قازاقستاننىڭ وزگە قالاسىنا ۋاقىتشا تۇرۋ ءۇشىن بارعان كەز كەلگەن قازاقستاندىق مىندەتتى تۇردە سول جەردە تىركەلۋى كەرەك. بۇل تالاپتى ورىنداماعان ازامات 16 مىڭ تەڭگەدەن 30 مىڭ تەڭگەگە دەيىنگى ارالىقتا ايىپ تولەيدى. بۇگىن استانادا قر ءىىم كوشى-قون پوليتسياسى دەپارتامەنتى باسشىسىنىڭ ورىنباسارى گالينا سارسەنوۆا جاڭا زاڭنىڭ نەگىزگى نورمالارىن ءتۇسىندىردى. ونىڭ ايتۋىنشا, تۇرعان جەرى بويىنشا تىركەلۋ ادامداردىڭ ەركىن ءجۇرىپ-تۇرۋىنا كەدەرگى جاسامايدى, ول – الەمدىك تاجىريبەدە بار نارسە.
گالينا سارسەنوۆا ايتقانداي, ۋاقىتشا تۇراتىن جەردە تىركەلۋ قازاقستاندا بۇعان دەيىن دە تالاپ ەتىلەتىن. تەك ول بۇرىن ۇكىمەت قاۋلىسىندا كورسەتىلگەن بولسا, ەندى زاڭدىق تۇرعىدا بەكىتىلدى. ال تىركەۋسىز تۇرۋ مەرزىمى 3 ايدان 1 ايعا قىسقاردى.
قانداي قۇجاتتار كەرەك؟
تىركەلۋگە بۇرىن 8 ءتۇرلى قۇجات جانە ەكى سوتكە ۋاقىت قاجەت بولسا, ەندى ول شارۋا ايتارلىقتاي جەڭىلدەدى – بار بولعانى 4-5 قۇجات جانە 10-20 مينۋت ۋاقىت كەرەك. الايدا, تىركەلۋشى ءوزى بولۋى مىندەتتى. تىركەلۋ ءۇشىن بۇگىنگى كۇنى مىناداي قۇجاتتار تالاپ ەتىلەدى:- ءۇي يەسىنىڭ كەلىسىمى;
- ءۇي يەسىنىڭ جەكە كۋالىگى;
- تىركەلۋشىنىڭ جەكە كۋالىگى;
- تىركەلۋ ءۇشىن 227 تەڭگە تولەگەنى تۋرالى تۇبىرتەك.
ءبىر پاتەردە قانشا ادامدى تىركەۋگە قويۋعا بولادى؟
سانيتارلىق تالاپتار بويىنشا, پاتەردە ءار تىركەلۋشىنىڭ كەمىندە 15 شارشى مەتر تۇرعىن جەرى بولۋى كەرەك. ازىرگە بۇل نورما الماتىدا ەنگىزىلگەن. بولاشاقتا ەلدىڭ بارلىق ايماقتارىندا وسىنداي تالاپتار قابىلداناتىن بولادى. تىركەلگەن ءار ادامعا پاتەردەن قانشالىق تۇرعىن ورىن بەرىلۋ كەرەكتىگى ءار ايماقتا ءارتۇرلى بولۋى مۇمكىن. مىسالى, الماتىدا 60 شارشى مەترلىك ەكى بولمەلى پاتەردە ءتورت ادامنان ارتىق تىركەۋگە الۋعا بولمايدى. «سىبايلاستىق ماسەلەسى ماڭىزدى سۇراق. ءبىزدىڭ قاتارىمىزدا قولى تازا ەمەس ادامدار بولۋى مۇمكىن. بىراق قايتا-قايتا پارا بەرگەنشە, ءبىر رەت 200 تەڭگە تولەپ تىركەلگەن ءتيىمدى. نەمەسە سىبايلاستىققا جول بەرمەۋ ءۇشىن ۇيدە ينتەرنەت ارقىلى تىركەلۋگە بولادى» دەدى سəرسەنوۆا حانىم. ول ءۇشىن جوعارىدا ايتىلعان ەلەكتروندى ساندىق قول قاجەت.ايىپپۇلدار قانداي؟
ەندى زاڭ تالاپتارى بۇزىلعان جاعدايدا سالىناتىن ايىپپۇلدار تۋرالى. ۋاقىتشا تۇرىپ جاتقان جەرىندە ءبىر ايدان اسا ۋاقىت تىركەۋسىز تۇرعانى ءۇشىن 7 اەك, ياعني 16 مىڭ تەڭگە ايىپپۇل سالىنادى. ەكىنشى تەكسەرۋ كەزىندە زاڭبۇزۋشىلىق انىقتالسا, ايىپپۇل 13 اەك, ياعني 29 500 تەڭگە بولادى. پاتەرشىلەردى تىركەۋگە قويماعان پاتەر يەلەرى 10 اەك, ياعني 22 600 تەڭگە ايىپپۇل تولەيدى. ولار جەكە تۇلعا ەمەس, شاعىن كاسىپكەرلىك فيرماسى بولسا ايىپپۇل كولەمى 15 اەك نەمەسە 34 000 تەڭگە, ال ءىرى كاسىپكەرلىك سۋبەكتىلەرى بولسا – 50 اەك كورسەتكىش, ياعني 113 500 تەڭگە. زاڭ كۇشىنە ەنگەنمەن, ايىپپۇل سالۋ ءالى دە كوپتەگەن قۇجاتتاردىڭ قابىلدانۋىن تالاپ ەتەدى. سوندىقتان ۋاقىتشا تىركەۋسىز ازاماتتاردى انىقتاۋ ءىسى 2017 جىلدىڭ 1 اقپانىندا, ال ايىپپۇل سالۋ 7 اقپاندا باستالادى. ەرجان ءابدىرامان
