نيدەرلاندتاعى سايلاۋ: وڭشىلدار ليدەرى جەڭىلگەنىن مويىندادى

15 ناۋرىز كۇنى نيدەرلاندتا پارلامەنتتىك سايلاۋ ءوتتى. الدىن الا مالىمەتتەر بويىنشا, قازىرگى پرەمەر-مينيستر مارك ريۋتتەنىڭ وڭشىل ليبەرالدىق ازاتتىق جانە دەموكراتيا ءۇشىن حالىق پارتياسى جەڭىسكە جەتتى, دەپ جازادى ۆۆس. NOS نيدەرلاند ۇلتتىق تەلەراديوكومپانياسىنىڭ تاپسىرىسىمەن جاسالعان ەسەپ بويىنشا, ريۋتتە باسقاراتىن ازاتتىق جانە دەموكراتيا ءۇشىن حالىق پارتياسى پارلامەنتتەگى 150 ورىننىڭ 31 مانداتىن يەلەنەدى. ال ولاردىڭ باستى قارسىلاستارى - ۋلتراوڭشىلدار, گەرت ۆيلدەرستىڭ ازاتتىق پارتياسى 19 مانداتتى يەلەندى. وسىعان وراي گەرت ۆيلدەرس ء"بىز 19 نەمەسە 20 ماندات الۋىمىز مۇمكىن. بۇل مەن كۇتكەندەي ناتيجە ەمەس. دەگەنمەن, ءبىزدىڭ جەڭىمپازدار قاتارىنان كورىنگەنىمىز دە جاقسى ناتيجە", دەدى. ال قازىرگى پرەمەر-مينيستر مارك ريۋتتە نيدەرلاند حالقى "قاۋىپتى پوپۋليزمگە" قارسى داۋىس بەرگەنىن ايتتى. وسى سىنعا ءوز پىكىرىن بىلدىرگەن ۆيلدەرس "ونىڭ نەنى مەڭزەپ تۇرعانىن تۇسىنبەدىم. ول (ريۋتتە - رەد.) جاقسى جانە جامان پوپۋليزم بولاتىنىن ايتتى. مەنى ەكىنشى قاتارعا قوستى. مەن ءوزىمدى ءپوپۋليستپىن دەپ ەسەپتەمەيمىن", دەدى. ۆيلدەرس سايلاۋالدى كامپانياسىندا دونالد ترامپتىڭ لوزۋنگتەرىن ءجيى قولدانعاندىقتان "پوپۋليست" اتانىپ كەتكەن بولاتىن. ءبىر ايتا كەتەرلىگى, ريۋتتەنىڭ جەڭىسىن گەرمانيا مەن فرانتسيا جاقسى قابىلدادى. گەرمانيا كانتسلەرى انگەلا مەركەل اپپاراتىنىڭ باسشىسى پەتەر التمايەر تۆيتتەر پاراقشاسىندا "نيدەرلاند! سىزدەر چەمپيونسىزدار! سايلاۋدىڭ كەرەمەت ناتيجەسى قۇتتى بولسىن", دەپ جازدى. ال فرانتسيانىڭ سىرتقى ىستەر ءمينيسترى جان-جاق ەيرو "اسىرە وڭشىلداردىڭ كوتەرىلۋىنە جول بەرمەگەن گوللاندىقتاردى قۇتتىقتايمىن", دەپ جازدى. جالپى, نيدەرلاند پارلامەنتىنە وتەتىن پارتيا سانى كوپ بولعاندىقتان, مەملەكەتتىك ۇكىمەتتە 100 جىلدان استام ۋاقىت بويى كواليتسيالار قۇرىلادى. ال سايلاۋ باستالماس بۇرىن مەملەكەتتەگى بارلىق پارتيالار ۆيلدەرسپەن كواليتسيا قۇرۋدان باس تارتقان بولاتىن. سايلاۋدا ءۇشىنشى ورىندا 16 دەپۋتات مانداتىن يەلەنگەن ريۋتتەنىڭ باسقارۋشى كواليتسياسىنىڭ سەرىكتەستەرى - «جاسىل سولشىلدار» تۇرسا, 14 مانداتى بار سوتسياليستتىك پارتيا ءتورتىنشى ورىن الدى. بيىل سايلاۋعا حالىقتىڭ 81 %-ى قاتىسقان. 2012 جىلى بۇل كورسەتكىش 73 % بولعان. سايلاۋدىڭ رەسمي قورىتىندىسى بىرنەشە ساعاتتان كەيىن بەلگىلى بولادى.