ەلباسى: قازاقتىڭ جەرىنە جانى اشيتىن ەكى ادام بولسا, سونىڭ ءبىرى – مەنمىن

بىرنەشە قازاقستاندىق باق وكىلدەرىمەن كەزدەسۋ كەزىندە مەملەكەت باسشىسى نۇرسۇلتان نازارباەۆ جەر جەكەمەنشىككە بەرىلسە, جەردەن ايىرىلامىز دەپ قورقۋدىڭ ەش قاجەتى جوق ەكەنىن ايتتى. "قازاقتىڭ جەرىنە جانى اشيتىن ەكى ادام بولسا, سونىڭ ءبىرى – مەنمىن. شەكارانى شەگەندەگەن كەزدە 14 مىڭ كيلومەترلىك شەكارانىڭ ءار مەترى ءۇشىن كۇرەستىك. ەش جەردە ەشتەڭەنى بەرمەۋ ءۇشىن, بەرسەك ورنىنا الۋ ءۇشىن. مەن ول قورقىنىشتاردىڭ قايدان شىعاتىنىن بىلەم. كورشىلەر الىپ قويماي ما, ايىرىلىپ قالمايمىز با دەگەندەي... قازاقتىڭ جەرىن ەشكىم ارقالاپ, تيەپ الىپ كەتە المايدى. ول – قازاقستاننىڭ جەرى. قازاقستاننىڭ زاڭدارى بار. ونى باسقالارعا ساتۋعا رۇقسات ەتپەيمىز. جەردى ءوزىمىزدىڭ ازاماتتار, ءوز كاسىپكەرلەرىمىز جەكەمەنشىككە السا دەيمىز, بىراق سونى الاتىن ادامدار جوق بولىپ تۇر عوي قازىر. الۋعا قورى, اقشاسى جەتپەيدى. باتىستا جەرگە جەكەمەنشىك قانداي ەكەنىن بىلەسىزدەر عوي؟ وندا جەردىڭ يەسى بار, وعان ەشكىمدى كىرگىزبەيدى, قورعايدى. تاۋەلسىزدىكتىڭ العاشقى جىلدارىندا ەڭ مىقتى دەگەن ەلۋ سوۆحوز ديرەكتورىن شاقىرىپ, «جەردى الاسىزدار ما؟» دەدىم. كوبى المادى, قورىقتى. ون ادام عانا كەلىستى. قازىر سولار جاقسى دامىپ, گۇلدەنىپ كەتتى. تۇبىندە اۋىل شارۋاشىلىعى قازاقستان ءۇشىن تابىستىڭ ەڭ مىقتى كوزى بولۋى كەرەك" دەدى قازاقستان پرەزيدەنتى.