بيىل 10 ماۋسىم جانە 10 قىركۇيەك ارالىعىندا استانا قالاسىندا وتەتىن حالىقارالىق «ەكسپو-2017» كورمەسى 2017 جىلعى قازاقستانداعى نەگىزگى وقيعاعا اينالادى. وسىعان وراي, بۇگىن قر ۇلتتىق اكادەميالىق كىتاپحانادا «استانا EXPO-2017 – «بولاشاقتىڭ قۋاتى» تاقىرىبىندا مازمۇندى كىتاپ كورمەسى اشىلدى.
كورمەنىڭ اشىلۋ سالتاناتىنا جازۋشى, فيلولوگيا عىلىمدارىنىڭ دوكتورى, پروفەسسور تۇرسىن جۇرتباي, فيلولوگيا عىلىمدارىنىڭ دوكتورى, پروفەسسور راحىمجان تۇرىسبەكوۆ, بەلگىلى اقىن باحىتجان توباياقوۆ, قر ۇلتتىق اكادەميالىق كىتاپحاناسى باسشىسىنىڭ ورىنباسارى ءاليا قوجابەكوۆا جانە «ەكسپو-2017» كورمەسى بيلەت وپەراتورىنىڭ رەسمي وكىلى ۆيتالي ليۋ قاتىستى.
كورمەنىڭ ماقساتى – قازاقستان تاۋەلسىزدىگىنىڭ اسا باي تاريحىن اشىپ سيپاتتاۋ, سول شەجىرەدەگى حالىقارالىق «ەكسپو-2017» كورمەسىن جارقىن بەتتەرگە اينالدىرۋعا ۇندەۋ, ەلوردا قوناقتارى مەن كىتاپحانا وقىرماندارىن ەكسپو تاريحىمەن تانىستىرۋ; «ەكسپو-2017» كورمەسى قارساڭىندا قر ۇلتتىق اكادەميالىق كىتاپحاناسىنىڭ جوبالارى مەن استاناداعى «ەكسپو-2017» كورمەسىن وتكىزۋ تۋرالى اڭگىمەلەۋ.
كورمە كەلەسىدەي ءتورت بولىمنەن تۇرادى: «ەكسپو تاريحى», «استانا ەكسپو-2017», «قازاقستان», «بولاشاقتىڭ قۋاتى». سورەلەرگە 400-دەن اسا كىتاپ قويىلعان, ولاردىڭ اراسىندا «لوندوننان استاناعا دەيىن حالىقارالىق كورمە تاريحى» اتتى بۇكىلالەمدىك كورمەلەر تاريحى تۋرالى ءۇش تومدىق كىتاپ بار. ءبىرىنشى توم 1851-1933 جىلداردى, ەكىنشىسى – 1935-1968 جج., ءۇشىنشىسى – 1970-2017 جىلدار ارالىعىن قامتىعان.
كورمەنىڭ مۋزىكالىق بولىمىندە كىتاپحانا مامانى بەكزات سماعۇلوۆتىڭ ورىنداۋىندا ەكى ءان شىرقالدى. ءبىرىنشىسى – حالىق ءانى «بالقاديشا». ەسكەرەتىن جايت, 1925 جىلى پاريج قالاسىندا وتكەن ەكسپو كورمەسىندە وسى ءاندى امىرە قاشاۋباەۆ ورىنداعان ەكەن. ەكىنشى ورىندالعانى – «مەنىڭ ەلىم», بۇل ءاننىڭ ءسوزىن قازاقستان رەسپۋبليكاسىنىڭ پرەزيدەنتى ن.ءا. نازارباەۆ, مۋزىكاسىن بەكبولات تىلەۋحان جازعان.
كىتاپ ەكسپوزيتسياسىنىڭ اشىلۋى وقىرماندار مەن شەتەلدىك قوناقتاردىڭ قازاقستان, ەكسپو تۋرالى بىلىمدەرىن تەرەڭدەتۋگە, قازاقستاندىقتاردىڭ ەلىمىزدە وتكىزىلىپ جاتقان وقيعالارعا بەلسەندى قاتىسۋىنا, قازاقستاندىق پاتريوتيزمگە تاربيەلەۋگە جانە ءوز ەلىنە دەگەن ماقتانىش سەزىمدەرىن وياتۋعا سەپتەسەدى.
ەكسپو قوناقتارىن قازاقتىڭ جازبا تاريحىمەن جانە كىتاپتارمەن تانىستىرۋ ماقساتىندا 2014 جىلى قر ۇلتتىق اكادەميالىق كىتاپحاناسىندا كىتاپ مۇراجايى اشىلدى. 2016 جىلى كىتاپحانادا «قازاقستان رەسپۋبليكاسىنىڭ 2017 جىلى اتالىپ وتىلەتىن جانە ەسكە الىناتىن كۇنتىزبەسى» شىعارىلدى. كۇنتىزبەدە ەرەكشە ورىن ەكسپو-2017 كورمەسىنە بەرىلگەن. بۇل ەڭبەكتە سان الۋان ماتەريالدار, سونىمەن قاتار بۇكىلالەمدىك كورمەلەر تاريحى, ەكسپو-نىڭ نەگىزگى حرونولوگياسى, ەكسپو-نىڭ شىعۋ تاريحى جانە «استانا. ەكسپو-2017 «بولاشاقتىڭ قۋاتى» بويىنشا اقپاراتتار بەرىلگەن. بۇگىندە كىتاپحانادا سيرەك كىتاپتار مەن قولجازبالار ورتالىعىن قۇرۋ جۇمىستارى جۇرگىزىلۋدە, جاڭا ورتالىق ەكسپو قوناقتارىن قازاقتىڭ جانە الەمنىڭ باسقا دا حالىقتارىنىڭ تاريحي-مادەني سالت-داستۇرلەرى تۋرالى قۇندى اقپاراتتاردان تۇراتىن تاريحي-عىلىمي ماڭىزى ەرەكشە كىتاپ ەسكەرتكىشتەرىمەن تانىس ەتەدى.
