سۇحباتتىڭ ءۇزىندىسى اقوردانىڭ فەيسبۋكتەگى پاراقشاسىندا جاريالاندى. «جاڭا سايلاۋدان كەيىن جانە ۇيلەنۋ تويدان كەيىن ءبارى كۇتكەنىڭدەي بولا بەرمەيدى دەگەن جاقسى ءسوز بار, – دەپ قالجىڭمەن باستادى جاۋابىن نۇرسۇلتان نازارباەۆ. – ادامدار نەگە جاڭا سايلاۋدى كۇتەدى؟ پارلامەنت 2021 جىلعا دەيىن سايلاندى. ياعني, ول سول مەرزىمدى تولىق اتقارىپ شىعادى». اڭگىمە بارىسىندا مەملەكەت باسشىسى قازىرگى كۇن تارتىبىندەگى باسقا دا وزەكتى ساۋالدارعا جاۋاپ بەردى.
اتاپ ايتار بولساق, «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدى ىسكە اسىرۋ اياسىندا ەل ەكونوميكاسىن ترانسفورماتسيالاۋ ۇدەرىسىنىڭ بىرقاتار اسپەكتىلەرى, سىبايلاس جەمقورلىققا قارسى كۇرەس ماسەلەلەرى, قازىرگى ساياسي جاڭعىرۋ كەزەڭىنىڭ ەرەكشەلىكتەرى, بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قازاقستاننىڭ سىرتقى ساياسي باسىمدىقتارى, سونداي-اق باسقا دا ماڭىزدى جايتتار تالقىلاندى. كەزدەسۋگە «قازاقستان», «حابار», «مير» تەلەارنالارىنىڭ, «ايقىن» گازەتىنىڭ, «Esquire» جۋرنالىنىڭ, «قازاقپارات» اقپارات اگەنتتىگىنىڭ جۋرناليستەرى قاتىستى.
