گولوۆكين نە ءۇشىن اتاقتى بوكسشىلارمەن جۇدىرىقتاسپايدى؟

جاتتىقتىرۋشى ابەل سانچەس شاكىرتى گەننادي گولوۆكيننىڭ ۇلكەن جەكپە-جەكتەرگە نە سەبەپتى شىعا المايتىنىن مالىمدەدى. بۇل تۋرالى vesti.kz حابارلادى. ول ەڭ الدىمەن قارجى ماسەلەسىنە كەلىپ تىرەلەتىنىن ايتتى. «جۇرت ءبىزدى ىلعي دا تانىمال بوكسشىلارمەن كەزدەسپەيتىنىمىزدى سىنعا الىپ جاتادى. بۇل جەردە ماسەلەنىڭ ءبارى اقشاعا كەلىپ تىرەلەدى. قارسىلاستارىمىزدى جاسقانادى دەپ ايتا المايمىن. بۇل بيزنەس تۇرعىسىندا بولىپ وتىرعان جايت, سەبەبى رينگكە كوتەرىلگەنىڭدە ەشكىمنەن قورىقپايسىڭ, بىراق وزگەلەرمەن سالىستىرعاندا سىياقىسى تىم از», – دەدى سانچەس. «بىراق اقشا ماسەلەسى ءبىزدىڭ باستى ماقساتىمىز بولماۋى شارت. جەكپە-جەككە تىڭعىلىقتى دايىندالىپ, ءۇمىت ارتقان جانكۇيەرلەرىمىزگە جەڭىس سىيلايمىز, كەلەسى كەزدەسۋىمىز دە وسى باعىتتا ءوربيدى. مەنىڭشە, قارجى ماسەلەسى ۋاقىت وتە كەلە ءوز شەشىمىن تابادى», – دەدى گولوۆكيننىڭ باپكەرى. ايتا كەتەيىك, مەكسيكالىق بوكسشى ساۋل الۆارەس گولوۆكينگە ۇسىنىس جاسالعان, قابىل العان جاعدايدا ۇرىس بيىل وتەتىنىن مالىمدەگەن.