اليك ايدارباەۆ قر ينۆەستيتسيالار جانە دامۋ ءبىرىنشى ۆيتسە-ءمينيسترى بولىپ تاعايىندالدى. بۇل تۋرالى قر ينۆەستيتسيالار جانە دامۋ مينيسترى جەڭىس قاسىمبەك فەيسبۋكتەگى پاراقشاسىندا جاريالادى.
“بۇگىن ۇجىمعا قازاقستان رەسپۋبليكاسى ينۆەستيتسيالار جانە دامۋ ءبىرىنشى ۆيتسە-ءمينيسترى بولىپ تاعايىندالعان اليك ايدارباەۆتى تانىستىردىم. اليك ايدارباەۆ مەملەكەتتىڭ ماڭىزدى سالالارىندا قىزمەت اتقارىپ كەلە جاتقان اسا تاجىريبەلى تۇلعا. ەلباسىنىڭ سەنىمىنە يە بولعان مىقتى ۇيىمداستىرۋشى, ىسكەر باسشى رەتىندە ءوزىن ماڭعىستاۋ وبلىسىنىڭ اكىمى بولىپ تۇرعاندا جانە وعان دەيىنگى قىزمەتتەرىندە جان-جاقتى كورسەتكەن ەدى. ەندىگى رەتتە اليك سەرىك ۇلىن تاعى دا ۇلكەن جۇمىستار, جاڭا مىندەتتەر كۇتىپ تۇر. اسا تاجىريبەلى ماماننىڭ كەلۋىمەن مينيسترلىك جۇمىسى ودان ءارى جاندانىپ, مەملەكەت باسشىسى مەن ۇكىمەت جۇكتەگەن مىندەتتەردى ويداعىداي اتقارامىز دەگەن سەنىمدەمىن”, دەپ جازدى مينيستر. اليك سەرىك ۇلى ايدارباەۆ 1963 جىلى 19 مامىردا الماتى وبلىسىندا دۇنيەگە كەلگەن. ۆ.لەنين اتىنداعى قازاق پوليتەحنيكالىق ينستيتۋتىن بىتىرگەن. اعا گەولوگ, كەيىننەن تەحنولوگ, مۇناي جانە گاز ءوندىرۋ شەبەرى, «ماڭعىشلاقمۇناي» ءوب, «جەتىبايمۇناي» مگوب مۇناي جانە گاز ءوندىرۋ تسەحى باستىعىنىڭ ورىنباسارى قىزمەتتەرىن اتقاردى. «تورعاي پەترولەۋم» جانە «ماڭعىستاۋمۇنايگاز» اق باس ديرەكتورى قىزمەتتەرىندە بولدى. 2011 جىلدىڭ ساۋىرىنەن بەرى – «قازمۇنايگاز» ۇلتتىق كومپانياسى» اق بارلاۋ جانە ءوندىرۋ جونىندەگى باسقارۋشى ديرەكتورى. 2011 جىلدىڭ مامىرىندا ديرەكتورلار كەڭەسىنىڭ كەزەكتەن تىس وتىرىسىندا ديرەكتورلار كەڭەسىنىڭ توراعاسى بولىپ سايلاندى. 2011 جىلدىڭ جەلتوقسانىندا «قازمۇنايگاز» بارلاۋ ءوندىرۋ» اكتسيونەرلىك قوعامىنىڭ باس ديرەكتورى, 2013 جىلدان 2017 جىلعا دەيىن ماڭعىستاۋ وبلىسىنىڭ اكىمى بولدى. «قۇرمەت», «پاراسات» وردەندەرىمەن ماراپاتتالعان.
