىك قابىلەتتىلىگى مەن جالپى مەملەكەتتىڭ قورعانىس قابىلەتتىلىگى تىكەلەي بايلانىستى ەكەنىن اتاپ ءوتتى. قورعانىس مينيسترلىگىنىڭ حابارلاۋىنشا, كەڭەس بارىسىندا زاماناۋي قارۋ-جاراق پەن اسكەري تەحنيكانىڭ جوعارى تەحنولوگيالىق ءوندىرىسىن ءارى قاراي رەتكە كەلتىرۋ ماقساتىندا قارۋ-جاراقتىڭ نەگىزگى تۇرلەرىنە تەحنيكالىق قىزمەت كورسەتۋ جانە جوندەۋ جۇيەسى بويىنشا تۇجىرىمدامالىق ۇسىنىستار ەگجەي-تەگجەيلى پىسىقتالدى. ەستەرىڭىزگە سالا كەتسەك, قورعانىس جانە اەروعارىش ونەركاسىبى مينيسترلىگى قازاقستان رەسپۋبليكاسى پرەزيدەنتىنىڭ 2016 جىلعى 6 قازانداعى  №350 جارلىعىنا سايكەس قۇرىلعان بولاتىن.