ارنايى جاساق قىزمەتكەرىنە ءمينيستردىڭ العىس حاتى تابىستالدى

12 جاستاعى بالانى قۇتقارعان استانا قالاسى ءىىد جەدەل قيمىلدايتىن ارنايى جاساقتىڭ اعا ينسپەكتورى پوليتسيا كاپيتانى ءومىرجان تەمىربەكوۆ پاۆلوداردا وتكەن «قازىرگى زامان قاھارمانى» رەسپۋبليكالىق بايقاۋىنا قاتىستى, دەپ حابارلادى ەلوردالىق ءىىد-ءنىڭ ءباسپاسوز قىزمەتى. اتالمىش ءىس-شارا ەرلىكپەن قازا تاپقان ىشكى ىستەر ورگاندارىنىڭ قىزمەتكەرى پوليتسيا كاپيتانى,  «حالىق قاھارمانى» عازيز بايتاسوۆتى ەسكە الۋدىڭ قۇرمەتىنە وتكىزىلدى. شاراعا بەيبىت زاماندا وزدەرىنىڭ قىزمەتتىك مىندەتتەرىن ورىنداۋ كەزىندە ەرلىك پەن قاھارماندىق تانىتقان پوليتسەيلەر قاتىستى. ەسكە سالار بولساق, وقيعا 9 ماۋسىم كۇنى ساعات شامامەن 12:30-دا  187 كوشەسى بويىنداعى سارىبۇلاق وزەنىندە بولدى. جۇمىسقا بەت العان پوليتسەي وزەن بويىندا جيىلىپ تۇرعان بالالاردىڭ كومەككە شاقىرىپ, وزەن جاققا قولدارىن سىلتەپ تۇرعانىن كورگەن. ول ۋاقىت سوزباي, بىردەن سۋعا سەكىرىپ ءتۇسىپ بالانى كوتەرىپ الىپ شىققان. پوليتسيا كاپيتانىنىڭ ايتۋىنشا بالانىڭ ءجۇزى كوكپەڭبەك بولىپ, تىنىس الماي جاتقان. الايدا, ونىڭ ءومىرىن ساقتاپ سالۋعا بارىنشا تىرىسقان ءومىرجان العاشقى مەديتسينالىق كومەكتى كورسەتۋگە كىرىسكەن. بالانىڭ كەۋدەسىنە تىكەلەي ماسساج جاساپ, جاساندى دەم بەرگەن. ونى كوتەرىپ الىپ, دەنەسىن تىزەسىنە قويىپ, باسىن تومەنگە قاراتىپ جۇتىپ قويعان سۋدى دەنەسىنەن شىعارعان. بىرنەشە رەت وسىلاي قايتالاعان سوڭ تىنىس الا باستاعان. جەدەل جاردەم شاقىرىپ, بالانى باقىلاۋىندا ۇستاعان. العاشقى مەديتسينالىق كومەكتى دۇرىس كورسەتۋدى اتىس-قىزمەتتىك دايىندىق جۇيەسىندە ۇيرەنگەن داعدىلارىن ءىس-جۇزىندە قولدانعان. جەدەل جاردەم قىزمەتكەرلەرى كورسەتكەن العاشقى مەديتسينالىق كومەكتىڭ دۇرىس جاسالعاندىعىن ايتتى. بالانىڭ اناسى جانار ايتۋرەەۆا ۇلىنىڭ ومىرىنە اراشا تۇسكەن قۇتقارۋشىعا العىس ايتىپ, قىزمەتىنە تابىس تىلەدى. ەرلىك تانىتقان ءۇشىن ىشكى ىستەر ءمينيسترى پوليتسيا گەنەرال-پولكوۆنيگى كالمۇحامبەت قاسىموۆتىڭ اتىنان ءومىرجان تەمىربەكوۆكە گراموتا, قۇقىق قورعاۋ ورگانى مۇسىنشەسى مەن قولساعات تابىستالدى.