قوستاناي وبلىسىنىڭ جوعارى وقۋ ورىندارى رەكتورلارى مەن مەملەكەتتىك قىزمەت جانە سىبايلاستىققا قارسى ءىس-قيمىل اگەنتتىگى اۋماقتىق دەپارتامەنتىنىڭ باستىعى مەموراندۋمعا قول قويدى. وعان 8 جوعارى وقۋ ورنىنىڭ باسشىلارى مەن وقىتۋشىلارى, ستۋدەنتتەر قاتىستى. وندا سويلەگەندەر جوعارى وقۋ ورىندارىندا وقيتىن ستۋدەنتتەر اراسىندا سىبايلاستىققا «نولدىك» توزىمدىلىك بولۋدى قالىپتاستىرۋ ءۇشىن باستى پارمەندى ءتۇسىندىرۋ جانە تاربيەلىك جۇمىستارعا سالۋ كەرەكتىگىن ايتتى.
«ءسىز بەن ءبىزدىڭ باستى ماقساتىمىز—سىبايلاس جەمقورلىق جاستار اراسىندا قىلمىسپەن تەڭ ۇيات نارسە بولىپ قابىلدانۋىن قالىپتاستىرۋ بولىپ تابىلادى. ءبىلىم الۋ—قىزمەت ءتۇرى, ول ءۇشىن مەملەكەت نەمەسە ستۋدەنتتىڭ اتا-اناسى قارجى تولەيدى. سوندىقتان پروفەسسورلىق-وقىتۋشىلىق قۇرام مەن ستۋدەنتتەر جاستاردىڭ ساپالى ءبىلىم الۋى كەرەكتىگىن ءتۇسىنۋى ءتيىس. وقىتۋشى ستۋدەنتكە اقىلى نەگىزدە ساپالى ءبىلىم ۇسىناتىنىن ءتۇسىنۋى كەرەك. ال سىبايلاستىق ورىن العان كەزدە ونىڭ زالالى ەڭ الدىمەن ءبىلىم الىپ جاتقان ستۋدەنتكە تيەدى.سىبايلاستىق ورىن الدى دەگەنشە ستۋدەنتتىڭ ءبىلىم ساپاسى بىردەن ناشارلايدى» دەدى قوستاناي مەملەكەتتىك پەداگوگيكالىق ينستيتۋتىنىڭ رەكتورى, پروفەسسور ەركىن ءابىل. ول ستۋدەنتتەردى سىبايلاستىق ورىن العاندا ۇندەمەي قالماۋعا, توزبەۋگە شاقىردى.
دەپارتامەنت پەن وقۋ ورىندارىنىڭ باسشىلارى مەموراندۋم شەڭبەرىندە سىبايلاستىققا قارسى جاستار فلەشموبى, ساراپشىلار كلۋبىن قۇرۋ سەكىلدى ءتۇرلى شارالاردى دا جوسپارلاۋعا كەلىستى. دەپارتامەنت تەك جوعارۋ وقۋ ورىندارىمەن عانا ەمەس, جالپى ءبىلىم سالاسىندا سىبايلاستىققا قارسى جۇمىس جۇرگىزەتىن بولادى.
«ءبىلىم باسقارماسىمەن كەلىسە وتىرىپ, وبلىستاعى جالپى ءبىلىم بەرەتىن بارلىق مەكتەپتەردە «ادال ۇرپاق» پاتريوتتىق كلۋبتارىن قۇرۋ تۋرالى جۇمىستار جۇرگىزىلدى. 2016 جىلى وبلىستاعى 529 مەكتەپتىڭ 417-دە وسىنداي كلۋب قۇرىلدى. بالانى جاستان ادالدىققا ۇيرەتۋگە كلۋبتاردىڭ قوسار ۇلەسى بولادى دەپ بىلەمىز» دەدى مەملەكەتتىك قىزمەت جانە سىبايلاس جەمقورلىققا قارسى ءىس-قيمىل دەپارتامەنتىنىڭ باستىعى بەرىك بەكجانوۆ.
دەپارتامەنت پەن جوعارى وقۋ ورىندارى اراسىنداعى قول قويىلعان مەموراندۋم قوعامدىق كەسەلگە قارسى ولاردىڭ كۇش بىركتىرۋىنە مۇمكىندىك جاسايدى.
ءنازيرا جارىمبەتوۆا
«ەگەمەن قازاقستان»
