قازاقستاندا 3,1 ميلليون ايەل جالدامالى جۇمىسشى رەتىندە ەڭبەك ەتۋدە

بۇگىنگى تاڭدا قازاقستاندا 3,1 ميلليون ايەل جالدامالى جۇمىسشى رەتىندە ەڭبەك ەتۋدە.  2010 جىلدان بەرى ولاردىڭ سانى 650 مىڭعا ارتقانى بايقالۋدا. بۇل تۋرالى بۇگىن قر ەڭبەك جانە الەۋمەتتىك قورعاۋ ءمينيسترى تامارا دۇيسەنوۆا استانادا وتكەن «كورپوراتيۆتىك سەكتوردا ايەلدەردىڭ مۇمكىندىكتەرىن كەڭەيتۋ» اتتى حالىقارالىق فورۋمدا مالىمدەدى. قازاقستاندىق ايەلدەردىڭ 19%-ى ساۋدا-ساتتىقتا, 18%-ى - ءبىلىم بەرۋ جانە دەنساۋلىق ساقتاۋ سالالارىندا, 8,6%-ى - الەۋمەتتىك قىزمەت كورسەتۋ سالالارىندا قىزمەت ەتەدى. جۇمىسسىز ساناتقا كىرەتىن ايەلدەردىڭ 3/1-ءى بالا كۇتىمىنە بايلانىستى ەڭبەك دەمالىسىندا ءجۇر. سونىمەن قاتار مينيستر ەڭبەككە جارامدى جاستاعى ايەلدەر اراسىندا جۇمىسسىزدىقتىڭ ءورشىپ كەتۋ قاۋپى بارىن ايتتى. ونىڭ ايتۋىنشا, اتالمىش پروبلەما بارلىق الەم ەلدەرىندە بايقالا باستاعان. "حالىقارالىق ەڭبەك ۇيىمىنىڭ ساراپشىلارىنىڭ ايتۋىنشا, الەمدە 29-34 جاستاعى ايەلدەر اراسىندا جۇمىسسىزدىق بەلەڭ العان. بىزدەگى جاعداي وزگەشە, سەبەبى ءبىزدىڭ ءومىر سالتىمىز بەن ەكونوميكامىز باسقا. بىزدە جۇمىسسىز قالۋدىڭ ۇلكەن قاۋىپى 45 جاستان كەيىن نەمەسە 15 پەن 24 جاس ارالىعىندا كوبەيەدى. بۇل ءبىزدىڭ ەرەكشەلىك پەن دەموگرافيالىق ۇردىسىمىزگە تاۋەلدى دەسە دە بولادى. ەگەر ءبىز بولاشاقتا الەمدەگى وسى جۇمىسسىزدىق ۇردىسىمەن الدىن الا كۇرەسپەيتىن بولساق, قازاقستانداعى جاعداي الەمدەگى جۇمىسسىزدىقپەن پارا-پار بولىپ كەتۋى دە عاجاپ ەمەس", - دەدى دۇيسەنوۆا.