اقش-تا "گرەممي" سىيلىعى تابىستالدى

بۇگىن تۇندە لوس-انجەلەس قالاسىندا (اقش) ۇزدىك انشىلەردى, كومپوزيتورلاردى, اقىندار مەن پروديۋسەرلەردى انىقتايتىن بەدەلدى «گرەممي» سىيلىعىن تابىستاۋ ءراسىمى ءوتتى, دەپ جازادى قازاقپارات. بيىل بىردەن ءتورت «گرەممي» سىيلىعىنا 2016 جىلى قايتىس بولعان بريتاندىق روك-ءانشى دەۆيد بوۋي لايىق دەپ تانىلدى. بوۋيدىڭ سوڭعى "Blackstar" پلاستينكاسى «ۇزدىك التەرناتيۆتى البوم» جانە «كلاسسيكالىق ەمەس البومنىڭ ۇزدىك ينجينيرينگى» نوميناتسيالارى بويىنشا جەڭىسكە جەتتى. سونىمەن بىرگە, بوۋي «ۇزدىك روك ورىنداۋشى» جانە «ۇزدىك روك-كومپوزيتسيا» ساناتتارىندا دا توپ جاردى. «البومدى ۇزدىك بەزەندىرۋ» مۇسىنشەسى دە "Blackstar" مۇقاباسىن ازىرلەگەن ديزاينەر دجوناتان بارنبرۋككە بەرىلدى. ءداستۇرلى شارانىڭ تاعى ءبىر جۇلدەگەرى - بريتاندىق ءانشى ادەل. ول «ۇزدىك ۆوكالدىق پوپ-البوم» ("25") جانە «ۇزدىك جەكە پوپ-ورىنداۋ» ("Hello" ءانى ءۇشىن) نوميناتسيالارىندا جەڭىمپاز دەپ تانىلدى. بەلگىلى ءانشى بەيونسە "Formation" انىنە تۇسىرگەن بەينەبايانى ءۇشىن «ۇزدىك مۋزىكالىق ۆيدەو» جۇلدەسىن الدى. سونداي-اق Chance the Rapper ەسىمىمەن تانىمال حيپ-حوپ ورىنداۋشى چانسەلور دجوناتان بەننەتت «ۇزدىك جاس ءانشى» اتاعىنا لايىق دەپ تانىلدى. ول 1993 جىلى چيكاگو قالاسىندا دۇنيەگە كەلگەن.  امەريكالىق پروديۋسەر گرەگ كەرستينگ «جىلدىڭ ۇزدىك پروديۋسەرى» اتاندى. ول ادەل («Hello»), سيا (Chandelier), كەللي كلاركسون سىندى اتاقتى انشىلەرگە پروديۋسەرلىك ەتكەن جانە كەيبىر اندەرىنىڭ بىرلەسكەن اۆتورى بولعان. بۇدان بولەك, «گرەممي» سىيلىعى پوپ, روك, اسپاپ, كانتري, التەرناتيۆ, R&B, رەپ, لاتينو, دجاز باعىتتارى بويىنشا ۇزدىك دەپ تابىلعان ونەر يەلەرىنە دە تابىستالدى. جىل سايىنعى جۇلدەنى تاعايىنداۋ يدەياسىن كاسىبي مۋزىكانتتار 1957 جىلى لوس-اندجەلەستە كوتەردى. ول كەزدە توماس ەديسوننىڭ گرامموفوندى ويلاپ تاپقانىنا 80 جىل تولۋى اتاپ وتىلگەن ەدى. جۇلدەنىڭ اتاۋى («گرەممي») مەن مۇسىنشە فورماسىنىڭ (التىن جالاتىلعان گرامموفون) گرامموفونعا ۇقسايتىنى دا سوندىقتان.