ءماجىلىس دەپۋتاتتارى اقمولا وبلىسىنا جۇمىس ساپارىمەن باردى

اقمولا وڭىرىنە كەزەكتى ءىس ساپارمەن كەلگەن قر پارلامەنتى ءماجىلىسىنىڭ دەپۋتاتتارى ساپار احمەتوۆ, ەرسۇلتان بەكتۇرعانوۆ, جانات جاراسوۆ, جەكسەنباي دۇيسەباەۆ جانە ميحايل چيركوۆ ءوز كەزدەسۋلەرىن وبلىستىق «نۇر وتان» پارتياسى اكتيۆىنەن باستادى. حالىق قالاۋلىلارى بۇقارامەن كەزدەسۋ بارىسىندا پارلامەنت اتقارعان جۇمىسىمەن تانىستىردى. سونداي-اق, ەلباسىنىڭ ساياساتىن جۇزەگە اسىرۋداعى نەگىزگى اتقارىلعان جۇمىستارىنا ەسەپ بەرىپ, بىرقاتار سۇراقتارعا جاۋاپ بەردى, دەپ حابارلايدى baq.kz. پارتيا اكتيۆىمەن وتكەن كەزدەسۋدەن سوڭ, دەپۋتاتتار ودان ءارى «سينەگوريا» كوكشەتاۋ ءسۇت زاۋىتىنىڭ جۇمىسىمەن تانىستى. حالىق قالاۋلىلارى ءسۇت ءوندىرىسى بارىسىندا قولداناتىن زاماناۋي تەحنولوگيالاردى كورىپ, ءسۇت ونمدەرىنە جوعارعى باعا بەردى. «سينەگوريا» كوكشەتاۋ ءسۇت زاۋىتى» جشس – قازاقستان مەن رەسەي نارىعىن ساپالى ءسۇت ونىمدەرىمەن قامتاماسىز ەتىپ وتىرعان بىرەگەي وڭدەۋشى زاۋىت. مۇندا كونسەرۆانتتار قولدانباي, ۇزاق مەرزىمگە ساقتالاتىن ءونىم شىعارۋعا مۇمكىندىك بەرەدى. سونىمەن قاتار, زاۋىت تاۋلىگىنە 12 توننا ءسۇت ونىمدەرىن شىعارادى. مەكەمەدە 80-نەن استام ادام قىزمەت ەتەدى. بۇدان ءارى ءماجىلىس دەپۋتاتتارى وبلىس ورتالىعىندا ورنالاسقان قر ءىىم-نە قارايتىن كوكشەتاۋ تەحنيكالىق ينستيتۋتىنىڭ وقىتۋشى-پروفەسسورلىق قۇرامىمەن جانە كۋرسانتتارمەن كەزدەسىپ, ولاردىڭ ماتەريالدىق-تەحنيكالىق بازاسىمەن تانىستى. بۇگىندە جوعارعى وقۋ ورنى قابىرعاسىندا 600 كۋرسانت ءبىلىم الىپ جاتىر, ولاردىڭ ىشىندە رەسەي مەن بەلارۋس مەملەكەتتەرىڭ ازاماتتارى دا بار. بولاشاق ءورت ءسوندىرۋشى ماماندار تولىعىمەن مەملەكەت قاراماعىندا.